Paulus Barnabas tava tumwa kuJerusalem
1 Ndele muJudea omwa dja vamwe ve uya oku, vo ova longa ovamwatate tava ti: “Ngeenge itamu piti etanda panghedi yaMoses, itamu dulu okuxupifwa.” 2 Hano eshi pwa holoka eenhamanana, Paulus naBarnabas va patafana navo, opa pangelwa omhangela nokutya, Paulus naBarnabas noovakwao vamwe vomokati kavo nava ye kovayapostoli nokovakulunhu kuJerusalem omolwepulo olo la twilwa eemhata.
3 Ndele vo ova findikilwa keongalo ndele va pitila muFoinikia nomuSamaria omo va hepaulula elidilululo lovapaani, nova hafifa ovamwatate. 4 Ndele eshi va fika muJerusalem, ova kundwa keongalo nokovayapostoli nokovakulunhu, nove va hepaululila oilonga aishe ya longwa kuKalunga, eshi a li pamwe navo. 5 Ndele vamwe vomoshimhanga shOvafarisai, ovo va li va ninga ovaitaveli, ova fikama ndele tava ti: “Vo ove nokupita etanda nokulombwelwa va diinine omhango yaMoses.”
Oshiongalele shovayapostoli muJerusalem
6 Ndele ovayapostoli novakulunhu ova ongala, va ka kundafane oshinima eshi. 7 Ndele eemhata eshi da ya pombada, Petrus okwa kala ofika ndele ta ti kuvo: “Ovalumenhu nye ovamwatate, nye omu shi shii, momafiku onale Kalunga a hoolola mokati ketu okanya kange, opo ovapaani va ude evaengeli, ndele va ninge ovaitaveli. 8 Ndele Kalunga omushiivi womitima, okwe va hepaulula nawa eshi e va pa Omhepo Iyapuki ngaashi nafye yo. 9 Ndele Ye ina ninga nande etongolo pokati ketu navo, eshi a yelifa omitima davo neitavelo. 10 Hano paife oshike tamu shindi Kalunga, eshi mwa hala okutwika keefingo dovalongwa ondjoko ya li ya nyenga ootate nafye yo noku i humbata. 11 Ndelenee twa itavela hatu ka xupifwa konghenda yOmwene Jesus, ngaashi venya yo.”
12 Ndele oshiongalele ashishe osha mwena ndele ova pwilikina Paulus naBarnabas, eshi va hepaulula omadidilikolonga noikumwifalonga opo i fike, Kalunga e i va longifa mokati kovapaani. 13 Ndele eshi va dimbuka okupopya, Jakob ta ti: “Ovalumenhu nye ovamwatate, pwilikinei nge. 14 Simeon okwa hepaulula Kalunga nhumbi a ninga eshi a hovela okulilikolelela edina laye mwene oshiwana movapaani. 15 Ndele eshi osha twa kumwe neendjovo dovaxunganeki, osheshi opa shangwa ngaha:
16 ‘Konima yaai Ame ohandi aluka vali,
ndele handi ka tungulula onduda yaDavid, ya teka po,
Ame ohandi i tungulula,
noikulukuma yayo ohandi i dikulula,
17 opo oixupe yovanhu va konge Omwene
novapaani aveshe venya va ifanenwa edina lange,
Omwene tuu ou ta ningi aishe ei, osho ta ti.
18 Kalunga okwa shiiva oilonga yaye aishe
okehovelo lomafimbo ounyuni.’ ”
19 Onghee hano omadiladilo ange oyaa: “Ava vomoupaani, ngeenge tava alukile kuKalunga, inava twikwa oudjuu, 20 ndele nava ka shangelwe okulidilika kutya, vo ove nokulidilika ei ya kwatafana nonyata yoikalunga nohole yoipala nombelela ya fya oshuunguungu nohonde. 21 Osheshi Moses e novaudifi vaye noshito nale omoilando aishe, ngaashi omishangwa daye tadi leshwa meeshinagoga omashabata aeshe.”
Etokolo lomhangela yovayapostoli
22 Ndele ovayapostoli novakulunhu pamwe neongalo alishe ova udafana okuhoolola mokati kavo ovalumenhu, ve va tume kuAntiokia pamwe naPaulus naBarnabas, ovo ava: Judas, ou a ifanwa yo Barsabas, naSilas, ovo ovalumenhu va fimana mokati kovamwatate. 23 Ndele ve va shangela omushangwa tau ti ngaha: “Ofye ovayapostoli novakulunhu, ovamwaxo, ohatu mu kundu, onye ovamwatate vomovapaani omuAntiokia nomuSiria nomuKilikia. 24 Ofye eshi twa uda vamwe vomufye va ya, nande inatu va lombwela, nove mu limbilika neendjovo davo nove mu twika oudjuu keemwenyo deni nokutya, mu nokupita etanda nokudiinina omhango. 25 Hano omadiladilo etu eshi a ya kumwe, otwa udafana okuhoolola mo ovalumenhu tu va tume kunye pamwe novaholike vetu Barnabas naPaulus; 26 ovava va yandjela edina lOmwene Jesus Kristus eemwenyo davo. 27 Hano osho ngaha twa tuma Judas naSilas, ovo tave mu shiivifile oinima ei nomakanya avo. 28 Osheshi omhangela yOmhepo Iyapuki noyetu yo oyo ei, muha twikwe nande omutengi umwe. Oyo tuu ei aike ihe shii okweefiwa: 29 Nye mu lidilike keshe eshi sha yambelwa oikalunga, nohonde nombelela ya fya oshuunguungu, nohole yoipala. Ngeenge tamu yepa ei, otamu ningi nawa. Kaleni nawa!”
Ovaantiokia otava hafele etokolo eli
30 Osho hano va lekelwa, va ya kuAntiokia, ndele tava shivi eongalo nove li pa onhumwafo ei. 31 Ndele ava eshi ve i lesha, ova hafela ehekeleko eli. 32 Ndele Judas naSilas, osheshi ovo vene yo va li ovaxunganeki, ova kumaida ovamwatate neendjovo dihapu, nove va twa ouladi. 33 Ndele eshi va ninga mo omafiku, ovamwatate ove va lekela nombili, va ka shune kovatumi vavo. 34 Ndele Silas okwa tokola okukala puvo. 35 Ndele Paulus naBarnabas ova kala muAntiokia pamwe navamwe vahapu, tava longo ndele tava udifa eendjovo devaengeli lOmwene.
Paulus ta hovele olweendo laye olutivali letumo
36 Ndele eshi pa pita omafiku, Paulus okwa lombwela Barnabas: “Tu yeni, tu shuneni koilando inya aishe, twa li twa udifila mo eendjovo dOmwene, tu ka tale ovamwatate nhumbi ve li.” 37 Opo nee Barnabas a hala okukufa Johannes, ou a lukwa Markus, va ye naye. 38 Ndelenee Paulus okwa diladila, inashi wapala okweenda pamwe naye, osheshi ye okwa li e ve liteeka muPamfilia nokwa anya okuya navo moshilonga. 39 Ndele ova handuka, ndele tava dukauka, Barnabas okwa kufa Markus nokwa yauka efuta ta i kuKipro. 40 Ndelenee Paulus okwa hoolola Silas. Ovamwatate eshi ve mu yandja monghenda yOmwene, okwa ya. 41 Ndele ye okwa pitila muSiria nomuKilikia nokwa pameka omaongalo.
© Oshikwanyama Bible Revised © Bible Society of Namibia, 2008, 2012.
