Oivilo inene yomudo
1 “Dimbulukwa ohani Abib, u dane Opaasa okufimanekifa Omwene Kalunga koye. Osheshi mohani yaAbib Omwene Kalunga koye e ku pitifa mo muEgipiti. 2 Ndele ove u nokutomena Omwene Kalunga koye eedi neengobe monhele tuu oyo Omwene ta ka hoolola, edina laye opo li kale ko. 3 Ino lya nayo omungome u nonhafi. Omafiku aheyali u nokulya nayo omungome woluhepo, osheshi oduduluka nokweendelela mwa li mu nokudja mo medu laEgipiti, u dimbulukwe alushe okudja mo kwoye medu laEgipiti. 4 Ndele momafiku aheyali moshilongo sheni ashishe muha monike nande olumbololo lomungome u nonhafi, ndele eshi to shi tomo mefiku lotete, ino shi xupifila mongula. 5 Eyambo laPaasa ino li dipaa poivelo yoilando oyo Omwene Kalunga koye te i ku pe. 6 Ndelenee monhele tuu oyo Omwene Kalunga koye ta hoolola, opo edina laye li kale ko, oko u nokudipaa eyambo laPaasa, onguloshi etango eshi tali ningine, efimbo naanaa linya wa dja mo muEgipiti. 7 Opo nee ove u noku i teleka noku i lya monhele oyo Omwene Kalunga koye ta ka hoolola. Opo nee ongula mu nokufikama nokuya komatwali eni. 8 Omafiku ahamano u nokulya omungome uhe nonhafi, ndele mefiku etiheyali oku na oshivilo shOmwene Kalunga koye. Opo nee inamu longa sha.
9 “Vala oivike iheyali okudja kefiku olo oshikashulifo tashi kashula oilya u nokuhovela okuvala oivike iheyali, 10 opo nee ove u nokudana oshivilo shoshivike okufimanekifa Omwene Kalunga koye, nokweeta eeshaliyambo edi diwa domake oye paenghono denangeko noupuna lOmwene Kalunga koye, 11 ndele ove u nokunyakukwa koshipala shOmwene Kalunga koye, ove nomona woye omumati nomona woye okakadona nomupika woye omulumenhu nomukainhu nOmulevi ou e li peenhu doye nomunailongo nofiye nomufiyekadi, ava ve li pwoove, monhele tuu oyo Omwene Kalunga koye ta ka hoolola, opo edina laye li kale ko. 12 Ndele u nokudimbulukwa nokutya, ove wa li omupika muEgipiti. Neenghedimhango edi u noku di diinina shili.
13 “Oshivilo shomatwali u noku shi dana omafiku aheyali, fimbo to tuvikile oilya yomoshipale shoye, omaviinyu omoshikolelo shoye. 14 Ndele ove u nokunyakukwa moshivilo shoye, oove mwene nomona woye omumati nomona woye okakadona nomupika woye omulumenhu nomukainhu, nOmulevi nomunailongo nofiye nomufiyekadi, ava ve li peenhu doye. 15 Omafiku aheyali u nokudanena Omwene Kalunga koye oshivilo monhele tuu oyo Omwene Kalunga koye te ke i hoolola. Osheshi Omwene Kalunga koye, te ke ku nangeka noupuna mwaashishe to shi teya nomoilonga aishe yomake oye. Onghee hano kala ashike nokunyakukwa.
16 “Lutatu momudo keshe ovalumenhu voye aveshe ve nokuholoka koshipala shOmwene Kalunga koye monhele tuu oyo Ye e nokuhoolola: koshivilo shomungome uhe nonhafi nokoshivilo shoshivike nokoshivilo shomatwali. Ndele vo vehe uye hamakasha koshipala shOmwene. 17 Keshe umwe na ete paenghono denangeko noupuna lOmwene Kalunga kaye, ngaashi Ye e mu pa.
Ovatokoli veendjovo novapangeli
18 “Ovatokoli veendjovo novapashukili mu noku ve linangekela meenhu doilando yoye aishe, oyo to i pewa kOmwene Kalunga koye pamapata oye, ndele vo ve nokuyukifa eendjovo dovanhu payuki. 19 Ouyuki ino u endameka. Ino tala oshipala shomunhu. Ino tambula ombubo, osheshi ombubo otai twikifa omesho ovanongo ndele tai endameke eendjovo dovanhu vehe noushima. 20 Ouyuki, heeno, ouyuki ove u noku u lalakanena, opo u shiive okukala u nomwenyo nokunangala oshilongo, eshi Omwene Kalunga koye te ke shi ku pa.
21 “Ino lidikila omalupwelele ile oiti yoshikalunga Asera ponho yoaltari yOmwene Kalunga koye. 22 Ino lidikila ongudimanya, ei tai tondwa kOmwene Kalunga koye.
© Oshikwanyama Bible Revised © Bible Society of Namibia, 2008, 2012.
