1 Simeon Petrus, omupiya nomuyapostoli waJesus Kristus,
okwaavo va mona eitavelo li nondilo li fike puletu omouyuki waKalunga ketu nowOmukulili Jesus Kristus.
2 Efilonghenda nombili nai mu hapupalele okokushiiva Kalunga nOmwene wetu Jesus Kristus.
Pamekeni eifano leni mu mone omhito yokuya mouhamba waKalunga
3 Osheshi aishe ei otwe i pumbwa, tu kale tu nomwenyo netilokalunga, otwe i pewa oshali okeenghono daye doukwakalunga mokushiiva ou e tu ifana noshinge shaye nouwa waye, 4 omo tuu omo e tu pa oshali omaudaneko e nondilo nomanene unene kae shii okuyelekwa, opo mu kwatakanifwe noukalikalunga, ngeenge tamu kukuma enyonauko la kala mounyuni omolwouhalu. 5 Ndele omolwaashi lalakaneni yo neenghono adishe okuholola meitavelo leni ouwa, mouwa eshiivo, 6 meshiivo elipangelo, melipangelo elididimiko, melididimiko etilokalunga, 7 metilokalunga ohole yokuhola ovamwatate nomohole yokuhola ovamwatate ohole yokuhola aveshe. 8 Osheshi oinima ei ngeenge oi li munye notai tane, itai mu efa, mu kale noundede ile muhe na oiimati yomokushiiva Omwene wetu Jesus Kristus. 9 Ndele ou ehe i kwete oye omupofi, omuminikili, okwa dimbwa okuyelifwa kwaye kwomatimba aye onale.
10 Onghee hano ovamwatate, kendabaleni shili okupameka eifano leni nokuhoololwa kweni, osheshi ngeenge tamu shi ningi, kamu na fiku limwe tamu punduka; 11 osheshi osho ngaha tamu pewa omhito iwa ya wana yokuya mouhamba waalushe wOmwene Omukulili wetu Jesus Kristus.
Omutumwa wOmwene ta longo fimbo kuyela
12 Onghee hano onda hala oku mu dimbulukifa alushe oinima ei, nande nye vene omu i shii nomwa pamenena moshili oyo mu i kwete. 13 Osheshi onda tala osha yuka, nokutya fimbo ndi li metwali eli, ndi mu papudule noku mu dimbulukifa oinima ei, 14 osheshi ondi shi shii, etwali eli lange ohandi li dulwa ohangelela, ngaashi yo Omwene wetu Jesus Kristus e shi shiivifila nge. 15 Ndele ndi nokudiinina shili nokutya, mu dule okudimbulukwa eshi konima yetembu lange yo.
Ondjovo ya pama
16 Osheshi inatu shikula eengano da totwa nounongo, ofye eshi twe mu shiivifila eenghono nokuuya kwOmwene wetu Jesus Kristus, ndelenee otwa tala nomesho etu vene oshinge shaye shinene. 17 Osheshi Oye a pewa kuXe Kalunga efimano noshinge, eshi a hangika kondaka ya dja moshinge shopombadambada, ei tai ti: “Ou Omona wange omuholike, nde mu hokwa.” 18 Nondaka ei otwe i uda ya dja meulu, eshi twa li pamwe naye komhunda iyapuki.
19 Nonena otu nondjovo youxunganeki ya pamenena i dule yonale notamu wapeke, ngeenge tamu i diinine nawa momitima deni ngaashi onyika tai minikile momulaulu fiyo taku shi, nonyofi yongula tai piti. 20 Komesho yoinima aishe kaleni mu shi shii nokutya, kape na nande ouxunganeki womomishangwa u shii okufatululwa keendunge domunhu; 21 osheshi inapa etwa nande ouxunganeki kehalo lomunhu, ndelenee ovanhu ovayapuki ova popya odo ve di pewa kuKalunga nokuwilikwa kOmhepo Iyapuki.
© Oshikwanyama Bible Revised © Bible Society of Namibia, 2008, 2012.
