Paulus muMakedonia nomuTroas
1 Ndele euyaano olo eshi la mwena, Paulus okwa ifana ovalongwa, ndele eshi e va lombwela eendjovo dehekeleko, okwe va lekela ndele ta di po, ta i kuMakedonia. 2 Ndele eshi a tokola oikandjo aishe, ndele e va lombwela eendjovo dihapu domakumaido, okwe uya kuGreka. 3 Ndele okwa ninga ko eehani nhatu, nokwa hala a ka konde a ye kuSiria. NOvajuda eshi ve mu nangela, ye okwa tokola a shune nokupitila muMakedonia. 4 Ndele ovalumenhu ava va enda pamwe naye, ovo: Omuberea Sopater yaPirrus, nOvatessalonika Aristarkus naSekundus, Omuderbe Gaius, naTimoteus, novokuAsia: Tikikus naTrofimus. 5 Ovo ve tu tetekela, ndele ve tu teelela muTroas. 6 Ndele fye twa yauka okudja kuFilippi omafiku omungome munyenye eshi a pita, mefiku etitano otwe uya kuvo muTroas, omo twa menekela omafiku aheyali.
Paulus ta nyumuna Eutikus
7 Ndele mefiku lotete loshivike, eshi twa li twa ongalela okutukula omungome, naPaulus ou a hala oku ka enda mefiku lomongula okwa popya navo, neendjovo daye okwe di twikila fiyo opokati koufiku. 8 Ndele mondjuwo yopombada omo twa li twa ongalela, omwa li mu neelamba dihapu. 9 Ndele omunyasha umwe, edina laye Eutikus, okwa li omutumba pekende, okwa lolokela po keemhofi, Paulus eshi a popya efimbo lile, nomokukumuka okwa wa kondjuwo onhinhatu yokombada nokwa toolwa po a fya. 10 Opo nee Paulus okwa londolokela poshi, te liwilike kuye, e mu papatela ndele ta ti: “Inamu piyaana, omwenyo waye omo u li muye.” 11 Ndele ye okwa londa ko vali, ndele ta tukula omungome, ndele ta li, nokwa twikila okupopya fiyo eluwa la tenda, ndele ye ta i. 12 Ndele omumati ou ove mu twala keumbo e nomwenyo, ndele va hekelekwa unene.
Paulus muMileto
13 Ndele fye otwa li twa tetekela okuya moskepa notwa ya kuAsso, tu ka pitule ko Paulus, osheshi oye e shi tu lombwela ye mwene kutya okwa hala okweenda kolupadi. 14 Hano eshi twa shakena naye muAsso, otwe mu tambula moskepa, ndele twa ya kuMitilene. 15 Ndele mokudja oko mefiku lomongula twa fika opo twa shaama naKios, nefiku la shikula otwe uya kuSamos, ndele twa kala muTrogillium, ndele mefiku likwao otwe uya kuMileto. 16 Osheshi Paulus okwa tokola okupitilila Efeso, aha manene efimbo muAsia, osheshi okwa li ta endelele, a ka kale ngeno kuJerusalem mefiku laPentekoste.
Oshiongalele shovakulunhu muMileto
17 Ndele muMileto okwa tuma kuEfeso, ndele ta ifana kuye ovakulunhu veongalo. 18 Ndele vo eshi ve uya kuye, okwa tya kuvo: “Nye omu shi shii okudja kefiku lotete eshi nda lyata eemhadi dange muAsia, nhumbi nda kala punye efimbo alishe, 19 nhumbi nda li nda longela Omwene nelininipiko alishe nomahodi nomokushindwa kwa dila nge momanangelo Ovajuda; 20 nonhumbi nda li inandi fya ounye oku mu lombwela keshe tuu osho sha wapala noku mu longa povanhu nomomaumbo 21 fimbo nda hepaululila Ovajuda nOvagreka, ve nokulidilulula nokwaalukila kuKalunga nokwiitavela Omwene wetu Jesus Kristus. 22 Ndele taleni, paife ohandi i kuJerusalem nda mangwa momhepo yange, ndele ame nghi shii eshi tashi ka hanga nge kwinya. 23 Shimwe ashike ndi shi shii, okoilando aishe, Omhepo Iyapuki ota hepaululile nge ndele ta ti: eemhango nomahepeko taa teelele nge kwinya. 24 Ndele ame kombinga yange nghi na nasho komwenyo wange, shamha tuu handi wanifa nehafo okweenda kwange noshilonga eshi nde shi pewa kOmwene Jesus, ndi hepaululile evaengeli longhenda yaKalunga.
25 “Ndele taleni, paife ondi shi shii, nye itamu mono vali oshipala shange, nye amushe ava nda endaenda mokati keni nonda udifa ouhamba waKalunga. 26 Onghee hano ohandi mu hepaulile efiku eli lonena, ame ndihe netimba nande olohonde yomunhu. 27 Osheshi ame inandi fiya po sha, ndelenee onde mu udifila omhangela aishe yexupifo laKalunga. 28 Litaleni hano nye vene, nye mu pashukile oshuunda ashishe, omo mwa nangekwa kOmhepo Iyapuki, eshi e mu ninga ovafita vokulifa eongalo laKalunga, e li lilikolela nohonde yaye mwene. 29 Osheshi ame ondi shi shii, ngeenge nda di po, omambungu haa lyana otae uya ndele taa pumine mokati keni, nao kae na nande onghenda noshuunda.
30 “Heeno, munye tamu di yo ovalumenhu tava popi oinima inai yuka, ve lishilile ovalongwa. 31 Onghee hano pashukeni nye mu dimbulukwe, nhumbi nda ninga eedula nhatu eshi nda kumaida nomahodi keshe umwe womunye oufiku nomutenya.
32 “Ndele paife ame ohandi mu yandje kuKalunga nokeendjovo donghenda yaye. Oye e neenghono oku mu pa efyuululo pamwe naavenya aveshe va yapulwa. 33 Ame inandi konga oshisiliveli noshingoldo ile oikutu yovanhu. 34 Ndelenee nye vene omu shi shii, omake aa ange okwa wanifa eemhumbwe dange nodavakwetu. 35 Moinima aishe onde mu ulikila, osho ngaha tu nokulonga nokukwafa oingone nokudimbulukwa eendjovo dOmwene Jesus e di popya Ye mwene: ‘Okuyandja oku nelao komesho yokutambula.’ ”
36 Ndele eshi a li ta popi ngaha okwa twa eengolo, ndele ta ilikana pamwe navo aveshe. 37 Ndele vo aveshe ova lila nokulililila nova dingatela kofingo yaPaulus, ndele ve mu fipa komilungu, 38 unene ova lilila eendjovo, eshi a tile: vo itava mono vali oshipala shaye. Ndele vo ove mu findikila koskepa.
© Oshikwanyama Bible Revised © Bible Society of Namibia, 2008, 2012.
