Hiskia ta yelifa elongelokalunga
1 Ndele ashishe osho eshi sha xula po, Ovaisraeli aveshe ava va li po, va ya koilando yaJuda ndele va tataula po omiti neengudimanya, omalupwelele aAsera ve a ka po, noikulundu neealtari muJuda ashishe nomuBenjamin nomuEfraim nomuManasse ve i ngumauna po fiyo ve i hanauna po sheke. Opo nee ovana aveshe vaIsrael va shuna, keshe umwe, koshilongo shavo nokoshilando shavo.
2 Ndele Hiskia okwa tula po eengudu dovapristeli nodOvalevi paengudu davo, pashilonga shakeshe umwe ngeenge paupristeli ile paulevi, okuyakula nokupandula nokuhambelela poivelo yonhanda yOmwene fimbo omaxwikiloyambo nomapanduloyambo taa yambwa.
3 Oyo ohamba ya yandja yomoinima yayo, ya yamba ongaashi omaxwikiloyambo, omayambo ongula nonguloshi nomomashabata, momafiku ohani ipe nomoivilo, ngaashi mwa shangwa momhango yOmwene. 4 Ndele ya lombwela ovanhu, oonakukalamo muJerusalem nokutya, ve nokuyandja kovapristeli nokOvalevi oitukulwayandjiwa yavo, opo va shiive okuyapulila omhango yOmwene eenghono davo adishe. 5 Noshipango osho eshi sha tandavela, ovana vaIsrael va yandja oshipe shihapu shomoilya noshomaviinyu noshomaadi, noshomaadi eenyiki noshoinima aishe yomepya, ndele va eta oitimulongo ihapu yomoinima aishe. 6 Novana vaIsrael ovo va kala moilando yaJuda naavo yo va eta oitimulongo yomeengobe noyomeedi noitimulongo yeeshali diyapuki odo da yapulilwa Omwene Kalunga kavo ndele ve di tula meenduba. 7 Mohani onhinhatu va hovela okundubila, ndele mohani onhiheyali va mana. 8 Hiskia novakulunhu eshi ve uya ndele va mona eenduba, ova pandula Omwene novanhu vaye Israel. 9 Ndele Hiskia eshi a pula kovapristeli nokOvalevi, a pulila eenduba, 10 omupristeli omukulunhu Asaria womepata laSadok, okwe mu nyamukula ndele ta ti: “Okudja kefiku olo va hovela okweetela otembeli yOmwene eeshali, fye twa lya ndele twa kuta, ndele natango shihapu sha xupa po. Osheshi Omwene okwa nangeka oshiwana shaye noupuna, onghee eshi shihapu osha xupa po.”
11 Opo nee Hiskia e va lombwela va tungile mongulu yOmwene omalimba. Ndele va tunga. 12 Neeshaliyambo noitimulongo neeshali diyapuki ve i twala mo nokudiinina. Nomukulunhu wayo ou a tulwa po Konanja, Omulevi, nomumwaina Simei ponho yaye. 13 Ndele palombwelo lohamba Hiskia nolaAsaria, omupristeli omukulunhu wotembeli yaKalunga; Jehiel, Asasia, Nahat, Asahel, Jerimot, Josabad, Eliel, Jismakja, Mahat naBenaja va li ovayakuli vaKonanja novomumwaina Simei. 14 NOmulevi Kore yaJimna, ou a li omunangeli woshivelo shokoushilo, a diinina eeshali dehalo liwa, da etelwa Kalunga nokwa li ha tukula eeshaliyambo dOmwene neeshali diyapukielela. 15 Ndele mewiliko laye mwa li Eden, Minjamin, Josua, Shemaia, Amarja naSekanja, ava va li ve nokutukulila noudiinini oovakwao ve li moilando yovapristeli, ovanyasha novakulunhu, oitukulwa paengudu, 16 ava inava valwa meshikulafano lepata, ovo ovalumenhu vomido nhatu naavo ve di koya, hava i kongulu yOmwene, omafiku olufo lavo, nongaashi va li ve noinakuwanifwalonga yavo paengudu. 17 Meshikulafano lepata lovapristeli, ovapristeli va shangwa mo pamaumbo nOvalevi ovo ve nomido omilongo mbali ile ve di koya, painakuwanifwalonga yavo paengudu. 18 Meshikulafano lepata lovapristeli mwa shangwa ovana vavo aveshe vanini, ovalikadi vavo novana vavo ovamati noukadona, ongudu yavo aishe, shaashi va diinina shili osho shiyapuki. 19 Ovapristeli, oludalo laAron, ovo va kala moulifilo woilando va li ve novalumenhu moshilando, va tumbulwa kedina ovo va li ve nokutukulila ovalumenhu aveshe vomokati kovapristeli nOvalevi aveshe ovo va shangwa meshikulafano lepata oitukulwa yavo.
20 Osho ngaha Hiskia a ninga muJuda ashishe. Ye okwa ninga osho sha wapala nosha yuka noshoudiinini koshipala shOmwene, Kalunga kaye. 21 Naashishe, osho e shi ninga mokukonga Kalunga kaye, ngee oshilonga shongulu yaKalunga ile omhango ile oipango, ye e shi ninga nomutima aushe, nokwa li e nelao.
© Oshikwanyama Bible Revised © Bible Society of Namibia, 2008, 2012.
