Ovaisraeli tava i kuSinai
1 Mohani onhinhatu Ovaisraeli eshi va pita medu laEgipiti, mefiku tuu olo, vo ova fika mombuwa yaSinai. 2 Vo ova fikama muRefidim ndele ve uya mombuwa yaSinai ndele va onga onhanda mombuwa. Ndele Ovaisraeli ova onga onhanda ya taalelafana nomhunda. 3 Ndelenee Moses okwa londa kuKalunga, ndele Omwene okwe mu ifana komhunda ndele ta ti: “Eumbo laJakob u noku li lombwela ngaha, novana vaIsrael u noku va udifila ngaha: 4 Nye vene mwa mona osho Ame nde shi ningila Ovaegipiti nonhumbi nde mu humbata momavava onhwa ndele nde mu eta kwaame. 5 Hano paife nye ngeenge tamu pwilikine ondaka yange ndele tamu diinine ehangano lange, nye mokati koiwana aishe, mu nokukala oshiwana shange mwene, osheshi edu alishe olange. 6 Ndele nye otamu ka kalela nge ouhamba wovapristeli noshiwana shiyapuki. Odo hano eendjovo u noku di lombwela Ovaisraeli.”
7 Ndele Moses e uya nokwa ifana ovakulunhu ndele e va shiivifila eendjovo adishe edi Omwene e di mu lombwela. 8 Opo nee ovanhu aveshe va itavela ndele tava ti: “Ashishe osho Omwene e shi tonga fye ohatu shi ningi.” NaMoses okwa twala eendjovo dovanhu kOmwene. 9 Ndele Omwene okwa lombwela Moses ta ti: “Tala, Ame ohandi ke uya kwoove moshilemo shilaula, ovanhu opo va shiive okuuda Ame eshi handi popi naave, navo yo va shiive oku ku itavela alushe.” Ndele Moses okwa hepaululila Omwene eendjovo dovanhu. 10 Omwene okwa lombwela vali Moses ndele ta ti: “Inda kovanhu u va yapule nena nomongula, nava koshe oikutu yavo, 11 nava kale ve lilongekida mefiku etitatu. Osheshi mefiku etitatu Omwene ote ke uya komhunda yaSinai moipafi yoshiwana ashishe. 12 Ovanhu u noku va findila omufinda wa dingilila ko, noku va lombwela: ‘Likeleleni, muha londe komhunda ile mu i kume nomhadi. Osheshi keshe umwe ta kumu omhunda, ota ka fya shili. 13 Nande eke lomunhu le i kumu, na dipawe nomamanya ile a yashwe noshikuti, ngeenge oshinamwenyo ile omunhu, ye ita ka kala nomwenyo.’ Ondaka ile yenghuma ngeenge tai shikwa opo nee vo nava londe komhunda.” 14 Ndele Moses okwa londoloka komhunda nokwa ya kovanhu ndele te va yapula. Ndele vo ova kosha oikutu yavo. 15 Ndele ye okwa lombwela ovanhu ta ti: “Kaleni mwe lilongekida mefiku etitatu. Inamu kuma omukainhu.”
Kalunga te lihololele ovanhu komhunda yaSinai
16 Ndele mefiku etitatu eshi kwa sha, opa li omapwalakato nomaluvadi, noshilemo shilaula sha li komhunda, nondaka yenghuma linene ya udika, opo ovanhu aveshe ava va li monhanda, ova kakama.
17 Opo nee Moses okwa pitifa mo ovanhu monhanda va ka shakeneke Kalunga, ndele vo ova kala ofika pefina lomhunda. 18 Nomhunda aishe yaSinai oya tuvikilwa komwifi, shaashi Omwene okwa londoloka momundilo. Nomwifi wa ya pombada ngaashi omwifi woluungu, nomhunda aishe oya kakama unene. 19 Ondaka yenghuma eshi ya ninga inene nokuyeluka, Moses okwa popya naKalunga okwe mu nyamukula nondaka yopombada. 20 Fimbo Omwene okwa londolokela konhele yomhunda yaSinai, okwa ifana Moses e uye konhele yomhunda, ndele Moses okwa londa ko. 21 Ndele Omwene okwa lombwela Moses: “Londoloka, u londole ovanhu vehe uye kOmwene va ka tale, vahapu vomuvo vaha nyonauke po. 22 Novapristeli yo ava hava ehene kOmwene, vo ove nokuliyapula voovene, Omwene ehe va nyone po.” 23 Opo nee Moses a nyamukula Omwene: “Ovanhu itava dulu okulonda komhunda yaSinai, osheshi Ove mwene we tu londola nokutya: ‘Findila omufinda tau dingilile omhunda, u li yapule.’ ” 24 Opo nee Omwene okwe mu lombwela: “Inda ko, londoloka. Opo nee ove naAron tamu londo pamwe, ndelenee ovapristeli novanhu inava tauluka omufinda va londe kOmwene, opo Omwene ehe va nyone po.” 25 Ndele Moses okwa londoloka nokwa ya kovanhu, ndele okwe shi va lombwela.
© Oshikwanyama Bible Revised © Bible Society of Namibia, 2008, 2012.
