Omulunde e lidilulula na tambulwe nohole
1 Ndelenee ame nda li nda tokola shili, inandi hala okuuya kunye ndi mu etele vali oluhodi. 2 Osheshi ame ngee ohandi mu nyikifa oluhodi, olyelye hano ta hafifa nge vali, ngee haye winya ngeno nde mu nyikifa oluhodi? 3 Ndele osho tuu eshi nde shi mu shangela, opo mokuuya kunye muha nyikifwe oluhodi kwaava va li ve nokuhafifa nge, osheshi onde mu lineekela nye amushe, nokutya ehafo lange oleni yo amushe. 4 Osheshi moudjuu unene nomouyehame womomutima onde mu shangela nomahodi mahapu, haku mu nyikifa oluhodi, ndelenee onda hala mu shiive ohole ei inene ndi i na yoku mu hola.
5 Ndele ngeenge umwe a eta oluhodi, haame a nyikifa oluhodi, ndelenee onye tuu amushe, ndiha popye dihapu unene. 6 Ehandukilo olo e li mona kuvahapu, ola wana; 7 osho hano kombinga ikwao mu noku mu dimina po vali noku mu hekeleka, opo aha ningine moluhodi unene. 8 Onghee ohandi mu kumaida mu hovele oku mu hola; 9 osheshi onde shi mu shangela ndi shiive nhumbi mu li mokuyelekwa kweni, ngeenge omu neduliko moinima aishe. 10 Ndelenee ou tamu mu dimine po sha, naame yo ohandi dimi po; osheshi osho nde shi dima po, ngeenge onda li ndi na sha okudima po, onde shi dima po omolweni koshipala shaKristus, 11 opo tuha findwe kuSatana, osheshi omakoto aye otu a shii.
Evaengeli tali tandavele
12 Ndelenee ame eshi nde uya kuTroas okuudifa evaengeli laKristus, onda yeululilwa oshivelo mOmwene, 13 ndelenee inandi mona etulumuko momhepo yange, osheshi inandi mona mo omumwatate Titus. Onghee nde va lekela, ndele nda ya kuMakedonia.
14 Ndelenee Kalunga na pandulwe, ou te tu wilike alushe molweendo lwefindano muKristus, ou te tu hololifa apeshe edimba liwa lokushiiva kwaye! 15 Osheshi ofye edimba liwa laKristus kuKalunga mokati kaava tava xupifwa nomwaava tava ka kana; 16 kwaava edimba lefyo okefyo, ndele kwaavenya edimba lomwenyo olokuyandja omwenyo. Ndele olyelye ou a wanena eshi? 17 Inatu fa venya vahapu hava shingifa eendjovo daKalunga, ndelenee onomadiladilo a yela, ngaashi ava hava longifwa kuKalunga, omoipafi yaKalunga ohatu popi muKristus.
© Oshikwanyama Bible Revised © Bible Society of Namibia, 2008, 2012.
