Elisa ta yakula omukainhu Omusunem
1 Ndele Elisa okwa lombwela omwalikadi winya, omona waye ye e mu pa omwenyo, ndele ta ti: “Fikama, u ye pamwe neumbo loye u kale ngaashi omunailongo apa to dulu okukala, osheshi Omwene a ifana ondjala. Yo ye uya yo moshilongo ya ninga omido heyali.” 2 Omwalikadi a fikama a ninga paendjovo domulumenhu waKalunga: okwa ya pamwe neumbo laye ndele a kala ngaashi omunailongo omido heyali moshilongo shOvafilisti. 3 Ndelenee pexulilo lomido heyali omwalikadi okwa dja moshilongo shOvafilisti a ka yave kohamba, a alulilwe eumbo laye nepya laye. 4 Ohamba ya hangika tai kundafana naGehasi, omupiya womulumenhu waKalunga, ndele tai ti: “Hepaululile nge oinima aishe inene Elisa e i ninga.” 5 Ndele fimbo ta hepaululile ohamba nhumbi Elisa a pa omufi omwenyo, omwalikadi tuu ou, omona waye Elisa e mu pa omwenyo, a ifana ohamba ta yave a pewe eumbo laye nepya laye. Ndele Gehasi ta ti: “Omwene wange ohamba, omwalikadi oye tuu ou nomona waye omumati oyou ou, Elisa e mu pa omwenyo.” 6 Nohamba ya pula komwalikadi ndele ye okwe i hepaululila. Opo nee ohamba ye mu pa elenga ndele tai ti: “Na alulilwe aishe yaye nosho yo oilya aishe yomepya laye, okudja kefiku tuu linya a dja moshilongo fiyo onena eli.”
Hasael ta ningi ohamba yaAram
7 Ndele Elisa okwe uya kuDamaskus, fimbo Benhadad, ohamba yaAram, tai vele. Ndele ve i shiivifila tava ti: “Omulumenhu waKalunga okwe uya.” 8 Opo nee ohamba tai lombwele Hasael: “Kufa omulongelo meke loye, inda u ka shakeneke omulumenhu waKalunga u mu indile a pulile nge kOmwene, to ti: ‘Ame ohandi ka veluka tuu koudu?’ ” 9 Opo nee Hasael a ya e mu shakeneke nokwa kufa omulongelo meke laye nokutya, oinima i lili nai lili iwa yokuDamaskus oihumbatwa keengamelo omilongo nhee. Nokwe uya ndele ta kala ofika koshipala shaye ndele ta ti: “Omumwoye Benhadad, ohamba yaAram, a tuma nge kwoove ndi pule: ‘Ame ohandi ka veluka tuu koudu ou?’ ” 10 Ndele Elisa okwe mu nyamukula: “Inda u ka tye kuye: ‘Oshili, ove oto ka veluka ngeno,’ ashike nee Omwene a shiivifila nge nokutya, yo otai ka fya shili.” 11 Nokwe mu tongolola moshipala shaye fiyo winya a fya ohoni, nomulumenhu waKalunga ta lili. 12 Opo nee Hasael ta ti: “Omolwashike omwene wange ta lili?” Ndele ye ta nyamukula: “Osheshi ame ndi shi shii owii u fike peni ove oto ka ningila ovana vaIsrael. Ove oto ka xwika po eehotengulu davo nokudipaa ovamati vavo neongamukonda nokutyanghaula ounona vavo vanini nokutanda ovalikadi vafimba.” 13 Ndelenee Hasael ta ti: “Omupiya woye, ombwa, mbela omushike, a ninge oinima inene i fike opo?” Ndele Elisa ta nyamukula: “Omwene okwa talifa nge ove ngaashi ohamba yaAram.” 14 Opo nee ye a dja po puElisa, ndele ye eshi e uya komwene waye ye e mu pula: “Elisa okwe ku lombwela shike?” Nokwa nyamukula nge: “Ove oto ka veluka shili.” 15 Ndelenee mefiku la shikula okwa kufa elapi lokombete nokwe li tutika momeva nokwe li uvikifa koshipala shayo, onghee hano yo ya fya. Ndele Hasael okwa ninga ohamba ponhele yayo.
Oshilongo shaJuda Joram
16 Ndele momudo omutitano waJoram yaAhab, ohamba yaIsrael, Jehoram yaJosafat, ohamba yaJuda, okwa hovela okupangela. 17 Omido daye da li omilongo nhatu nambali, eshi a ninga ohamba. Nokwa li ohamba omido hetatu muJerusalem. 18 Ndele ye okwa enda nondjila yeehamba daIsrael, ngaashi epata laAhab la ninga. Osheshi omwalikadi waye okwa li omona okakadona kaAhab, nokwa ninga osho inashi yuka momesho Omwene. 19 Ndelenee Omwene ina hala okumana po Juda omolwomupiya waye David, paudaneko laye nokutya, a yandje kuye nokovana vaye olamba.
20 Pomafiku aye Ovaedom ve liteeka Juda ndele ve lihoololela ohamba. 21 Onghee hano Jehoram okwa fikama nokwa ya kuSair pamwe nomatemba aeshe oita. Ndele ye eshi a fikama oufiku okwa taataa Ovaedom ovo ve mu dingilila pamwe novakulunhu vomatemba oita. Novakwaita va ya onhapo komatwali avo. 22 Osho ngaha Ovaedom va amuka kuJuda fiyo onena eli. Mefimbo tuu limwe alike oshilando shaLibna yo she likufa mo mepangelo laye. 23 Noinima imwe tai hepaulula Jehoram naaishe e i ninga, inai shangelwa mbela membo lomafimbo eehamba daJuda? 24 Ndele Jehoram okwa ka nangala pooxe nokwa pakwa pooxe moshilando shaDavid. Nomona waye Ahasia okwa ninga ohamba ponhele yaye.
Ahasia
25 Momudo omutimulongo nomutivali waJoram yaAhab, ohamba yaIsrael, Ahasia yaJehoram, ohamba yaJuda, a ninga ohamba. 26 Omido daAhasia, eshi a ninga ohamba, oda li omilongo mbali nambali, nokwa pangela omudo umwe muJerusalem, nedina laina la li Atalia yaOmri, ohamba yaIsrael. 27 Ndele ye okwa enda nondjila yepata laAhab nokwa ninga eshi inashi yuka momesho Omwene, ngaashi epata laAhab. Osheshi ye okwa li haukwe wepata laAhab. 28 Nokwa homona pamwe naJoram yaAhab ndele va lwifa Hasael, ohamba yaAram puRamot shomuGilead. Ndelenee Ovaarami va yasha Joram. 29 Nohamba Joram ya shuna, oiveta yayo i hakulwe muJisreel, oiveta oyo Ovaarami ve i yasha puRama molwoodi lokulwifa Hasael, ohamba yaAram. Ndele Ahasia yaJehoram, ohamba yaJuda ye uya okutalela po Joram yaAhab muJisreel, osheshi ye okwa vela.
© Oshikwanyama Bible Revised © Bible Society of Namibia, 2008, 2012.
