Mordekai ta fimanekwa
1 Oufiku tuu ou eemhofi da londoka ohamba ndele ya tya, eteni oidimbulukifoshango nokutya, embo lomafimbo. Ndele lo eshi la leshelwa ohamba, 2 ova mona, nokutya mwa shangwa Mordekai okwa holola ekengelelo lomalenga avali ohamba omovanangeli vopoivelo, Bigtana naTeres, nokutya va konga omhito yokupyaifa omake avo kohamba Ahasveros. 3 Opo nee ohamba tai ti: “Mordekai okwe shi fimanekelwa nokwe shi lengelwa ngahelipi?” Ovapiya vohamba, ava tave i yakula, va nyamukula: “Ina ningilwa sha!” 4 Opo nee ohamba tai ti: “Olyelye e li kehale?” Pefimbo tuu olo Haman e uya mehale lopondjelela yongulu yohamba, e uya a lombwele ohamba, nokutya Mordekai e nokweendjelelifwa komuti wokumangeleka mo, oo ye e u mu dikila. 5 Novapiya vohamba ve i nyamukula: “Penya pa kala ofika Haman mehale lokomesho.” Opo nee ohamba tai ti: “Ne uye mo.” 6 Haman eshi e uya mo, ohamba tai mu pula: “Omulumenhu ou ohamba ya hala oku mu fimanekifa, ota ningwa ngahelipi?” Haman nokwe lidiladila ye mwene: “Olyelye vali ngeno e nokufimanekwa kohamba komesho yange, haame?” 7 Onghee hano Haman a lombwela ohamba: “Omulumenhu ou ohamba ya hala oku mu fimanekifa 8 ye na djalekwe oshikutu shohamba ya li ye shi djala, nonghambe oyo hai londwa kohamba, komutwe wayo kwa tulwa oshishani shohamba; 9 noshikutu nonghambe nai pewe umwe womomalenga ohamba, ovalumenhu ovafimanekwa.” Omulumenhu ou ohamba ya hala oku mu fimanekifa, ne shi djalekwe ndele na londe konghambe ndele ta endaendifwa momapandavanda oshilando ndele komesho yaye naku ingidwe ku tiwe: “Omulumenhu ou ohamba ya hala oku mu fimaneka, osho ta ningwa.” 10 Opo nee ohamba tai ti kuHaman: “Kufa divadiva oshikutu nonghambe ngaashi wa tonga, ndele osho ningila Omujuda Mordekai, ou ta kala omutumba poshivelo shohamba. Ino xupifa ondjovo nande imwe mwaado adishe we di popya.” 11 Ndele Haman okwa kufa oshikutu nonghambe, nokwa djaleka Mordekai nokwe mu endaendifa a londa konghambe momapandavanda omoshilando ndele a ingida komesho yaye: “Osho ngaha omulumenhu ta ningwa, ou ohamba ya hala oku mu fimaneka.”
12 Opo nee Mordekai a shuna koshivelo shohamba, ndelenee Haman okwa endelela nokuya keumbo laye e noluhodi nomutwe wa uvikwa. 13 Ndele Haman okwa hepaululila omwalikadi waye Seres nookaume kaye aveshe, ashishe osho she mu hanga. Opo nee ovalumenhu ovanongo nomwalikadi waye Seres ve mu lombwela: “Ngeenge Mordekai, koshipala shaye wa hovela nokuli okuxutuka, ngeenge ye owomoludi lOvajuda, ito ka dula sha, ndelenee okuwila po ashike koshipala shaye.”
14 Fimbo vo tava popi naye, ovapiya vohamba ve uya, ndele va twala Haman divadiva koitelekela, Ester e i teleka.
© Oshikwanyama Bible Revised © Bible Society of Namibia, 2008, 2012.
