Ekulukuto laSeba
1 Ndele omukolokoshi umwe a holokela ko, edina laye Sheba yaBikri, Omukwabenjamin. Ye okwa shika enghuma loluvinga lodi yomhedi ndele ta ti:
“Fye katu noshitukulwa muDavid,
ndele katu noshitukulwafyuululwa momona waIsai;
akutu Israel, keshe umwe na ye ketwali laye!”
2 Opo nee ovalumenhu aveshe vaIsrael va dja po puDavid, va shikula Sheba yaBikri. Ndelenee ovalumenhu vaJuda va kanyatela kohamba yavo okudja kuJordan fiyo okuJerusalem.
3 David eshi e uya mouhamba waye muJerusalem, ohamba oya kufa ovalikadi venya omulongo vopomunghulo ovo ye va fiile po va kelele eumbo, ndele yo ye va tula mongulu tai nangelwa ndele ye va palula, ndele inai ya mo kuvo. Ndele vo ova idililwa mo fiyo okefiku lefyo lavo ngaashi ovafiyekadi tave likalele fiyo okokufya.
4 Opo nee ohamba tai ti kuAmasa: “Ifanene nge ovalumenhu Ovajuda va ongale omafiku atatu fimbo inaa pita. Naave mwene yo u kale po apa.” 5 Ndele Amasa okwa ya a ka ifane Ovajuda va ongale, ndelenee ye okwa li a kala ko a pitifa po efimbo la udafanwa. 6 Opo nee David a lombwela Abisai: “Paife Sheba yaBikri te tu ningile owii uhapu u dule waAbsalom. Kufa ovapiya vomwene woye, u mu shikule, opo ye aha kwate oilando i neehotekuma, ndele ta kolola mo omesho etu.” 7 Novalumenhu vaJoab nOvakereti nOvapleti novakwanyati aveshe va shikula Abisai. Vo ova dja muJerusalem va ka shikule Sheba yaBikri. 8 Fimbo vo va li pemanya lakula olo li li puGibeon, Amasa e va shakeneka. Ndele Joab okwa li a djala oshikutu shoita ndele kombada yasho ekwamo leongamukonda la mangwa moshiya shaye. Eongamukonda la li moshilaleko shalo, ndele ye eshi a fikama lo ola wa mo. 9 Ndele Joab ta ti kuAmasa: “Omukwetu, ou li tuu nawa?” Ndele okwa kwata neke lokolulyo eendjedi daAmasa e mu fipe komilungu, 10 ndele Amasa okwa li ina yavala eongamukonda la li meke laJoab. Opo nee ye te mu tu medimo, nomandjadja taa lopotokele poshi ye ine mu tuulula vali. Nokwa fya. Opo nee Joab nomumwaina waAbisai a shikula Sheba yaBikri. 11 Ndelenee omulumenhu umwe womovapiya vaJoab a fyaala po a kala ofika poshimhu shaAmasa ndele ta ti: “Ou a hokwa Joab ndele a ama kuDavid na shikule Joab!” 12 Ndele Amasa okwa nangala mohonde yaye mondjila. Ndelenee omulumenhu ou eshi a mona, nokutya ovakwaita aveshe va kanghama puye, ye okwa kufa Amasa mondjila, e mu kokololela moixwa nokwe mu uvika noshikutu, osheshi a mona keshe umwe ta ende po a kanghama puye. 13 Ye eshi e mu kufa mondjila, ovakwaita aveshe va pita po va shikula Joab, va ka taatae Sheba yaBikri.
14 Ndele Sheba okwa tauluka moitukulwalongo aishe yomapata aIsrael kuAbel naBet-Maaka; nOvaberim aveshe ova ongala ndele navo ve mu shikula. 15 Ndele ove uya ndele ve mu fitikinina muAbel-Bet-Maaka ndele mokulwifa oshilando va ndubila onduba ya hanga fiyo ohotekuma yotete. Fimbo ovakwaita aveshe vaJoab va li ve noupyakadi okuhanauna nokungumauna po ohotekuma, 16 omukainhu omunaendunge womoshilando ta ingida: “Pwilikineni, pwilikineni! Lombweleni Joab: ‘Ila oku, ndi dule okupopya naave.’ ” 17 Ndele ye eshi a ehena ko kuye, omukainhu ta ti: “Oove tuu Joab?” Ndele ye okwa nyamukula: “Heeno.” Ndele winya ta ti kuye: “Pwilikina eendjovo domupiya woye omukainhu.” Ndele ye ta nyamukula: “Ame ohandi pwilikine.” 18 Opo nee ye ta ti: “Shito va ika okutya: ‘Kongeni eendunge muAbel.’ Ndele osho va xulifa eendjovo. 19 Aame umwe womwaava ve hole ombili noudiinini muIsrael. Ndele wa hala okuhanauna po oshilando osho shi li ngaashi ina yomuIsrael: Omolwashike wa hala okunyonauna po oshitukulwafyuululwa shOmwene?” 20 Ndele Joab okwa nyamukula ta ti: “Nashi kale kokule naame, ame ndi hanaune po nokungumauna po! 21 Oshinima kashi li ngaha. Ndelenee omulumenhu umwe wokeemhunda daEfraim, edina laye Sheba yaBikri, okwa yelulila ohamba David eke laye. Mu yandjeni ashike, opo nee nda hala okudja po poshilando.” Nomukainhu ta ti kuJoab: “Tala, omutwe waye tau ke ku ekelwa kombada yekuma.” 22 Nomukainhu meendunge daye okwa popifa oonakukalamo aveshe ndele ova teta ko omutwe waSheba yaBikri ndele ve u ekela kuJoab. Opo nee ye a shika enghuma loluvinga lodi yomhedi ndele ve lihana po va dja po poshilando, keshe umwe a ya ketwali laye. Ndele Joab okwa shuna kohamba muJerusalem.
Omalenga aDavid
23 Ndele Joab okwa li ondjai yovakwaita aveshe vaIsrael. Ndele Benaja yaJehoiada okwa li omukulunhu wOvakereti nowOvapleti. 24 Ndele Adoram okwa li omupashukili wefendelo, naJosafat yaAhilud okwa li elenga ekulunhu. 25 Ndele Sheva okwa li omushangi naSadok naAbjatar va li ovapristeli. 26 Nosho yo Ira, Omujair, okwa li omupristeli puDavid.
© Oshikwanyama Bible Revised © Bible Society of Namibia, 2008, 2012.
