ESTER 4 - Oshikwanyama Bible (OKYB)

Mordekai ta lombwele Ester, a kwafe Ovajuda

1 Mordekai eshi a uda ashishe osho sha ningwa, Mordekai okwa pombaula oikutu ndele a djala oikutu yeefya, ndele e liunda omute komutwe waye, nokwa ya mokati koshilando ndele ta ingida pombada eendjovo douyehame. 2 Osho ngaha e uya fiyo oposhivelo shohamba, ndelenee inashi itavelelwa omunhu ta i moshivelo shohamba a djala oikutu yeefya. 3 Ndele moitukulwalongo aishe omo oshipango shohamba nomhango yayo ya fika, mwa li oluhodi linene mokati kOvajuda: ve lidilika, va lila nokukema. Vahapu va yala koshi yavo oshako nomute. 4 Ovapiya ovakainhu vaEster nomalenga aye omouhamba eshi ve shi mu shiivifila, omumbada a kwatwa koluhodi linene. Nokwa tuma oikutu, opo Mordekai e i djale ndele e lidule oikutu yaye yeefya. Ndelenee ine i tambula. 5 Opo nee Ester a ifana Hatak womomalenga ohamba, ou a tulwa po kohamba oku mu yakula, nokwe li lombwela li ye kuMordekai a ude osho tashi ti shike nomolwashike e shi ninga. 6 Hatak okwa ya pondje kuMordekai konhele ya lalakana yoshilando oyo poshivelo shohamba. 7 Opo nee Mordekai e mu shiivifila ashishe osho she mu hanga, nosho yo oisiliveli i fike peni Haman a udaneka a yelekele momamona ohamba ofuto, Ovajuda eshi tava hanaunwa po. 8 NaMordekai okwe mu pa eshangululo lomhango ya shangwa muSusa yoku va hanauna po, opo e li hololele Ester ndele e mu shiivifile oshinima osho ndele e mu fininike okuya kohamba a indile onghenda ndele a popile oshiwana shaye kuyo. 9 Opo nee Hatak a ya mo nokwa shiivifila Ester eendjovo daMordekai. 10 Opo nee Ester ta lombwele Hatak ye a lombwele Mordekai nokutya: 11 “Ovapiya aveshe vohamba novanhu vomoitukulwalongo yohamba ve shi shii, nokutya keshe omulumenhu ile omukainhu ta i kohamba kehale lomeni ngeenge ina ifanwa, ta tokolelwa pamhango imwe: e nokudipawa, okuninga ohamba tai mu ulike nepangelodibo layo loshingoldo, a kale e nomwenyo. Ndele pomafiku omilongo nhatu inandi ifanwa ndi ye mo kohamba.” 12 Ndele eendjovo daEster ve di shiivifila Mordekai. 13 Opo nee Mordekai te va lombwele, va nyamukule Ester: “Ino diladila, nokutya ove eshi u li mongulu yohamba to ka xupifwa oove auke mOvajuda, 14 osheshi ove ngeenge to mwena, Ovajuda tava ka mona ekwafo nexupifo pamwe pe lili, ndelenee ove neumbo loye tamu ka hanaunwa po, ndele olyelye e shi shii kashiimba wa pewa oumbada wohamba omolwefimbo tuu eli?” 15 Opo nee Ester okwe va lombwela va nyamukule Mordekai, va tye: 16 “Inda u ongele Ovajuda aveshe ava tava monika muSusa, ndele lidilikeni molwange. Ndele momafiku atatu oufiku nomutenya inamu lya ndele inamu nwa. Naame yo pamwe novapiya vange ovakainhu hatu ke lidilika. Opo nee handi i mo kohamba, osho nande kashi li pamhango, ndele ngeenge ndi nokufya, ondi nokufya.” 17 Ndele Mordekai okwa ya ndele a ninga ngaashi Ester e mu lombwela.