Oilando ya tungwa kuSalomo
1 Pexulilo lomido omilongo mbali omo Salomo a tunga otembeli yOmwene nongulu yaye mwene, 2 okwa tungulula oilando e i pewa kuHiram, nokwa nangeka mo ovana vaIsrael. 3 Konima yoinima oyo, Salomo okwa ya kuHamat-Soba nokwe shi nangala. 4 Nokwa tunga Tadmor shomombuwa, noituvikilwalando aishe oyo e i tunga muHamat. 5 Okwa tunga vali Bet-Horon shokombada naBet-Horon shoposhi ngaashi oilando i nohotekuma noivelo noiidilifo. 6 Nosho yo Baalat noituvikilolando aishe yaSalomo, noilando yomatemba oita noyovalondi veenghambe neenhele adishe dikwao Salomo okwa pondola oku i tunga muJerusalem nomuLibanon nomoshilongo ashishe shomepangelo laye. 7 Novanhu aveshe ovo vehe fi Ovaisraeli, ovo va xupa po mOvaamori nomOvaheti nomOvaperesi nomOvahevi nomOvajebusi; 8 movana vavo, ovo va xupa po moshilongo, ovo inava dipawa kovana vaIsrael, ovo tuu ovo Salomo okwe va tula moilonga yoshilongo fiyo onena eli. 9 Ndelenee ovana vaIsrael, Salomo ine va ninga ovapika voilonga yaye, ndelenee vo va li ovakwaita, novakulunhu vovaladi novakulunhu vomatemba oita novalondi veenghambe. 10 Novapashukili voilonga yefininiko yomatungo e lili noku lili aSalomo ova li omafele avali nomilongo nhano. 11 Ndele Salomo okwa kufa omona omukainhu waFarao moshilando shaDavid nokwe mu twala mongulu oyo e i mu tungila. Osheshi a tile: “Omwalikadi wange ita ka kala mongulu yaDavid, ohamba yaIsrael, osheshi oyo iyapuki, shaashi oshikefa shOmwene she ya mo.”
Oupuna waSalomo
12 Opo nee Salomo okwa yambela Omwene omaxwikiloyambo koaltari yOmwene, oyo a tunga komesho yolupale lokomesho. 13 Vo va li ve nokuyamba efiku keshe pashipango shaMoses, momashabata nomeehani dipe nomomafimbo oivilo, lutatu momudo: moshivilo shomingome dihe nonhafi, nomoshivilo shoshivike nomoshivilo shomatwali. 14 Ndele pamhangela yaxe David, e mu lombwela, ta popi eengudu dovapristeli, okwe va ulikila oilonga yavo; nosho yo oinakuwanifwalonga yOvalevi nokutya, okuhambelela Kalunga nokuwanifa moipafi yovapristeli oilonga yomefiku keshe. Nosho yo oilonga yovanangeli voivelo paengudu doposhivelo keshe. Osheshi osho David, omulumenhu waKalunga a tile. 15 Ndele vo inava kanduka mo nande moshinima shimwe moshipango shohamba, tashi popi ovapristeli nOvalevi nomalimba omamona.
16 Osho ngaha hano oilonga aishe yaSalomo ya longwa kefiku tuu olo ekanghameno longulu yOmwene la tungwa fiyo okexulilo layo. Ongulu yOmwene oya pwa. 17 Opo nee Salomo a ya kuEsion-Geber nokuElat, komunghulo wefuta medu laEdom. 18 Ndele Hiram okwe mu tumina eeskepa da etwa kovapiya vaye nokovapiya va shiiva efuta. Ndele vo pamwe novapiya vaSalomo ve uya kuOfir, ndele va ka tale ko eekilograma omayovi omulongo nomayovi atano doshingoldo ndele va etela ohamba Salomo.
© Oshikwanyama Bible Revised © Bible Society of Namibia, 2008, 2012.
