Ussia ohamba yaJuda
1 Opo nee ovanhu aveshe va kufa Ussia, omido daye da li pefimbo olo omido omulongo nahamano, ndele ve mu ninga ohamba ponhele yaxe Amasia. 2 Ye okwa tunga Elat nokwe shi alulila kuJuda, ohamba eshi ya ka nangala pooxe. 3 Omido daUssia da li omulongo nahamano ye eshi a ninga ohamba, nokwa pangela muJerusalem omido omilongo nhano nambali. Nedina laina la li Jekolia wokuJerusalem. 4 Nokwa ninga osho sha yuka momesho Omwene, naanaa ngaashi xe Amasia a ninga. 5 Nokwa konga Kalunga fimbo Sakaria okwa li e nomwenyo, ou a li e nounongo wokushiiva omamoniko aKalunga. Ndele pomafiku oo ye eshi a konga Omwene, Kalunga e mu pa elao.
6 Nokwa fikama ndele ta lwifa Ovafilisti nokwa ngumauna po ohotekuma yaGat nohotekuma yaJabne nohotekuma yaAsdod, ndele a tunga oilando moushiinda waAsdod nomokati kOvafilisti. 7 Ndele Kalunga okwe mu kwafa mokulwifa Ovafilisti nOvaarabi, ovo va kala muGur-Baal, nOvameuni. 8 NOvaammoni yo va fendela Ussia. Netumbalo laye la tandavela fiyo okuEgipiti, shaashi ye okwa li e neenghono dinene. 9 Ussia okwa tunga vali eehoteshungo muJerusalem pOshivelo Shokolonela nopOshivelo Shefilu nopOkolonela, nokwe di pameka. 10 Nokwa tunga yo eehoteshungo mombuwa ndele a panda eendungu dihapu domeva. Osheshi ye a li e noimuna ihapu medu la lalakana nomedu la tumba la lalakana, nokwa li e novalongi vepya novalongi voikokola yomiviinyu keemhunda nomedu loikunino, osheshi ye e hole oilonga yomapya.
11 Ussia okwa li e na vali omatanga ovakwaita va li moukwaita ndele va ya koita, pamatanga pamuvalo waava va li mokutalwa, wa shangwa komushangi Jeiel nokomupashukili Maasea, kewiliko laHanania, elenga limwe lomomalenga ohamba. 12 Omuvalo aushe wovakulunhu vomapata, wovaladi wa li omayovi avali nomafele ahamano. 13 Ndele mepangelo lavo mwa li omatanga ovakwaita ve fike pomayovi omafele atatu naaheyali nomafele atano, ovo tava dulu okulwifa neenghono adishe va kwafe ohamba okulwa nomutondadi. 14 Ndele Ussia okwa kongela ovakwaita aveshe oikelelifo nomaonga nomambale oivela noikutu yoivela nomauta noiumbifo yomamanya. 15 Nokwa ninga yo muJerusalem oilwifoshina, ya tungwa nondunge, ya tulwa meehoteshungo nomeekolonela dohotekuma, tai umbu oikuti nomamanya manene. Netumbalo laye la tandavela, osheshi a kwafa shili, oshikumwifa nokuli, fiyo a ninga omunaenghono.
Ussia nehandu laKalunga
16 Ndelenee ye eshi a ninga omunaenghono, omutima waye e u nenepeka, onghee a ninga osho inashi yuka nande, ndele a nyona kOmwene Kalunga kaye. Osheshi a ya mo motembeli yOmwene ndele ta twiminine oitwiminifo koaltari yokutwimina. 17 Ndelenee omupristeli Asaria okwe mu shikulila mo, novapristeli omilongo hetatu vOmwene, ovalumenhu ovaladi, va ya mo pamwe naye, 18 ndele va kelela ohamba Ussia ndele tava ti kuyo: “Kashi fi oshilonga shoye, Ussia, u twiminine Omwene oitwiminifo, ndelenee oshovapristeli, sholudalo laAron, ovo va yapulilwa okuyamba. Pita pondje, u dje motembeli, osheshi wa nyona, ndele eshi itashi ku etele efimano kOmwene Kalunga.” 19 Ndelenee Ussia okwa handuka unene, ndele a hangika e kwete oshikwatelwa shoitwiminifo meke laye. Ndele eshi a handukila ovapristeli, oudu woshilundu wa djuuka mombaba yoshipala shaye moipafi yovapristeli mongulu yOmwene poaltari yokutwimina. 20 Omupristeli omukulunhu Asaria novapristeli aveshe, eshi ve mu tala, va mona oudu woshilundu mombaba yoshipala shaye, ndele ve mu taataa mo diva, naye mwene yo okwa endelela a dje mo, osheshi Omwene e mu denga. 21 Nohamba Ussia ya li omunashilundu fiyo okefiku lefyo layo, ya kala mongulu ye likalela ngaashi ovanashilundu, osheshi yo ya kelelwa okuya kongulu yOmwene. Nomona waye Jotam ou a diinina eumbo lohamba, okwa pangela ovanhu vomoshilongo. 22 Noinima imwe tai hepaulula Ussia, yotete noyahauxuuninwa, oya shangwa komuxunganeki Jesaja yaAmos. 23 Ndele Ussia okwa ka nangala pooxe nokwa pakwa pooxe monhele yokupaka eehamba. Osheshi tava ti: “Ye omunashilundu.” Nomona waye Jotam okwa ninga ohamba ponhele yaye.
© Oshikwanyama Bible Revised © Bible Society of Namibia, 2008, 2012.
