Paulus naBarnabas tava udifa muIkonium nomuListra
1 Ndele osho sha ningwa yo muIkonium; vo ova ya moshinagoga yOvajuda nova udifa neenghono, nongudu inene yOvajuda noyOvagreka oya ninga ovaitaveli. 2 Ndele Ovajuda ava inava itavela, ova hongaifa ovapaani ndele va twifa ondubo ovamwatate. 3 Ndele vo ova ningile ko omafiku tava udifa nouladi mokulineekela Omwene, ou a pameka eendjovo donghenda yaye, eshi a longifa omake avo omadidilikolonga noikumwifalonga. 4 Ndele ovanhu vomoshilando ova tukauka, vamwe va ama kOvajuda, vamwe okovayapostoli.
5 Ndelenee ovapaani nOvajuda pamwe novakulunhu vavo ova pangela omhangela oku va hepeka noku va dipaa nomamanya, 6 opo nee vo eshi ve shi koneka, ova ya onhapo koilando ei yaLikaonia, omuListra omuDerbe nomoushiinda wayo. 7 Ndele oko va udifila evaengeli.
Ovayapostoli tava i kuDerbe
8 Ndele muListra omwa li mu nomulumenhu a kala omutumba, osheshi ye a li ehe neenghono momaulu aye, ye okwa dalwa oshingudu, ina enda nande. 9 Ye okwa pwilikina eendjovo daPaulus. Paulus eshi e mu tala, ndele oku wete kutya, oku na eitavelo okuvelulwa, 10 okwe mu lombwela nondaka inene: “Kala ofika neemhadi doye!” Opo nee ye a yambuka po ndele ta ende. 11 Ndele ongudu eshi ya mona eshi sha ningwa kuPaulus, oya yelula ondaka pombada, ya popya Oshilikaonia, tai ti: “Ookalunga ove lifefa ovanhu nove uya kufye.” 12 Ndele vo ova luka Barnabas Zeus, naPaulus oHermes, osheshi oye a li ta popi. 13 Nomupristeli waZeus, otembeli yaye oya kala popepi noshilando, nokwa eta eehove noidingwa yeenhemo poivelo, ve nongudu yovanhu va hala oku va yambela. 14 Ndelenee ovayapostoli Paulus naBarnabas, eshi ve di uda, ova pombaula oikutu yavo, tava tondokele mokati kovanhu nokwiingida, 15 tava ti: “Ovalumenhu nye, oshike tamu ningile ngaha? Nafye yo ovanhu ngaashi nye, ndele hatu mu udifile evaengeli, opo mu lidilulule, nye mu efe oikalunga ei yongaho, nye mu alukile kuKalunga omunamwenyo ou a shita eulu nedu, nefuta nakeshe eshi shi li mo. 16 Omounyuni wonale okwa efa oiwana aishe i ende neendjila dayo vene. 17 Nande Ye ina kala nande ine liholola, osheshi okwe mu monifila ouwa, eshi e mu lokifila odula meulu nokwe mu pa omafimbo oshishipo nokwa yadifa omitima deni oipalwifa nehafo.” 18 Ndele mokupopya oinima ei ova kelela eengudu dovanhu noudjuu, vehe va yambele.
19 Ndele omwe uya Ovajuda, va dja kuAntiokia nokuIkonium, vo ove lishilila ongudu yovanhu, ndele va kupula Paulus nomamanya ndele ove mu kokolola mo moshilando, nova li ve shii okwa fya. 20 Ndelenee ovalongwa eshi ve mu ongalela, ye okwa penduka po, ndele okwa ya moshilando. Nefiku lomongula okwa ya kuDerbe pamwe naBarnabas.
Ovayapostoli tava shuna kuAntiokia
21 Ndele vo eshi va udifila moshilando shinya evaengeli, naashi va likola ko ovalongwa vahapu, ova shuna kuListra nokuIkonium nokuAntiokia. 22 Ndele ova pameka eemwenyo dovalongwa, ndele ve va kumaida okudiinina eitavelo, tava ti: “Mokuya mouhamba waKalunga otu nokupitila moudjuu uhapu.” 23 Ndele eshi ve va hoololela ovakulunhu meongalo keshe, mokwiilikana nomokulidilika eendja ove va yandja kOmwene ou ve mu itavela.
24 Ndele eshi va pitila muPisidia ova ya kuPamfilia, 25 ndele eshi va udifa eendjovo muPerge, ova ya kuAtalia. 26 Ndele oko nee va yauka nova ya kuAntiokia, oko va dile va lekelwa nonghenda yaKalunga, va ka longe oshilonga eshi ve shi wanifa.
27 Ndele eshi va fika ko, ova ifana eongalo, ndele tave li hepaululile oilonga opo i fike Kalunga e i longa, eshi Ye a kala pamwe navo, nonhumbi a yeululila ovapaani oshivelo sheitavelo. 28 Ndele vo ova menekela mo omafiku pamwe novalongwa.
© Oshikwanyama Bible Revised © Bible Society of Namibia, 2008, 2012.
