Opaasa tai dikwa
1 Ndele Omwene okwa lombwela Moses naAron medu laEgipiti ta ti: 2 “Ohani tuu ei, oyo i noku mu ningila ehovelo leehani deni. Yo i noku mu ningila ohani yotete yomeehani domudo. 3 Lombweleni eongalo alishe laIsrael nokutya: Mefiku etimulongo lohani ei keshe umwe muvo, keshe omunyeumbo, e nokukufa odjona, keshe eumbo odjona. 4 Ndelenee eumbo ngeenge olinini nokulya po odjona, opo nee ye na kufe ko pamwe nomushiinda shaye, omaumbo a shaamafana, odjona, pamuvalo weemwenyo, keshe umwe ngaashi a ika okulya, osho mu nokuyeleka i wane okuliwa po. 5 Yo i nokukala odjona ihe noshiponga, odi okamhedi komudo umwe. Tava dulu oku i kufa ngeenge meedi ile moikombo. 6 Ndele ve noku i idilila mo fiyo okefiku etimulongo netine lohani tuu oyo. Neongalo alishe laIsrael li noku i dipaa onguloshi. 7 Ndele vo ve nokukufa mo ohonde noku i vaeka keemhango adishe mbali domuvelo nokoshikulo shopombada yomuvelo, omu tave i li. 8 Vo ove nokulya po ombelela yayo moufiku tuu ou, ya yofwa komundilo nove nokulya omingome dihe nonhafi pamwe noimbodi ilula. 9 Inave i lya iishu ile ya telekwa momeva, ndelenee ya yofwa komundilo, nomutwe nomakondo nomandjadja e li mo. 10 Inava xupifa sha muyo shefiku lomongula, ndele ngeenge tapa xupu sha shefiku lomongula, nashi xwikwe po momundilo.
11 “Ndele mu noku i lya po ngaha: Nye mwa djala omwiya moshiya neenghaku deni keemhadi, nonhaili meke, nomu noku i lya mwa endelela. Osho Opaasa yOmwene. 12 Osheshi oufiku tuu ou Ame ohandi ka endaenda nokutaulula edu laEgipiti nohandi dipaa oiveli aishe yomoshilongo shaEgipiti, oiveli yovanhu noyoinamwenyo. Ndele Ame ohandi ka tokola nehandu oikalunga aishe yomuEgipiti. Aame tuu ou, Omwene. 13 Ndelenee ohonde tai ka kala kunye edidiliko meengulu omu tamu kala: Ame ngeenge handi mono ohonde, Ame ohandi ka koya po. Nye itamu ka hangika koshiponga shokunyonwa po, fimbo Ame handi denge Ovaegipiti.
14 “Nefiku tuu olo li noku mu ningila efiku ledimbuluko, ndele nye mu noku li dana ngaashi oshivilo shokufimaneka Omwene. Nye mu noku shi dana kepupi nepupi ngaashi onghedimhango yaalushe. 15 Momafiku aheyali mu nokulya omingome dihe nonhafi. Mefiku lotete nokuli mu nokweekelashi momaumbo eni olumbololo lomungome li nonhafi. Osheshi keshe ou ta li omungome u nonhafi mefiku lotete fiyo okefiku etihamano, omwenyo ou u nokunyonwa po muIsrael. 16 Nomefiku lotete omu nokwoongala oshiongalele shiyapuki, nosho mefiku etiheyali omu nokwoongala oshiongalele sheni shiyapuki. Momafiku enya inamu longa nande oshilonga. Ashike osho omunhu keshe te shi pumbwa okulya, nashi longekidwe. 17 Diinineni oshivilo eshi shomingome inamu ya onhafi, osheshi mefiku tuu olo Ame nda pitifa omatanga eni medu laEgipiti. Onghee hano nye mu nokudiinina efiku olo kepupi nepupi ngaashi onghedimhango yaalushe.
18 “Mohani yotete, mefiku etimulongo netine lohani, onguloshi, nye mu nokulya omingome dihe nonhafi fiyo onguloshi yefiku etimilongo mbali nalimwe lohani oyo. 19 Momafiku aheyali muha monike momaumbo eni onhafi yomungome, osheshi keshe ou ta li omungome u nonhafi na nyonwe mo moshiwana shaIsrael, ngeenge omunailongo ile omudalelwa mo. 20 Inamu lya nande sha shi nonhafi, ndelenee lyeni omingome dihe nonhafi keshe apa mu li.”
21 Opo nee Moses okwa ifana ovakulunhu aveshe vOvaisraeli ndele ta ti kuvo: “Indeni mu ke likongele keshe eumbo odi imwe, nye mu i dipaele Opaasa. 22 Ndele kufeni okapandi kaisopi, mu ke ka yaveke mohonde i li metemba ndele vaekeni ohonde koshikulo nokeemhango. Ndelenee inamu pita nande oumwe meumbo lavo, a ye pondje fiyo ongula. 23 Osheshi Omwene ta ka endaenda a denge Ovaegipiti. Ndelenee keshe apa Ye ta mono ohonde moshikulo shopombada nomeemhango odo mbali Omwene ta ka koya po ndele ita efele omudipai okuya mo momaumbo eni a dipae. 24 Diinineni oshinima eshi ngaashi onghedimhango yeni nokoludalo leni fiyo alushe. 25 Nongeenge tamu uya medu olo Omwene te ke li mu pa ngaashi Ye a udanekele, nye mu nokudiinina onghedi ei. 26 Novana veni ngeenge tave mu pula: ‘Eenghedi odo otadi ti ngahelipi?’ 27 opo nee nye mu noku va lombwela: ‘Olo eyambo lekoyo lOmwene, ou a koyelela po omaumbo Ovaisraeli muEgipiti, Ye eshi a denga Ovaegipiti, ndelenee a filonghenda omaumbo etu.’ ” Opo ovanhu ve linyongamena nokwiilikana.
28 NOvaisraeli va ya ndele ve shi ninga. Ngaashi Omwene a lombwela Moses naAron, osho va ninga.
Oiveli yOvaegipiti tai dipawa po
29 Ndele pokati koufiku Omwene okwa dipaa oiveli aishe moshilongo shaEgipiti, tete oshiveli shaFarao, ou a kala omutumba kolukalwapangelo fiyo oshiveli shonghwate, ya kala modolongo, noiveli aishe yoinamwenyo. 30 Opo nee Farao okwa penduka pokati koufiku, ye novapiya vaye aveshe, ndele pa li ekemo linene muEgipiti, osheshi inapa kala nande eumbo limwe inamu kala omufi. 31 Opo nee ye a ifana Moses naAron mokati koufiku, ndele ta ti: “Lilongekideni, djeni mo moshilongo shange nye nOvaisraeli, mu ka longele Omwene ngaashi mwa tile. 32 Kufeni yo oimuna yeni neengobe mu ye nado ngaashi mwa tile, indeni ndele ilikanenei nge yo, ndi nangekwe noupuna.” 33 NOvaegipiti ova ulumika unene ovanhu va dje mo diva moshilongo. Osheshi va tya: “Fye atushe hatu fi!”
Ovaisraeli tava di muEgipiti
34 Opo nee ovanhu ova kufa olumbololo lomingome fimbo inali fuluka, nomalwiyo avo olumbololo a mangelwa moikutu yavo yokombada okomapepe avo. 35 NOvaisraeli va ninga paendjovo daMoses: Vo ova indila kOvaegipiti oinima oisiliveli noingoldo noikutu; 36 nOmwene okwa monifila ovanhu vaye elao momesho Ovaegipiti, vo ove va pa. Osho ngaha va kufa oinima kOvaegipiti.
37 NOvaisraeli ova dja muRameses ndele va ya kuSukkot, vo va li ve fike ngeno povalumenhu omayovi omafele ahamano kolupadi kakele kovakainhu nounona. 38 Nongudu inene yovanhu vohonde i lili va enda pamwe navo, nosho yo oimuna neengobe, oimuna ihapu unene. 39 Ndele vo ova ninga omingome dihe nonhafi olumbololo lomungome ve li humbata mokudja muEgipiti. Osheshi lo inali tumbifwa konhafi, shaashi ova tewa mo muEgipiti, inava shiiva okwoovelelwa ko, ngaashi inave litwila onghuta.
40 Nefimbo Ovaisraeli va kala muEgipiti ola li omido omafele ane nomilongo nhatu. 41 Ndele omido omafele ane nomilongo nhatu eshi da pita, mefiku tuu olo, omatanga ovakwaita vOmwene okwa dja mo moshilongo shaEgipiti. 42 Oufiku tuu ou wepashukilo okefimano lOmwene, shaashi mefimbo tuu olo Ye e va pitifa mo medu laEgipiti. Oufiku tuu ou Ovaisraeli aveshe nava kale va pashuka okufimaneka Omwene kepupi nepupi.
Eenghedimhango daPaasa
43 Ndele Omwene okwa lombwela Moses naAron, ndele ta ti: “Oyo onghedimhango yaPaasa. Omunailongo nande umwe aha lye odi yaPaasa. 44 Ndelenee omupika keshe, ou a landwa noimaliwa, e nokupitifwa etanda, opo e i lye. 45 Omunailongo nande umwe ile omulongeli wondjabi ine i lya. 46 Meumbo limwe alike i nokuliwa; inapa kala nande sha shomombelela yayo tashi pitifwa meumbo, i ye ngeno pondje, nekipa layo lihe nokutetwa. 47 Eongalo alishe laIsrael li noku i fimaneka. 48 Ndele omunailongo ou ta kala mokati keni nokwa hala okulya Opaasa okufimaneka Omwene, ovalumenhu aveshe vomeumbo loye ve nokupitifwa etanda; opo nee ta ehene po nokulya ndele ta talwa oye ngaashi omudalelwa moshilongo. Ndelenee nande umwe ou ina pita etanda ine i lya. 49 Ndele otapa kala omhango imwe aike yovadalelwamo noyovanailongo ovo tava kala mokati keni.”
50 NOvaisraeli aveshe ve shi ninga; ngaashi Omwene a lombwelele Moses naAron osho va ninga. 51 Ndele mefiku tuu olo Omwene okwa pitifa mo medu laEgipiti Ovaisraeli pamatanga avo.
© Oshikwanyama Bible Revised © Bible Society of Namibia, 2008, 2012.
