2 OMAFIMBO 24 - Oshikwanyama Bible (OKYB)

Epangelo laJoas

1 Omido daJoas da li heyali eshi a ninga ohamba, nokwa pangela omido omilongo nhee muJerusalem. Nedina laina la li Sibja womuBerseba. 2 Ndele Joas okwa ninga osho sha wapalela moipafi yOmwene momafiku aeshe omupristeli Jehoiada. 3 Ndele Jehoiada okwe mu kongela ovalikadi vavali, nokwa dala ovana ovamati noukadona.

4 Konima yaashi Joas okwa diladila okuwapeka vali ongulu yOmwene. 5 Onghee hano a ongela ovapristeli nOvalevi ndele ta ti kuvo: “Indeni koilando yomuJuda ndele ongeleni oimaliwa kOvaisraeli aveshe, ongulu yaKalunga keni i wapekwe komudo nomudo. Noshilonga eshi shi endelelifeni!” Ndelenee Ovalevi inave shi endelelifa. 6 Opo nee ohamba ya ifana omupristeli omukulunhu Jehoiada ndele tai ti kuye: “Omolwashike ino kala noshisho nokutya, Ovalevi va etele etwali oundobwedi woimaliwa yomuJuda noyomuJerusalem, oimaliwa oyo yaMoses, omupiya wOmwene, naayo yeongalo lOvaisraeli?” 7 Osheshi ovana vomukolokoshi Atalia va panukila mo mongulu yaKalunga, ndele va kufa mo eeshali diyapuki domongulu yOmwene ndele ve di longifila ooBaal. 8 Hano palombwelo lohamba va pangela oshikefa ndele ve shi tula pondje poshivelo shongulu yOmwene. 9 Ndele va vilikila muJuda nomuJerusalem va etele Omwene oimaliwa oyo Moses, omupiya waKalunga e i lombwela Ovaisraeli mombuwa. 10 Opo nee ovakulunhu aveshe novanhu aveshe va hafa, ndele ve i eta ndele ve i ekela moshikefa fiyo sha yada. 11 Ndele alushe Ovalevi eshi va eta oshikefa kovakeleli va tulwa po kohamba, ndele va mona nokutya, oimaliwa i li mo ihapu, hamushanga wohamba nomupashukili a tulwa po komupristeli omukulunhu, va kufa mo oimaliwa moshikefa, ndele ve shi shunifa vali konhele yasho. Osho ngaha va ninga efiku nefiku ndele va ongela oimaliwa ihapu. 12 Nohamba naJehoiada ve i yandja kovalongifi ovo va pashukila oshilonga mongulu yOmwene. Ndele ovo va konga ovahongi vomamanya novahongi voiti va ningulule ongulu yOmwene, nosho yo ovahambwidi voivela naitwima va wapeke ongulu yOmwene. 13 Novalongifi voshilonga va diinina nawa, onghee oshilonga sha xuma komesho, ndele va wanifa ewapeko longulu yaKalunga pamhangela ya pangelwa ndele ve i wapeka. 14 Ndele vo eshi va mana, va etela ohamba naJehoiada oimaliwa oyo ya xupa po. Ndele oyo ya longifwa okuninga oinima yeyakulo noinima yeyambo noikwatelwa yoitwiminifo noinima yoingoldo noyoisiliveli. Ndele pomafiku aeshe aJehoiada va diinina okweetela ongulu yOmwene omaxwikiloyambo.

15 Ndele Jehoiada okwa kulupa nokwa kuta okukalamwenyo ndele ta fi. Omido daye pokufya kwaye da li efele nomilongo nhatu. 16 Nokwa pakwa peehamba moshilando shaDavid. Osheshi ye a ninga osho shiwa muIsrael naashi sha wapalela Kalunga nongulu yaye.

Joas ta fimaneke oihongwafano

17 Ndele konima yefyo laJehoiada, ovakulunhu vaJuda ve uya ndele tave linyongamene koshipala shohamba. Opo nee ohamba ye va uda, 18 ndele va efa ongulu yOmwene Kalunga kooxe ndele va fimaneka omiti domalupwelele daAsera noikalunga. Opo nee ehandu le uya kombada yaJuda noyaJerusalem omolwetimba lavo. 19 Ndele Ye okwe va tumina ovaxunganeki ve va alule kOmwene. Ndele ove va londwela, ndelenee inave va uda. 20 Opo nee Omhepo yaKalunga ya yada Sakaria, omona womupristeli Jehoiada, nokwa kala ofika mokati kovanhu ndele ta ti kuvo: “Kalunga osho ta ti: ‘Omolwashike nye tamu tauluka oipango yOmwene nye mu mone omupya! Shaashi nye mwa ekelashi Omwene, naye yo e mu ekelashi.’ ” 21 Opo nee ve mu hangakena ndele tave mu dipaa nomamanya kelombwelo lohamba molupale lokomesho yongulu yOmwene. 22 Nohamba Joas inai diladila ouwa ye u monifwa kuJehoiada, xe yaSakaria, ndelenee okwa dipaa omona waye omulumenhu. Ndelenee pokufya kwaye oye okwe i lombwela: “Omwene ne shi tale ndele ne shi handukile!”

23 Ndele pexulilo lomudo etanga lovakwaita vaAram le mu homona, ndele ve uya muJuda nomuJerusalem, ndele va dipaa ovakulunhu aveshe voshiwana ndele va tuma oixuulwa yavo aishe kohamba yomuDamaskus. 24 Nande metanga lOvaarami olo le uya mwa li ovakwaita vanini, Omwene okwa yandja momake avo omatanga manene, shaashi Ovajuda va efa Omwene Kalunga kooxe. Ndele va handukila Joas noku mu tokola.

25 Ndele vo eshi va dja po puye, osheshi ve mu fiya po momahepeko madjuwelela, ovapiya vaye ve mu hangakena omolwohonde yomona womupristeli Jehoiada. Ndele ve mu dipaela mombete yaye. Nokwa pakwa moshilando shaDavid. Ndelenee inave mu paka meembila deehamba. 26 Ndele ovo ve mu hangakena ovava: Sabad yaSimeat, omona womukainhu Omuammoni naJosabad yaSimrit, omona womukainhu Omumoabi. 27 Novana vaye ovalumenhu nomaxunganeko mahapu tae mu popi newapeko longulu yaKalunga, tala, oinima aishe ei oya shangwa membo lefatululo lomishangwa deehamba. Nomona waye Amasia okwa ninga ohamba ponhele yaye.