Omwene Ye omunanghenda kwaava tava alukile kuye
1 “Ndele oinima aishe ei, ngeenge tai ya kombada yoye, nokutya enangeko noupuna netulomutima, oyo nde i tula komesho yoye, ndele ove to i tambula momwenyo woye mokati koiwana aishe oyo, oko Omwene Kalunga koye e ku tela ko, 2 ndele ove to alukile kOmwene Kalunga koye, ndele to pwilikine ondaka yaye ngaashi ame handi ku lombwele nena eli, ove novana voye, nomutima woye aushe nomwenyo woye aushe, 3 opo nee Omwene Kalunga koye ta ka lundulula okukala kwoye noku ku fila onghenda, ndele Ye ote ke ku ongela vali moiwana aishe omo Omwene Kalunga koye e ku halakanifila ko. 4 Ovahalakanifwa voye nande va kale kominghulo nominghulo dedu, oko Omwene Kalunga koye, te ke va ongela, ndele oko Ye te ke va alula. 5 NOmwene Kalunga ote ke ku eta mo medu la nangalwa kooxo, ndele nye otamu ke li nangala; ndele Ye ote ke mu ningila ouwa, noku mu hapupalifa mu dule ooxo. 6 NOmwene Kalunga koye ote ke ku pitifa etanda momutima woye, nomutima woludalo loye, opo u kale nokuhola Omwene Kalunga koye nomutima woye aushe nomwenyo woye aushe, opo u shiive okukala nomwenyo. 7 NOmwene Kalunga koye ota ka tula omatulomutima aa aeshe kovatondadi voye nokovanaita naave, ava ve ku taataa. 8 Ndelenee ove oto ka pwilikina vali ondaka yOmwene nokuwanifa oipango yaye aishe ei handi ku lombwele nena eli. 9 NOmwene Kalunga koye ote ku monifile ouwa tau xunga moilonga aishe yomake oye, moludalo loye nomoludalo leengobe nomoiimati yomepya. Osheshi Omwene ote ke ku hafela vali ngaashi a hafela ooxo, ndele te ku ningile ouwa, 10 ngeenge ove to pwilikine ondaka yOmwene Kalunga koye u diinine oipango yaye neenghedimhango daye odo da shangelwa membo lomhango ei. Ngeenge to alukile kOmwene Kalunga koye nomutima woye aushe nomwenyo woye aushe.
11 “Osheshi oshipango eshi handi shi ku lombwele nena eli, kashi fi shidjuu, ndele kashi li kokule. 12 Kashi li meulu, opo u tye ngeno: ‘Olyelye te tu londele ko keulu, ndele te ke shi tu talela ko, opo tu shi ude, tu shi wanife?’ 13 Kashi li kombada yefuta, opo u tye: ‘Olyelye te ke tu taulukila efuta, ndele te ke shi tu talela ko, opo tu shi ude, tu shi wanife?’ 14 Ndelenee ondjovo oi li popepi naave unene, mokanya koye nomomutima woye, opo u i wanife.
15 “Tala, onena eli nda tula omwenyo nelao, efyo nomupya moipafi yoye. 16 Eshi handi ku lombwele nena eli: okuhola Omwene Kalunga koye, nokweenda neendjila daye nokudiinina oipango yaye nomalombwelo aye neenghedimhango daye, opo u shiive okukala nomwenyo nokuhapupala, nOmwene Kalunga koye opo e ku nangeke noupuna moshilongo omo to i, u ke shi nangale. 17 Ndelenee omutima woye ngeenge tau pilamene ko, ndele ito pwilikine ndele to liefele okuhongaulwa u linyongamene koikalunga imwe, ndele to i longele, 18 opo nee handi mu vilikile nena eli nokutya, otamu hanaunwa po shili. Itamu ka hapupalifa omafiku moshilongo omo tamu ka ya mo nokutauluka Jordan, opo mu ke shi nangale. 19 Ame ohandi ifana eulu nedu li ninge nena eli eendobwedi oku mu vela ombedi. Onde mu hololela omwenyo nefyo, enangeko noupuna netulomutima. Hoololeni hano omwenyo, mu shiive okukala nomwenyo, nye noludalo leni, 20 ngeenge omu hole Omwene Kalunga keni nokupwilikina ondaka yaye nokukanyatela muye. Osheshi osho oukalimwenyo woye noule womafiku oye, opo u shiive okukala moshilongo osho Omwene a udanekela ooxo Abraham, Isak naJakob nokwaana, Ye e shi va pe.”
© Oshikwanyama Bible Revised © Bible Society of Namibia, 2008, 2012.
