Fimbo tu nomhito, natu ninge ouwa
1 Ekela omungome woye kombada yomeva, osheshi ngeenge pa piti omafiku mahapu ove to ke u mona. 2 Oshitukulwa shi yandjela vaheyali, heeno, vahetatu yo, osheshi inamu shiiva omupya washike tau ka kala kombada yedu. 3 Oilemo ngeenge i yadi odula, yo otai i lokele edu. Ndele omuti ngeenge tau wile kOumbuwanhu ile kOumbangalanhu, kombinga tuu oyo omuti tau wile ko, oko tau nangala. 4 Ou ha tale omhepo, ita ka kuna nande; ndele ou ha tale oilemo, ita ka teya nande. 5 Ngaashi ino shiiva ondjila yomhepo ile nhumbi omakipa taa kulu mo medimo lomufimba, nosho ino shiiva oilonga aishe yaKalunga. 6 Ombuto yoye i kuna ongula, ndele ino tulumukifa eke loye komatango. Osheshi ku shi shii, ilipipo tai ka mena, oyo ile inya, ile ngeenge aishe ivali tai ka kala ya wapala.
7 Natango: ouyelele omuwa ndele tashi wapalele omesho okumona etango. 8 Osheshi omunhu nande a kale e nomwenyo omido dihapu, ye e nokuhafa mudo adishe nokudimbulukwa omafiku omulaulu, osheshi oo otaa ka kala mahapu. Ashishe osho tashi ke uya, oshongahoelela.
9 Omunyasha ove, kala wa nyakukwa mounyasha woye, nomutima woye nau ku hafife momafiku omounyasha woye. Ndele enda neendjila domwenyo woye, ndelenee kala u shi shii nokutya, Kalunga ote ku tokolifa molwaashishe eshi. 10 Ndele taataa mo oluhodi momwenyo woye, ndele kandula po omauyehame molutu loye, osheshi ehafo nounyasha yo oyongahoelela.
© Oshikwanyama Bible Revised © Bible Society of Namibia, 2008, 2012.
