Moses ta diki etwali liyapuki ndele te li yapula
1 Omwene okwa popya naMoses ndele ta ti: 2 “Nye mu nokudika etwali leongalo mefiku lotete lohani yotete. 3 Nomu nokutula mo mulo oshikefa shoundobwedi nokutuvika oshikefa noshiyatatukulifo. 4 Opo nee to eta mo oshitaafula nokutula kusho oinima i nokukala ko. U nokweeta mo yo oshikwatelwalamba nokutenheka kusho eelamba. 5 Ndele u nokutula oaltari yoshingoldo yokutwimina komesho yoshikefa shoundobwedi. Opo nee ove to endjelelifa oshiidilifoyata shoshivelo shetwali liyapuki. 6 Ove u nokutula ko oaltari yexwikilo komesho yoshivelo shetwali liyapuki nokutya, yoshivelo shetwali leongalo. 7 Ndele u nokutula elikoshelotemba pokati ketwali leongalo noaltari nokutekela mo omeva. 8 Nehale lokomesho li ninga la dingilila keembinga adishe ndele endjelelifa oshiidilifoyata koshivelo shehale lokomesho. 9 Opo nee kufa omaadi okuvaeka, nou nokuvaeka etwali liyapuki noinima aishe i li mo, noku i yapula pamwe noinima yalo aishe. I nokukala iyapuki. 10 U nokuvaeka yo nomaadi oaltari yexwikilo noilongifo aishe yayo ndele u nokuyapula oaltari. Noaltari i nokukala iyapukielela. 11 Opo nee to vaeke nomaadi elikoshelotemba noshikwatelwamhadi shalo u li yapule. 12 U nokwiifana yo Aron novana vaye ovamati ve uye popepi noshivelo shetwali leongalo, ndele u noku va kosha nomeva. 13 Dika Aron oikutu iyapuki, ndele u mu vaeke noku mu yapula, opo a shiive okulongela nge moshilonga shoupristeli. 14 U nokwiifana yo ovana vaye ovamati noku va dika oikutu yokoshi. 15 Va vaeka ngaashi wa vaeka xe, opo va shiive okulongela nge moshilonga shoupristeli. Evaeko lavo li nokukala kuvo oupristeli waalushe koludalo noludalo.”
16 Ndele Moses osho a ninga ngaashi Omwene e mu lombwela. Osho ye a ninga. 17 Netwali liyapuki la dikwa mefiku lotete mohani yotete momudo omutivali.
18 NaMoses okwa dika etwali liyapuki. Ye okwa tula po oikwatelwamhadi yalo noipilangi yalo kuyo nokwa kwatifa kumwe eenhikifo dalo nokwa dika eengudi dalo. 19 Ndele ye okwa yalela ofaila yetwali kombada yetwali noshituvikoyata shetwali okwe shi tula kombada yasho, ngaashi Omwene a lombwela Moses. 20 Ye okwa kufa vali oundobwedi nokwe u tula moshikefa nokwa xwekela omitengi meengodo kombinga nombinga yoshikefa, nokwa tula oshituviko shekwatakanifo koshikefa, 21 Opo nee ye a twala oshikefa metwali nokwa endjelelifa oshiyatatukulifo nokwa tuvika oshikefa shoundobwedi ngaashi Omwene a lombwela Moses. 22 Nokwa tula mo yo oshitaafula metwali leongalo kombinga yetwali liyapuki langhele koumbangalanhu pondje yoshitukulifoyata. 23 Ndele okwa tula ko kusho omingome koshipala shOmwene ngaashi Omwene a lombwela Moses. 24 Ndele ye okwa tula oshikwatelwalamba metwali leongalo, ye litaalelafana noshitaafula, kombinga yokoumbuwanhu wetwali liyapuki. 25 Nokwa tenheka ko eelamba koshipala shOmwene ngaashi Omwene okwa lombwela Moses. 26 Nokwa tula oaltari yoshingoldo metwali leongalo komesho yoshiyatatukulifo. 27 Nokwa tema oitwiminifo yedimba liwa kuyo, ngaashi Omwene a lombwela Moses. 28 Ye okwa endjelelifa yo oshiidilifoyata shoshivelo shetwali liyapuki. 29 Nokwa tula ko oaltari yexwikilo kombinga yoshivelo shetwali leongalo nokwa eta ko kuyo omaxwikiloyambo neendjayambo, ngaashi Omwene a lombwela Moses.Moses okwa tula ko oaltari yomaxwikiloyambo neendjayambo, ngaashi Omwene okwe mu lombwela. 30 Nokwa tula po yo elikoshelotemba pokati ketwali leongalo noaltari nokwa tila mo omeva okulikosha. 31 Ndele Moses naAron novana vaye ovamati va koshela mo omake avo neemhadi davo. 32 Vo ngeenge va ya mo metwali leongalo ile va ehena koaltari, vo ove likosha keshe olufo, ngaashi Omwene a lombwela Moses. 33 Nokwa dika yo ehale lokomesho, keembinga adishe detwali liyapuki noaltari nokwa endjelelifa oshiidilifoyata koshivelo shehale lokomesho. Osho ngaha Moses okwa wanifa oshilonga.
Efimano lOmwene tali yadifa etwali liyapuki
34 Opo nee oshilemo sha tuvika etwali leongalo nefimano lOmwene la yadifa etwali liyapuki, 35 onghee Moses a nyengwa okuya mo metwali, shaashi oshilemo sha kala kombada yalo nefimano lOmwene la yadifa etwali liyapuki. 36 Keshe olufo oshilemo eshi sha dja po petwali liyapuki, ovana vaIsrael va fikama moweenda wavo aushe, 37 ndelenee oshilemo ngeenge inashi dja po, opo nee vo inava fikama fimbo sho inashi dja po. 38 Osheshi momutenya oshilemo shOmwene sha kala kombada yetwali liyapuki nomoufiku omundilo wa kala ko, moipafi yeumbo alishe lOvaisraeli noweenda wavo aushe.
© Oshikwanyama Bible Revised © Bible Society of Namibia, 2008, 2012.
