Oshiwana tashi lombwelwa shi fikame
1 Omwene okwa popya vali naMoses ndele ta ti: “Inda ko, fikama ove noshiwana eshi we shi pitifa mo medu laEgipiti, u shi twale kedu nde li udanekela Abraham, Isak naJakob nokwaana neendjovo edi: ‘Oludalo loye Ame ohandi ke li pa.’ 2 Ndele Ame ohandi ke ku tumina omweengeli e mu kwatele komesho, nokuta mo Ovakaanan, Ovaamori, Ovaheti, Ovaperesi, nOvahevi nOvajebusi, 3 otamu i kedu li yadi omashini nomaadi eenyiki. Ndelenee Ame mwene itandi ka enda pamwe nanye, osheshi onye ovanhu mu neefingo dikukutu, muha nyonauke po mondjila.” 4 Ovanhu eshi va uda eenghundana edi dii vo ova nyika oluhodi. Nonande umwe ine liwapeka noufuuli. 5 Osheshi Omwene okwa li a lombwela Moses: “Lombwela ovana vaIsrael: ‘Nye oshiwana shi nofingo ikukutu. Ame ngeno ndi kale punye mepakumo leisho Ame ngeno handi mu nyono po. Ndelenee kufeni hano paife omawapeko eni oufuuli, opo ndi shiive okudiladila eshi handi mu ningile.’ ” 6 Opo nee ovana vaIsrael ve lidula omawapeko oufuuli ndele inave a djala vali okudja komhunda yaHoreb.
Moses ta undulile etwali liyapuki pondje kombada yonhanda
7 Ndele Moses okwa kufa etwali liyapuki ndele e li dikila pondje kokule nonhanda. Ndele ye okwe li luka etwali leongalo. Ndele keshe ou kwa li a hala okupula kOmwene ta i pondje ketwali leongalo, la li kombada yonhanda. 8 Ndele Moses eshi a ya ketwali, ovanhu aveshe va kala ofika, keshe umwe poshivelo shetwali laye. Vo va tala Moses fiyo ye okwa ya mo metwali. 9 NaMoses eshi a ya mo metwali, oluudi loshilemo le uya ndele la kala ofika poshivelo shetwali, opo nee Omwene okwa popya naMoses. 10 Ovanhu aveshe eshi va mona oluudi loshilemo la kala ofika poshivelo shetwali, ovanhu aveshe ova kala ofika ndele ve linyongamena, keshe umwe poshivelo shetwali laye.
Omwene ta popifa Moses ngaashi okaume kaye
11 Opo nee Omwene okwa popya naMoses koshipala noshipala, ngaashi omulumenhu ta popi nakaume kaye. Opo ye ta shuna konhanda, ndelenee omupiya waye Josua, omulumenhu omunyasha, omona waNun, ina dja mo metwali.
12 Opo nee Moses okwa popya nOmwene ndele ta ti: “Ove to lombwele nge: ‘Twala ko oshiwana eshi’, ndelenee ino hololela nge, olyelye to tumu naame, nande wa tonga nokutya: ‘Ame ondi ku shii kedina loye, nowa filwa onghenda momesho ange.’ 13 Hano ame eshi nda filwa onghenda momesho oye, shiivifile nge eendjila doye, opo ndi shiive oku ku shiiva, opo ndi shiive okufilwa onghenda momesho oye. Ndele dimbulukwa nokutya, ovanhu ava vo oshiwana shoye.” 14 Ndele Ye okwa nyamukula ta ti: “Oshipala shange shi nokweenda naave noku ku twala konhele yetulumuko.” 15 Opo nee ye ta ti kuye: “Oshipala shoye ngeenge itashi ende pamwe nafye, ino tu kufa po apa. 16 Osheshi omoshike ngeno mwa shiivika nokutya, ame nda filwa onghenda momesho oye, ame noshiwana shoye? Hakusho ngeno, Ove eshi ho ende pamwe nafye? Osho ngaha hano ame noshiwana shoye twa tongoka moiwana aishe yokombada yedu.” 17 Opo nee Omwene ta ti kuMoses: “Eindilo eli yo loye Ame ohandi ke li wanifa, osheshi ove wa filwa onghenda momesho ange, ndele Ame ondi ku shii kedina loye.”
Moses a hala okutala oshinge shOmwene
18 Moses okwa tya: “Talife nge oshinge shoye.” 19 Ndelenee Ye okwa nyamukula ta ti: “Oshingepangelo ashishe shange Ame ohandi ke shi koyifa po pwoove, nokwiingida edina lange ‘Omwene’ koshipala shoye. Ame ohandi ka filonghenda ou handi mu filonghenda, nokutalonheni ou handi mu talonheni.” 20 Natango Ye okwa tile: “Ove iho dulu okutala oshipala shange, osheshi kape nomunhu ta dulu okutala nge ndele ta kala nomwenyo.” 21 Omwene okwa tile yo: “Tala, apa ope nonhele pwaame, apa ove ho dulu okukala ofika kemanya. 22 Noshingefimano shange ngeenge tashi ku koyelele Ame ohandi ke ku tula mekololo lomamanya noku ku uvika neke lange fiyo nde ku koya po. 23 Ndele Ame ngeenge handi kufa po eke lange, ove oto ka tala nge konima. Ndelenee oshipala shange itashi dulika okutalwa.”
© Oshikwanyama Bible Revised © Bible Society of Namibia, 2008, 2012.
