Etungo lotembeli
1 Ndele Salomo okwa hovela okutunga ongulu yOmwene muJerusalem komhunda yaMoria, oko Ye e lihololela xe David, monhele ya longekidwa kuDavid, yomoshipale shOmujebusi Ornan. 2 Nokwa hovela okutunga mohani onhivali mefiku etivali momudo omutine wepangelo laye. 3 Ekanghameno eli Salomo okwa tungila ko etungo longulu yaKalunga: Oule, eemeta opashiyelekifo shikulu, eemeta 60, nounene eemeta omilongo mbali. 4 Nehale lokufikila: ola li li fike pomutamo wotembeli, eemeta omugoi; nomutumbo weemeta omilongo nhano nanhee. Ndele meni okwe li xwa oshingoldoelela. 5 Nolupale linene okwe li vaeka oipilangi yomisipresi nokwe li xwa oshingoldoelela shiwa nokwe li wapeka nomilunga nomalyenge. 6 Nokwa wapeka vali ongulu nomamanya mawa e nondilo, noshingoldo sha li oshingoldo shokuParvaim. 7 Nokwa xwa olupale nomitengi donduda nominghulo doposhi noshingoldo, nokwa vaeka ovakerubi momakuma.
8 Nokwa ninga vali olupale louyapukielela. Oule walo wa li u fike pounene wongulu, eemeta omilongo mbali. Nokwe li xwa noshingoldo shiwa shoitalenti omafele ahamano. 9 Noudjuu weembosha doshingoldo wa li eesekeli omilongo nhano. Neendjuwo dopombada okwe di xwa noshingoldo.
10 Nokwa ningila molupale louyapukielela ovakerubi vavali, oshilonga shounongo nokwe va xwa oshingoldo. 11 Nomavava ovakerubi: oule wavo wa li eemeta omilongo mbali. Evava leemeta nhano laumwe ola kuma kekuma lolupale, fimbo evava likwao leemeta nhano ola kuma kevava lomukerubi mukwao. 12 Evava lomukerubi mukwao, li fike keemeta nhano, la kuma kekuma lolupale. Nevava likwao, li fike keemeta nhano, ola kuma kevava lomukerubi mukwao. 13 Ovakerubi ava va tandavelifa omavava avo eemeta omilongo mbali. Ndele va kala ofika keemhadi davo, oipala yavo ya tala meni lolupale. 14 Nelapi la tukula okwe li ninga neengodi domaludi dapurpuri noditilyana ngaashi ohonde noshiyata shiwa sholiina nokwa fanekela mo ovakerubi.
15 Nokwa ninga vali eengudi mbali komesho yongulu. Oule wado wopombada eemeta omilongo nhatu nanhano pamwe noitenhekwa ya li komitwe dado, oule wopombada eemeta nhano. 16 Nokwa ninga yo omalyenge ngaashi oshidingo nokwe a tula keexulo deengudi. Nokwa ninga vali eegranati efele limwe nokwe di kwatakanifa nomalyenge. 17 Neengudi okwe di dika komesho yotembeli, imwe koumbuwanhu naikwao koumbangalanhu: ndele oyo yokoumbuwanhu okwe i luka Jakin, naayo yokoumbangalanhu Boas.
© Oshikwanyama Bible Revised © Bible Society of Namibia, 2008, 2012.
