ESTER 9 - Oshikwanyama Bible (OKYB)

Ovajuda tava handukile ovatondadi vavo

1 Ndele mohani onhimulongo nambali nokutya, ohani Adar, mefiku etimulongo netitatu lomuyo, eshi oshipango shohamba nomhango yayo ya li i nokuwanifwa, efiku tuu olo ovatondadi vOvajuda va li ve li teelela ve va kwate, ndelenee mefiku tuu olo Ovajuda va kwata ovatondadi vavo, 2 Ovajuda va ongala moilando yavo yomoitukulwalongo aishe yohamba Ahasveros okukwata ovo va li ve va halela oshiponga. Ndele kaku na ou a dula okukala a pama koshipala shavo, osheshi ehaluko omolwavo la kwata ovanhu aveshe. 3 Nomalenga aeshe omoitukulwalongo novapangeli ovapiya vohamba va ama kOvajuda, osheshi va haluka molwaMordekai. 4 Osheshi Mordekai kwa li a kula mouhamba wohamba, netumbalo laye la tandavela moitukulwalongo aishe, shaashi omulumenhu Mordekai okwa ehena komesho moulenga. 5 NOvajuda va taataa ovatondadi vavo noku va twa nomaongamukonda noku va hanauna po noku va dipaa, ndele va ningila ovatondadi vavo ngaashi va hala. 6 Ndele mohotengulu yaSusa Ovajuda va dipaa nokuhanauna po ovalumenhu omafele atano. 7 Ndele Parsandata naDalfon naAspata, 8 naPorata naAdalja naArdata, 9 naParmasta naArisai naAridai naWaisata, 10 ovana omulongo ovalumenhu vaHaman yaHammedata, omutondadi wOvajuda, Ovajuda ve va dipaa, ndelenee inava kuma omamona.

11 Mefiku tuu olo omuvalu waava va dipawa mohotengulu yaSusa, wa shiivifilwa ohamba. 12 Nohamba tai ti komumbada Ester: “Mohotengulu yaSusa Ovajuda va dipaa ovalumenhu omafele atano novana ovamati omulongo vaHaman. Ova ninga shike moitukulwalongo ikwao yohamba? Ove to indile shike? Otashi ke ku wanifilwa. Ndele wa hala shike vali? Tashi ka wanifwa.” 13 Opo nee Ester ta ti: “Ngeenge tashi wapalele ohamba, Ovajuda vomuSusa nava itavelelwe okuninga nongula pamhango oyo va ninga nena. Novana omulongo ovalumenhu vaHaman nava endjelelifwe komuti wokumangeleka mo.” 14 Nohamba ya yandja oshipango ve shi ninge. Nomhango ya shangwa muSusa, ndele ovana omulongo vaHaman ve va endjelelifa komuti. 15 NOvajuda vomuSusa va ongala vali mefiku etimulongo netine mohani Adar. Ndele muSusa va dipaa ovalumenhu omafele atatu, ndelenee inava kuma omamona.

16 NOvajuda vakwao ovo va kala moitukulwalongo yohamba, va ongala okulipopila ndele va mona etulumuko kovatondadi vavo. Ndele va dipaa movatondadi vavo ovalumenhu omilongo heyali navatano, ndelenee inava kuma omamona. 17 Eshi sha ningwa mefiku etimulongo netitatu mohani Adar. Ndele va tulumukwa mefiku etimulongo netine ndele ve li ninga efiku loitelekela nolokuhafa. 18 Ndelenee Ovajuda vomuSusa va ongala mefiku etimulongo netitatu nomefiku etimulongo netine, ndele mefiku etimulongo netitano lomuyo va tulumukwa, onghee ve li ninga efiku loitelekela nolokuhafa. 19 Onghee hano Ovajuda ovo va kala momikunda dihe neehotekuma, efiku etimulongo netitatu lohani Adar ve li ninga efiku lehafo noloitelekela yoshivilo omo hava tuminafana eendja dinyenye.

Oshivilo Purim tashi dikwa

20 Ndelenee Mordekai okwa shangela membo oinima ei nokwa tumina Ovajuda vomoitukulwalongo aishe yohamba Ahasveros, ovo ve li popepi naavenya vokokule, eenhumwafo, 21 ndele e va pangelela, nokutya omido adishe mefiku etimulongo netine lohani Adar nefiku etimulongo netitano lomuyo ve nokudana oshivilo, 22 shaashi momafiku tuu oo nomohani tuu oyo Ovajuda va mona etulumuko kovatondadi vavo. Oluhodi la shituka ehafo, nokulila kwa shituka efiku loshivilo, opo omafiku aa ve a ninge omafiku oitelekela nokuhafa ndele va tuminafane eendja dinyenye nokutumina eehepele eeshali.

23 Ndele osho ve shi hovela okuninga naasho Mordekai e shi va shangela, Ovajuda ve shi ninga onghedimhango. 24 Osheshi Haman yaHammedata, Omuagag, omutondadi wOvajuda aveshe okwa pangela omhangela okuhanauna po Ovajuda, ndele a umba Pur nokutya, oshihoololifo e va hanaune po noku va komba po. 25 Ndelenee osho eshi sha udika kohamba, yo oya shanga ndele ya yandja oshipango, nokutya omhangela yaye youkolokoshi ye e i diladilila Ovajuda, i nokuwila komutwe waye mwene. Ndele ve mu endelelifa novana vaye ovalumenhu komuti wokumangeleka mo. 26 Onghee hano ohava luku omafiku oo Purim molwedina Pur. Onghee hano molweendjovo adishe odo domonhumwafo oyo, nomolwaasho voovene ve shi mona mo muyo naasho ve shi ningilwa, 27 Ovajuda ve shi pangela omhangela ndele ve shi tala eufomhango lavo nololudalo lavo nolaaveshe have litula muvo, opo li kale itali lundululwa, nokutya va diinine omafiku oo avali omudo keshe papukululoshango mefimbo la pangelwa. 28 Ndele epupi keshe lOvajuda nepata keshe noitukulwalongo noilando i dimbulukwe omafiku oo noku a diinina, nomafiku aPurim aha efiwe nokudimbulukiwa kwao mokati komaludalo avo kuha xule. 29 Nomumbada Ester, omona okakadona kaAbigail nOmujuda Mordekai ova shanga nokufinda mo movanhu onhumwafo oyo onhivali va pameke oshivilo Purim. 30 Ndele ye okwa shangela Ovajuda aveshe vomoitukulwalongo efele nomilongo mbali naiheyali yomoshilongo shaAhasveros, eenhumwafo di neendjovo dombili nodoshili, 31 opo a pameke omafiku aa aPurim pomafimbo ao a pangelwa ngaashi Omujuda Mordekai nomumbada Ester e va lombwela nongaashi kuvo nokomaludalo avo va pameka omapukululoshango taa tongo efimbo lelidiliko nolokukema. 32 Nelombwelo laEster omapukululoshango aPurim a pamekwa, ndele oo a shangelwa membo.