Eyakulo leehepele
1 Kombinga yeyakulo lovayapuki itandi pumbwa oku mu shangela; 2 osheshi ehalo leni lokuyandja ondi li shii, nolo tuu olo handi li mu tangele moipafi yOvamakedonia, nokutya, Akaia sha kala she lilongekida okudja oudwaali, nosho ouladi weni wa kwata vahapu vomuvo. 3 Onghee tuu onda tuma ko ovamwatate ava, opo oku mu tanga kwetu kuha monike kwongaho moshinima eshi, ndele mu kale mwe lilongekida ngaashi nda tile; 4 paha ningwe Ovamakedonia ngeenge tave uya ko naame, notave mu hange inamu lilongekida, ofye tuha tye onye, tu fifwe ohoni melineekelo eli. 5 Onghee hano onde shi tala osha wapala okukumaida ovamwatate, va ka tetekele okuya kunye nova longekide eeshali mwe di udaneka nale, di ninge eeshali depuniko, do diha nyike ouluva.
6 Didilikeni eshi, ou ta kunu nouluva, ota teya yo nouluva, naau ta kunu nepuniko, ota teya yo nepuniko. 7 Keshe tuu na yandje ngaashi omutima waye tau mu lombwele, hanomunyengutima ile kefininiko, osheshi Kalunga e hole ou ta yandje nehafo. 8 Ndelenee Kalunga ta dulu oku mu hapupalifila efilonghenda keshe, mu kale mu na alushe moinima aishe ashishe, eshi mwe shi pumbwa, opo mu dule okulonga nawelela oshilonga keshe shiwa; 9 ngaashi pa shangwa:
“Oye oha udu, oha pe eehepele,
ouyuki waye tau kala alushe.”
10 Naau ta pe omukuni ombuto, nomungome okulya, oye ta hapupalifa yo ombuto yeni ndele ta kulifa oiimati youyuki weni, 11 opo nee eshi mwa punapalekwa mwaaishe, mu dule okulonga, muhe noihelele, oshilonga keshe shiwa, tashi pandulifa Kalunga omolwetu. 12 Osheshi eyakulo eli lekwafo itali kufa po ashike oluhepo lovayapuki, ndelenee tali hapupalifa oiimati omolwomapandulo mahapu okupandula Kalunga, 13 eyakulo eli leni eshi tali va hololele nhumbi mwa pama, otava hambelele Kalunga omolweduliko leni kevaengeli laKristus, nomolwekwatafano leni navo naaveshe. 14 Navo yo otave mu ilikanene notave mu djuulukwa omolwefilonghenda eli linene laKalunga olo nye mwe li pewa. 15 Kalunga na pandulilwe oshali yaye ihe shii kutumbulwa.
© Oshikwanyama Bible Revised © Bible Society of Namibia, 2008, 2012.
