Paulus omuudifi wevaengeli mokati kovapaani
1 Onghee hano aame Paulus, omumangwa waKristus Jesus omolweni ovapaani, 2 ndishi mwa uda epangelo leumbo longhenda yaKalunga, nde li pewa molweni, 3 nokutya, oshiholekwa eshi nde shi hololelwa memoniko, ngaashi nde mu shangela nokuli paxupi; 4 nomoku di lesha tamu dulu okukoneka okushiiva kwange moshiholekwa shaKristus, 5 osho inashi shiivifilwa ovana vovanhu mefimbo lomapupi onale, ngaashi sha hololelwa paife ovayapostoli vaye ovayapuki novaxunganeki mOmhepo, 6 nokutya, omevaengeli tuu olo, ovapaani ovo oonakufyuulula pamwe navo omolutu limwe ndele ve noshipewa meudaneko muKristus Jesus.
7 Ame nda ninga omuyakuli walo opashali shonghenda yaKalunga oyo nde i pewa kokulonga kweenghono daye. 8 Aame ou omunini ndi dulike kovayapuki aveshe onda pewa efilonghenda eli, okuudifila ovapaani evaengeli loupuna waKristus uhe fi okukonakonwa, 9 nokuhololela aveshe epangelo loshiholekwa eshi sha li sha holekwa muKalunga, Omushiti waaishe, okudja momafimbo ounyuni onale, 10 opo omapangelo neenghonopangelo eenghwaulu di shiivifilwe keongalo ounongo uhapu waKalunga, 11 opamhangela yaalushe oyo e i pangela muKristus Jesus, Omwene wetu, 12 muye tu na ouladi nomhito pamwe nelineekelo okeitavelo okufika kuKalunga. 13 Onghee hano ohandi ilikana, muha lololwe komauyehame aa ange ndi a kwete molweni, osheshi oo efimano leni.
Okukula mOukriste
14 Onghee hano ohandi tu eengolo koshipala shaXe yOmwene wetu Jesus Kristus, 15 mwaau epata keshe meulu nokombada yedu le mu lukilwa, 16 opo Ye e mu pe paupuna wefimano laye eenghono dokupameka omunhu womeni okOmhepo yaye, 17 Kristus opo a kale momitima deni okokwiitavela, opo mu kale mwa twamifwa nomwa dikwa mohole, 18 mu dule okukoneka pamwe novayapuki aveshe oumbwalangadja, noule womukokomoko, noule woposhi, noule wopombada, 19 nokushiiva ohole yaKristus ei i dule eshiivo alishe, opo mu yade ouyadi aushe waKalunga.
20 Ndelenee Oye tuu ou ta dulu okulonga shihapuhapu kombada yaai hatu i indile nohatu i diladila paenghono odo tadi longo mufye, 21 Oye na fimanekwe meongalo nomuKristus Jesus komapupi aeshe alushe fiyo alushe. Amen!
© Oshikwanyama Bible Revised © Bible Society of Namibia, 2008, 2012.
