Omwene ta tulumukifa ava va loloka ndele ta pamekele ovaitaveli eendjovo daye
1 Paulus, omuyapostoli waKristus Jesus okehalo laKalunga, nomumwatate Timoteus, okeongalo laKalunga lomuKorinto, pamwe novayapuki aveshe muAkaia aishe. 2 Efilonghenda kunye nombili yaKalunga Tate yetu noyOmwene wetu Jesus Kristus.
3 Kalunga naXe yOmwene wetu Jesus Kristus na hambelelwe, oXe yefilonghenda naKalunga kehekeleko alishe, 4 ou te tu hekeleke moudjuu wetu aushe, opo tu shiive yo okuhekeleka ava ve li moudjuu keshe onehekeleko olo Kalunga ta hekeleke fye vene. 5 Osheshi ngaashi omauyehame aKristus e tu yada pombada, osho yo omahekeleko e tu yada pombada omolwaKristus. 6 Ndelenee ofye ngeenge tu li meefina, otadi ningi exupifo nehekeleko leni, navali, ofye ngeenge hatu hekelekwa, otashi mu etele ehekeleko, notashi mu pameke mu lididimikile omauyehame oo tae tu yehameke yo. 7 Neteelelo letu kunye ola pama. Osheshi ou shi shii onye ngaashi mwa kwatafana nomahepeko, nosho mwa kwatafana nehekeleko yo.
8 Osheshi ovamwatate, inatu hala nye mu kale inamu shiiva oudjuu winya we tu hanga muAsia; omaudjuu a li manene unene e dule eenghono detu, opo twa li hatu limbililwa molwokukalamwenyo kwetu nokuli, 9 nafye vene yo otwe litala otwa tokolelwa efyo, opo tuha kale twe lineekela fye vene, ndelenee tu lineekele Kalunga, ou ta nyumuna ovafi. 10 Ye okwe tu xupifa mo moshiponga shefyo olo linene, ndele ote tu xupifa nokomesho, ndele muye otwa tula mo eteelelo letu nokutya, ote ke tu xupifa nokomesho yo, 11 eshi nanye yo tamu tu kwafa momailikaneno eni, opo momakanya mahapu epandulo molwetu li yeluke pombada omolwefilonghenda eli twe li pewa.
12 Osheshi elitango letu oleli: Ehepaululo leliudo letu oleli kutya, fye otwa enda mounyuni naunene mokati keni, mouyapuki nomoukoshoki waKalunga, hamounongo wopambelela, ndele mefilonghenda laKalunga. 13 Ndele mwaashi hatu mu shangele kamu na shimwe shi lili, osho tuu osho tamu shi lesha nomu shi udite yo; ndele ondi neteelelo mu kale mu udite ko fiyo okexulilo, 14 ngaashi nokuli mwa kala mu tu udite kombinga, nokutya ofye elitango leni, ngaashi nanye yo oletu mefiku lOmwene wetu Jesus.
15 Ndele melineekelo eli onda li nda hala tete okuuya kunye, onye mu pewe epuniko etivali, 16 nondi pite punye mokuya kuMakedonia, nomokwaaluka kuMakedonia okuuya vali kunye, nokekwafo leni okuuya kuJudea. 17 Hano eshi nda li nda hala okuninga ngaha, inandi shi diladila nawa mbela? Ile handi pangele eemhangela dange pambelela ndi kale ngeno ndi neendjovo mbali: “Heeno, heeno” na “ahowe, ahowe”? 18 Ndelenee Kalunga Oye omudiinini, onghee ondjovo yetu kunye itai kala “heeno” na “ahowe.” 19 Osheshi Omona waKalunga Jesus Kristus, Oye ou a udifwa mokati keni kufye, kwaame naSilvanus naTimoteus, Oye ke fi “heeno” na “ahowe,” ndelenee muye omwa dja “heeno.” 20 Osheshi omaudaneko aKalunga aeshe oku li muye “heeno,” onghee hano muye tamu di “Amen” yao kefimano laKalunga kufye. 21 Ndelenee ou te tu pamekele pamwe nanye muKristus nokwe tu vaeka, Oye Kalunga, 22 ou e tu twa oshilimbo shaye nokwe tu pa momitima detu ombabyona yOmhepo.
23 Ndelenee ame ohandi ifana Kalunga a ninge ondobwedi yomomwenyo wange, ame eshi inandi uya nale kuKorinto, onde mu tala onheni, 24 hakutya fye otwa hala okupangela eitavelo leni, ndelenee fye ovayakuli pamwe nanye omolwehafo leni; osheshi meitavelo omwa pama.
© Oshikwanyama Bible Revised © Bible Society of Namibia, 2008, 2012.
