Etwikilo leendjovo daMoses
1 “Onghee hano u nokuhola Omwene Kalunga koye nokudiinina alushe omayukifo aye neenghedimhango daye nomalombwelo aye noipango yaye. 2 Ndele kaleni mu shi shii, ame itandi lombwele nena ovana veni, ava inava shiiva omalongo Omwene Kalunga keni, ndele inava mona ounene waye, neenghono daye nokwooko kwaye kwa yeluka, 3 nomadidiliko aye noilonga yaye oyo e i ningila Farao, ohamba yaEgipiti noshilongo ashishe shaEgipiti, 4 naashi Ye e shi ningila omatanga oita yaEgipiti, eenghambe daye nomatemba aye oita, eshi e va fifa omeva mEfuta Litilyana, eshi va li tave mu shikula, onghee hano Omwene e va hanauna po fiyo onena, 5 ndele Ye eshi e mu ningila mombuwa fiyo mwa fika monhele ei, 6 naashi e shi ningila Datan naAbiram, ovana ovamati vaEliab yaRuben, edu nhumbi la makula okanya kalo, ndele lo mokati kaIsrael ole va pona po pamwe nomaumbo avo nomatwali avo novanamwenyo aveshe va li ko, ve va shikula. 7 Ndelenee omesho eni a mona oilonga aishe ei Omwene e i longele.
8 “Diinineni hano oipango aishe ei handi mu lombwele nena eli, opo mu kale mwa pama, mu ye moshilongo musho tamu i mu ke shi nangale, 9 ndele mu shiive okuhapupalifa omafiku eni moshilongo, Omwene e shi udanekela nokwaanena ooxo, e shi va pe noludalo lavo, oshilongo shi yadi omashini nomaadi eenyiki. 10 Osheshi oshilongo omo tamu i mu ke shi nangale, kashi li ngaashi oshilongo shaEgipiti, omo mwa dja, omo ngeenge mwa kuna eembuto deni, mwa li mu noku di tekela ngaashi oshikunino sheembidi noku di tekelifa okuulu kwomeva, we ku lyatifa omhadi yoye. 11 Ndelenee edu olo tamu i mu ke li nangale, olo edu leemhunda nolomafilu tali tutikwa kodula yokeulu, 12 edu tali kalelwa noshisho kOmwene Kalunga koye. Nomesho Omwene Kalunga koye tae li tale efimbo alishe okehovelo lomudo fiyo okexulilo lomudo. 13 Hano nye ngeenge tamu pwilikine nawa oipango yange ei ame handi mu lombwele nena eli, mu kale nokuhola Omwene Kalunga keni noku mu longela nomutima weni aushe nomwenyo weni aushe, 14 opo nee Ame ohandi ka lokifila edu leni odula pefimbo la wapala, odula yonhemuna nodula yokufu, opo mu shiive okutuvikila oilya, nomaviinyu nomaadi eni. 15 Ndele Ame ohandi ka yandja koimuna yeni omwiidi womoixwa, ndele tamu ka lya nokukuta. 16 Lungameni, omitima deni diha pukifwe, mu liteeke nokufimaneka oikalunga imwe noku i longela noku i linyongamena, 17 nehandu lOmwene tali mu xwamene ndele ta idile po eulu, paha kale odula, nedu itali yandje oimeno ndele tamu ka pwa mo diva medu liwa, Omwene te li mu pe. 18 Eendjovo edi dange di tuvikileni momitima deni nomeemwenyo deni, di mangeni ngaashi edidiliko momake eni, ndele nadi kale ngaashi omunghapyawa pokati kombaba yoshipala, 19 ndele u noku di longa ovana voye moku di tonga ove nongeenge to kala omutumba meumbo loye, nongeenge u li mondjila, ngeenge to ka nangala ngeenge to ka penduka. 20 Di shanga poivelo yeumbo loye noponhu yoye, 21 opo omafiku okukala kweni novana veni a hapupale moshilongo osho Omwene e shi udanekela ooxo nokwa ana oku shi va pa, shimha ashike eulu li li pombada yedu.
22 “Osheshi nye ngeenge tamu diinine shili oipango aishe ei ame handi mu lombwele mu i wanife nokuhola Omwene Kalunga keni, nokweenda neendjila daye adishe nokukanyatela muye, 23 opo nee Omwene ota ka taataa po oiwana aishe ei komesho yeni. Ndele nye otamu ka taataa mo moilongo yayo oiwana inene i neenghono di dule deni. 24 Okanhele keshe eemhadi deni tadi ka lyata mo, otaka ningi keni; okudja kombuwa puLibanon, komulonga Eufrat fiyo okEfuta Lopokati kouninginino tali ka ninga oshipangelwa sheni. 25 Nande umwe ta dulu okulipopila moipafi yeni. Omwene Kalunga keni ota ka tuma kombada yedu alishe mulo tamu ka ya, ehaluko netilo oku mu tila, ngaashi Ye e mu udanekela. 26 Taleni, onena eli Ame nda tula pomesho yeni enangeko noupuna nefingo; 27 Enangeko noupuna nye ngeenge tamu dulika koipango yOmwene Kalunga keni, ei ame ohandi mu lombwele nena eli, 28 nefingo, nye ngeenge itamu dulika koipango yOmwene Kalunga keni, ndele tamu kanduka mo mondjila tuu ei ame handi i mu lombwele nena eli, ndele tamu shikula oikalunga imwe, ei inai shiivika kunye.
29 “Hano Omwene Kalunga keni ngeenge te mu twala mo moshilongo omo tamu i mu ke shi nangale, nye mu nokutula enangeko noupuna komhunda yaGerisim, nefingo komhunda yaEbal. 30 Do odi li langhele kwinya kombada yaJordan, pondjila yokouninginino, moshilongo shOvakaanan, ava hava kala medu la lalakana la shaama naGilgal, popepi nomyandi daMore. 31 Osheshi nye otamu tauluka Jordan mu ka nangale oshilongo, Omwene Kalunga keni te ke shi mu pa. Nye otamu ke shi nangala nokukala mo. 32 Diinineni hano shili eenghedimhango adishe nomalombwelo aa handi mu lombwele nena eli.
© Oshikwanyama Bible Revised © Bible Society of Namibia, 2008, 2012.
