Oaltari yoshikushu nefuta loshikushu
1 Nokwa ninga vali oaltari yoshikushu: oule wayo eemeta omugoi nounene wayo eemeta omugoi, noule wayo wopombada eemeta nhee netata. 2 Nokwa ninga yo efuta la folomwa. Komunghulo umwe nokomunghulo mukwao la yeleka eemeta nhee netata la li ngaashi oluvalakuulu. Noule walo wopombada wa li eemeta mbali nomoluputa la yelekwa nongodi yeemeta omulongo nanhatu. 3 Koshi yomunghulo walo okwa dingililifwa omatanga: omatanga omulongo mometa imwe. Omaulenga aa okwa li momikweyo mbali a dingilila efuta, a telekwa kumwe nefuta monhelekelo nokwa li molupe leemhedi. 4 Lo ola li la dikwa kombada yeengobe omulongo nambali: nhatu da taalela koumbangalanhu, nanhatu da taalela kouninginino, nanhatu da taalela koumbuwanhu, nanhatu da taalela koushilo, fimbo etemba la li kombada yado. Omakalo ado okwa ama meni. 5 Nounene weemhati dalo wa li u fike peke, nomunghulo walo wa ningwa wa fa odo depeta ngaashi onhemo yomado. Lo ola kwatelela mo eelita di dule omayovi omilongo hamano. 6 Nokwa ninga eembalisha omulongo dokulikoshela nokwa tula nhano koumbuwanhu nanhano koumbangalanhu. Oinima yomaxwikiloyambo va li ve noku i kosha mo, ndelenee efuta la li po ovapristeli ve likoshe mo.
7 Nokwa ninga oikwatelwashela omulongo yoingoldo, papukululo layo, ndele yo oya tulwa motembeli, itano koumbuwanhu naitano koumbangalanhu. 8 Nokwa ninga yo oitaafula omulongo ndele e i tula motembeli, itano koumbuwanhu naitano koumbangalanhu. Nokwa ninga oiyaxa efele limwe yoshingoldo. 9 Nokwa ninga vali olupale lovapristeli nolupale lakula noivelo yolupale. Nomapeta okwe a nateka noshikushu. 10 Nefuta okwe li tula kombinga youmbuwanhu la taalela oumbuwanhuushilo.
11 Huram okwa ninga vali eembiya, oixupulo noiyaxa. Osho ngaha hano Huram a wanifa oshilonga osho ye kwa li e noku shi ningila ohamba Salomo mongulu yaKalunga: 12 Eengudi mbali noipakululu ivali ya tenhekwa keexulo deengudi. Neendjadja mbali da dingilila oipakululu; 13 neegranati omafele ane da dingilila oipakululu: momikweyo mbali kukeshe shimwe. 14 Nokwa ninga oweendifotemba veembalisha neembalisha di li moweendifotemba; 15 nefuta limwe neengobe omulongo nambali koshi yalo; 16 neembiya noixupulo neenyala noinima aishe tai longifwa mongulu, Huram Abi okwa ningila ohamba Salomo i longifwe mongulu yOmwene, e i ninga oshikushu sha pundjwa nawa. 17 Moluhaela laJordan, omo mwa li edu lihapu, pokati kaSukkot naSareta, ohamba ye i folomifa moshifolomo shedu. 18 Ndele Salomo okwa ninga oinima aishe oyo ihapu unene, ndele oyo yoshikushu oya li ihapu ihe shii okuvalwa.
19 Ndele Salomo okwa hambulifa moshingoldo oiyakulifo yomotembeli: oaltari, noitaafula yokutenheka omingome deyambo kuKalunga, 20 noikwatelwalamba neelamba dayo, da li hadi temwa panghedi ya ufwa, komesho yOuyapukielela, 21 neenhemo neelamba neenghwato dayo, 22 noipwipwiko noiyaxa nouyaxa voitwiminifo noikwatelwa yomakala nomakandula omivelo dOuyapukielela nomivelo dopondje yotembeli. Aishe ei oya li yoshingoldoelela.
© Oshikwanyama Bible Revised © Bible Society of Namibia, 2008, 2012.
