EXODUS 21 - Oshikwanyama Bible (OKYB)

Eemhango dovapika

1 “Eemhango edi ove u noku di tula moipafi yavo: 2 Ove ngeenge ho lilandele omupika Omuheberi, ye e noku ku longela omido hamano, ndelenee momudo omutiheyali e nokweefwa ita kulilwa. 3 Ngeenge oye aeke e uya, oye aeke na efwe, ndelenee ngeenge a hombola, omwalikadi waye e nokweefwa pamwe naye.

4 “Omwene waye ngeenge te mu pe omwalikadi, ndele te mu dalele ovana ovamati noukadona, omwalikadi novana vo ovomwene wavo, fimbo ye aeke ta efwa. 5 Ndelenee omupika ngeenge ta ti shili: ‘Ame ondi hole omwene wange, nomwalikadi wange novana vange, ndele inandi hala ndi efwe,’ 6 opo nee omwene waye ne mu twale kovatokoli veendjovo noku mu kaleka ofika ngeenge poshivelo ile polumhango loshivelo, nomwene waye na tyuule okutwi kwaye nonhisho, ndele ye na kale alushe omupika waye.

7 “Ndele ngeenge umwe ta landifa po omona waye okakadona a ninge omupika, oye ehe nokweefwa ngaashi ovapika ovalumenhu. 8 Ye ngeenge ina wapalela omwene waye, ou e mu valekela a ninge waye, oye ne mu efe a kulilwe mo. Ye aha landifwe po koshiwana shimwe shi lili, ngeenge te mu henge po. 9 Ndelenee ngeenge te mu pe omona waye, oye ne mu ningile ngaashi ovana oukadona. 10 Nongeenge te likongele omwalikadi umwe, oye aha ninipike eendja daau wotete noikutu nokunangala naye. 11 Ndele oinima ei itatu ngeenge ite i mu wanifile, winya na efwe ita kulilwa.

Eemhango dovadipai vovanhu

12 “Ou ta denge omunhu ndele ta fi, oye na yandjwe okufya. 13 Ndelenee ngeenge ine shi ningila owina, ndele Kalunga e shi itavela shi ningwe keke laye, opo nee Ame ohandi ku ulikile onhele omo ye ta dulu okuya onhapo. 14 Ndelenee umwe ngeenge ta nyono kumukwao owina ndele te mu dipaa moku mu kengelela, ove u noku mu kufa koaltari yange a dipawe.

15 “Ou ta denge xe ile ina, na yandjwe shili okufya.

16 “Naau ta vake omunhu, ngeenge te mu landifa po ile te mu kalekele puye mwene, na yandjwe shili okufya.

17 “Naau ta fingi xe naina, e nokuyandjwa shili okufya.

Eemhango doiponga yokolutu

18 “Ngeenge ovalumenhu vavali tava tu eemhata, ndele umwe ta denge mukwao nemanya ile nongonyo, ye ita fi, ndelenee ta kala momutala ta vele, 19 nakudengwa ngeenge ta penduka mo, ndele te litwile konhaili, ta ende po, ou e mu denga, na efwe, ye e nokufutila ashike omafiku, kwa li ita dulu okulonga noku mu xunga fimbo ta veluka.

20 “Ngeenge umwe ta denge omupika waye omulumenhu ile omukainhu nonhaili, ndele ta file momake aye, ye e nokuhandukilwa shili. 21 Ndelenee ye ngeenge ta kala e nomwenyo efiku limwe ile omafiku avali, ke nokuhandukilwa, osheshi oye eliko laye mwene.

22 “Novalumenhu ngeenge tava dengafana ndele tava ngwadjula omukainhu omufimba ndele ta wifa edimo, ndelenee kape noshiponga shimwe, onaku mu ngwadjula e nokufutifwa komulumenhu womukainhu, ngaashi a hala oye e nokufuta, novatokoli ngaashi tave mu tokolele. 23 Ndelenee ngeenge omukainhu okwa fi, hano omwenyo nau yandjelwe omwenyo mukwao, 24 eisho omeisho, eyoo omeyoo, eke omeke, omhadi omomhadi, 25 omhile yomundilo omomhile yomundilo, oshipute sha tuwa omoshipute sha tuwa, ombole omombole.

26 “Umwe ngeenge ta denge meisho lomupika waye omulumenhu ile omukainhu ndele tali nyonauka, oye ne mu mangulule omolweisho laye. 27 Nongeenge ta denge mo eyoo lomupika waye omulumenhu ile omupika waye omukainhu, oye ne mu mangulule omolweyoo laye.

28 “Nongobe ngeenge tai tu omulumenhu ile omukainhu, ndele ta fi, ongobe nai dipawe nomamanya; nombelela yayo itai liwa, ndelenee mwene wongobe ke netimba. 29 Ndelenee ongobe ngeenge oya li nonale hai twana, namwene wayo okwe i lombwelwa, ndelenee ye ine i pashukila, hano ongobe ei ngeenge tai dipaa omulumenhu ile omukainhu, oyo i nokudipawa nomamanya, namwene wayo e nokuyandjwa a fye. 30 Ndelenee ngeenge ta lombwelwa e likulile, na futile ekulilo lomwenyo waye oikulila ei te i pulwa. 31 Nongobe ngeenge tai tu omumati ile okakadona, ndele ta fi, osho ngaha na tokolelwe yo. 32 Ongobe ngeenge tai tu omupika omulumenhu ile omukainhu, mwene waye na futilwe eesekeli doshisiliveli omilongo nhatu, nongobe nai dipawe nomamanya. 33 Umwe ngeenge ita tuvike ondungu yaye ile umwe ngeenge ta fe ondungu yaye ndele ite i tuvike, nongeenge ongobe ile ondongi tai wile mo, 34 omwene wondungu na fute mwene woshinamwenyo oimaliwa. Ndelenee oshinamwenyo sha fya, nashi ninge shaye. 35 Ongobe ngeenge tai tu ongobe yomunhu ndee tai fi, ongobe i nomwenyo, nai landifwe po, noimaliwa ve nokutukulilafana, nongobe ya tuwa ove noku i tukulilafana yo. 36 Nongeenge ya li ya shiivika hai twana nonale, namwene wayo ine i idilila mo, oye e nokuyandja ongobe mongobe ikwao naainya ya fya, nai ninge yaye.”