1 Oovene nye, yandjeni kovapiya veni eshi sha yuka naashi she va yeleka, osheshi omu shi shii, nanye yo omu na Omwene meulu.
Ilikaneni nokupashuka
2 Diinineni mokwiilikana nokukala mo oupafi nokupandula, 3 noku tu ilikanena yo, opo Kalunga e tu yeululile oshivelo shondjovo tu popye oshiholekwa shaKristus omolwaasho nda mangwa yo, 4 ndi shi holole ngaashi nda pewa ndi shi popye.
5 Mokweendafana naava ve li pondje kaleni mu neendunge nokukoneka efimbo liwa. 6 Eendjovo deni nadi kale alushe donghenda, da fingala omongwa, nye mu kale mu shi shii nhumbi mu nokunyamukula keshe umwe.
Omakundifo
7 Tikikus, omumwatate omuholike, omulongi omudiinini nomupiya mukwetu mOmwene, oye te mu hepaululile nhumbi ndi li. 8 Oye tuu handi mu tumu kunye, opo a shiive nhumbi mu li, ye a hekeleke omitima deni. 9 Oye pamwe naOnesimus, omumwatate omudiinini nomuholike, ou omukweni, otave mu hepaululile ashishe eshi shi li oku.
10 Aristarkus, onakumangwa mukwetu, ote mu kundifa, naMarkus, omukwao waBarnabas, oye ou mwe mu lombwelwa mu mu tambule, ngeenge te uya kunye, 11 naJesus ou ha ifanwa Justus, ovo vomepitotanda. Vo aveke ove li ovalongi vakwetu molwouhamba waKalunga, ovo nova hekeleka nge.
12 NaEpafras, omukweni, omupiya waKristus Jesus, ote mu kundile po yo, oye ou he mu kondjele alushe momailikano aye, opo mu kale mwa fikama mwa wana nomwa pama mehalo alishe laKalunga. 13 Osheshi ame ohandi mu hepaulile, oye e na shili ouladi molweni nomolwaava vomuLaodikea novomuHierapolis. 14 Otamu kundilwa po kuLukas, omuhakuli omuholike nokuDemas.
15 Kundileni po ovamwatate vomuLaodikea, naNimfas neongalo hali ongala meumbo laye. 16 Onhumwafo ei ngeenge ya leshwa kunye, i tumeni i ka leshwe nomeongalo lomuLaodikea, nye mu leshe yo ei tai di kuLaodikea. 17 Ndele lombweleni Arkippus: Diinina eyakulolonga eli we li pewa kOmwene, u li wanife shili.
18 Ekundifo kwaame, Paulus, neke lange mwene. Dimbulukweni omalyenge ange. Efilonghenda nali kale nanye. Amen.
© Oshikwanyama Bible Revised © Bible Society of Namibia, 2008, 2012.
