Omapata Ovaisraeli taa punikwa kuMoses
1 Ndele enangeko noupuna laMoses, omulumenhu waKalunga, a nangeka nalo ovana vaIsrael noupuna fimbo ina fya, oleli: 2 Ndele ye okwa tile:
Omwene okwe uya, a dja kuSinai,
ndele okwe va pitila ngetango muSeir.
Ye okwe va holokela mouyelele woshinge keemhunda daParan
nokwa dja mengafifi lovayapuki omayovi omulongo.
Kolulyo laye kwa monika omhango ya xwama omundilo moipafi yavo.
3 Heeno, Ye e hole omapata.
Ovayapuki vaye aveshe ove li meke laye,
ndele vo va li va onga onhanda peemhadi doye.
Keshe umwe okwa pewa sha shomeendjovo doye.
4 Moses okwe tu lombwela omhango,
yo oshifyuululo sheongalo laJakob.
5 Ndele Ye okwa ninga ohamba muJesurun,
ovakulunhu voshiwana eshi va ongala,
nomapata aeshe Ovaisraeli kumwe.
6 Mokutonga Ruben, Moses ota ti:
“Ruben na kale nomwenyo, aha fye,
nomuvalu wovalumenhu vaye vaha ninge vanini.”
7 Mokutonga Juda, ye ota ti:
“Omwene, uda ondaka yaJuda;
mu eta koshiwana shavo.
Ye okwe shi kondjela nomake aye; nokukondjifa ovafininiki vaye,
Ove ninga ekwafo laye.”
8 Mokutonga Levi, ye ota ti:
“Levi na pewe Tummim, naUrim owo womulumenhu, wakaume koye,
ou a yelekwa kwoove muMassa,
ou a twa eemhata naave muMeriba,
9 Ou ta tongo xe naina ta ti:
‘Ame nghi va shii,’
ndele ina shiiva ovamwaina
novana ite va yavala.
Osheshi vo ova tuvikila ondjovo yoye,
ndele va diinina ehangano loye.
10 Vo otava ka longa Jakob eenghedimhango doye,
naIsrael omhango yoye.
Vo otava ka tula po moipafi yoye oitwiminifo
nokoaltari yoye ouyadiyambo.
11 Omwene, eenghono daye di nangeka noupuna,
oshilonga shomake aye nashi ku wapalele.
Nyanyaula po omatundji ovatondadi voye,
ava tave mu twile ondubo, vo opo vaha shiive okuyambuka po.”
12 Okwa tonga Benjamin, ndele ta ti:
“Omuholike wOmwene ta ka kala e nombili puye.
Ye ote mu amene mefiku alishe
ndele ta ka kala pokati keemhunda daye.”
13 Mokutonga kuJosef, ye ota ti:
“Omwene na nangeke noupuna edu laye
neeshali diwa di nondilo tadi di keulu,
nomume nomevakungulukilo meedjo,
14 noiimati iwa tai imifwa ketango,
noupuna tau etwa po komalunduluko ohani,
15 noinima iwa tai di meemhunda donale
neeshali doupuna woikulundudu yaalushe,
16 neeshali doupuna domedu nouyadi walo
nohokwe yaau a kala moshixwa,
aishe ei nai kale komutwe waJosef
nokoluwewe lomupangeli mokati kovamwaina.
17 Eembinga doshiveli shongobe yaye yomhedi
di li ngaashi eembinga donyati.
Nado ye ta ka nata po oiwana,
heeno, aishe kumwe fiyo okominghulo dounyuni.
Ndele ava omayovi omulongo omuEfraim
naava omayovi omuManasse!”
18 Nokwa tonga Sebulon, ndele ta ti:
“Nyakukwa ove, Sebulon, mokufikama kwoye.
Naave Isaskar molwomatwali oye.
19 Vo otava ka ifana oiwana i ye komhunda yavo.
Oko vo otava ka yamba omayambo ouyuki.
Osheshi vo otava ka nyama oupuna wefuta
nomamona a holekwa meheke.”
20 Ndele a tonga Gad ta ti:
“Na hambelelwe ou a tandavelifa Gad.
Ye ote linangeke ngaashi onghoshi onghadi,
ndele tai toshola okwooko noluwewe.
21 Ndele ye e lihoololela oshitukulwa shiwa shedu
shi dule ikwao,
osheshi oko kwa li onhele yondjai.
Ndelenee ye okwe uya pamwe novakulunhu voshiwana
nokwa wanifa ouyuki wOmwene nomalombwelo aye naIsrael.”
22 Ndele ye a tonga Dan, ndele ta ti:
“Dan, oye onghoshi yonyasha
tai nhuka muBasan.”
23 Nokwa tonga Naftali, ndele ta ti:
“Naftali, ove owa kuta elao
wa yada enangeko noupuna lOmwene.
Na nangale hano efuta noshilongo shoumbangalanhu!”
24 Nokwa tonga Asser, ndele ta ti:
“Asser na nangekwe noupuna komesho yovana ovamati.
Na ninge omuholike wovamwaina vaye ovamati,
ndele oye ou ta tula omhadi yaye momahooli.
25 Oidilifo yoye oyo oshivela oshikushu,
neenghono doye di fike pomafiku oye.”
26 “Pehe na nande umwe e li ngaashi Kalunga kaJesurun,
ou ta ende pombada yeulu, Ye ekwafo loye
nomefimano laye ta ende kombada yoilemo.
27 Kalunga kaalushe Oye ehondameno loye,
ndele koshi omaoko aye aalushe tae ku papata.
Ndele Ye okwa taataa omutondadi komesho yoye
nokwa tile, mu hanauna po!
28 Osho ngaha hano Israel ta ka kala nombili.
Ofifiya yaJakob, ya tongoka mo,
medu li noilya nomaviinyu,
neulu laye yo tali eta omata omume.
29 Akutu Israel, oove omunelao! Olyelye e ku fa?
Oshiwana sha xupifwa kOmwene,
oshikelelifo shekwafo loye,
ou eongamukonda lounene woye,
onghee ovatondadi voye aveshe tave likoko
ndele tave liyandje mepangelo loye.
Ndelenee ove to ka enda koikulundu yavo.”
© Oshikwanyama Bible Revised © Bible Society of Namibia, 2008, 2012.
