Ovafi va ninga ovanamwenyo muKristus
1 Ndele Kalunga okwe mu tula omwenyo onye ava mwa li mwa fila momatauluko nomomatimba eni, 2 omu mwa endaenda nale panghedi yefimbo lounyuni eli noyomupangeli weenghonopangelo domomhepo nokutya, pamhepo yomupangeli ou ta longo paife movana vokuhadulika, 3 mokati kavo nafye yo atushe twa endaenda nale, omolwisho lombelela yetu twa shikula ouhalu wombelela noweendunge ndele twa li ovana vehandu paushitwe wetu nongaashi vamwe yo.
4 Ndelenee Kalunga ou a yada efilonghenda omolwohole yaye inene a kala e tu hole, 5 okwe tu tula yo omwenyo pamwe naKristus, ofye ava twa li twa fila moulunde, okonghenda mwa xupifwa, 6 ndele okwe tu nyumuna pamwe naye, nokwe tu tula mumwe naye moikwaulu muKristus Jesus, 7 opo a holole momafimbo okomesho oupuna wefilonghenda laye uhe nondjele mouwa waye kufye muKristus Jesus. 8 Osheshi mwa xupifwa konghenda omolweitavelo, lo inali dja munye vene, olo oshali yaKalunga, 9 hamolwoilonga, opo paha kale nande umwe te litange. 10 Osheshi ofye oshilonga shaye twa shitilwa muKristus Jesus oilonga iwa oyo ya longekidwa nale kuKalunga opo fye tu kale nokweenda muyo.
Nale ovakwanaluhepo, paife ovanelao
11 Onghee hano dimbulukweni kutya, onye ava mwa li nale ovapaani pambelela, omwa ifanwa muhe fi ovapititanda kwaava hava tiwa ovapititanda opapitifotanda olo tali longwa nomake mombelela, 12 mefimbo linya mwa li muhe na Kristus, omwa li muhe noukwashilongo waIsrael, ovanailongo komahangano eudaneko, muhe neteelelo nomuhe na Kalunga mounyuni; 13 ndelenee paife eshi mu li muKristus Jesus, nye ava mwa li vokokule mwa ninga vopopepi omohonde yaKristus.
14 Osheshi Oye ombili yetu, Oye ou ovo aveshe vavali e va ninga umwe, nokwa kumuna po ekuma la li pokati, nokutya, etondafano, 15 eshi mombelela yaye mwene a hanauna po omhango yoipango noyeenghedi, opo a shite ava vavali va ninge omunhu umwe mupe muye mwene nokuninga ombili, 16 naava vavali e va kwatakanife naKalunga molutu limwe momushiyakano nokufifa etondafano muye mwene. 17 Ndele Ye okwe uya oku mu udifila ombili, onye ava mwa li kokule, nombili kwaava vopopepi; 18 Osheshi omolwaye ofyeni atusheni tu nomhito kuTate mOmhepo imwe.
19 Osho hano paife nye kamu fi vali ovanailongo novaenda, ndelenee nye omwa ninga ovakwao vovayapuki novaneumbo vaKalunga, 20 omwa tungilwa momukangha wovayapostoli nowovaxunganeki omu mwa kala Kristus Jesus emanya lokokonela, 21 mwaau etungo alishe tali kwatafana kumwe ndele tali kulu, tali ningi otembeli iyapuki omOmwene; 22 ndele muye nanye yo otamu tungwa, mu ninge eumbo laKalunga omOmhepo.
© Oshikwanyama Bible Revised © Bible Society of Namibia, 2008, 2012.
