Joas ta ningi ohamba
1 Ndelenee momudo omutiheyali Jehoiada okwe linyatipaleka nokwa ninga ehangano novanefele Asaria yaJeroham naIsmael yaJohanan naAsaria yaObed naMaasea yaAdaja naElisafat yaSikri. 2 Ndele va endaenda muJuda ndele va ongela Ovalevi vomoilando aishe yomuJuda novakulunhu vomapata aIsrael. Ndele vo ove uya kuJerusalem. 3 Noshiongalele ashishe osha ninga ehangano nohamba mongulu yaKalunga. Opo nee Jehoiada ta ti kuvo: “Taleni, omona wohamba e nokuninga ohamba ngaashi Omwene a popya oludalo laDavid; 4 Mu nokuninga ngaha: Oshitukulwa shimwe shomoitukulwa itatu shomunye, ava mu nolufo okunangela mEshabata, mu nokunangela poivelo, ovo vomovapristeli nomOvalevi. 5 Noshitukulwa shimwe shomoitukulwa itatu shi nokunangela pongulu yohamba, noshitukulwa shimwe shomoitukulwa itatu shi nokunangela pOshivelo shEkanghameno, novanhu aveshe ve nokukala momalupale okomesho yongulu yOmwene. 6 Ndelenee paha kale nande umwe ta i mongulu yOmwene, ovapristeli nOvalevi ava ve li moilonga, vo nava ye mo, shaashi ovo ovayapuki. Ndelenee ovanhu aveshe ve nokudiinina omalombwelo Omwene. 7 NOvalevi ve nokukala ofika nokudingilila ohamba, keshe umwe e noiti yaye meke laye, ndele ou ta i mo mongulu, e nokudipawa, ndele mu nokukala pohamba, yo ngeenge tai piti mo ile tai uya mo.”
8 Ovalevi nOvajuda aveshe va ninga ngaashi omupristeli Jehoiada e va lombwela: keshe umwe okwa kufa ovalumenhu vaye, ava ve nolufo okunangela navenya va dimbuka okunangela mefiku lEshabata. Osheshi omupristeli Jehoiada ina lekela eengudu. 9 Nomupristeli Jehoiada okwa yandja kovanefele omaonga noikelelifo inini noikelelifo yohamba David, oyo ya li mongulu yaKalunga. 10 Nokwa tula po ovakwaita aveshe, keshe umwe noiti yaye meke laye, okudja kombinga youmbuwanhu wongulu fiyo okombinga yokoumbangalanhu wongulu, fiyo okoaltari nokongulu, va dingilila ohamba. 11 Opo nee Jehoiada okwa eta Joas pondje, nde te mu dike oshishani nokwe mu pa embo lomhango youhamba. Ndele ve mu ninga ohamba. Ndele Jehoiada novana vaye ovalumenhu ve i vaeka ndele tava ti: “Ohamba nai kale nomwenyo!” 12 Ndele Atalia, eshi a uda ondaka yovanhu tava tondoka ndele tava kuwilile ohamba, okwe uya kovanhu mongulu yOmwene. 13 Ndele eshi a mona ohamba tai kala ofika monhele ya tumba poshivelo, novakulunhu novashiki vomanghuma va kala ofika pohamba, novanhu aveshe vomoshilongo va hafa ndele tava shiki omanghuma, novaimbi noishikomwa, fimbo tava wilike eimbilo lehambelelo, Atalia ta pombaula oikutu yaye ndele ta ti: “Ekengelelo! Ekengelelo!”
14 Ndelenee omupristeli Jehoiada okwa li ina hala Atalia a dipaelwe popepi notembeli. Onghee a ifana eendjai doita, nde ta ti: “Mu kwateni, mu mu pitifeni mo a upatwa kovaameni vomikweyo mbali. Ndele dipaeni keshe ou ta kendabala oku mu xupifa.” 15 Opo nee ove mu kwata, ndele eshi va fika pomhito yOshivelo Sheenghambe mombala, ove mu dipaa. 16 Ndele Jehoiada okwa ninga ehangano pokati kaye mwene novanhu aveshe nokutya, vo va ninge ovanhu vOmwene. 17 Ovanhu aveshe va ya motembeli yaBaal, ndele tave i ngumauna po, nova tataula po oaltari noiyelekelafano, nova dipaela Mattan, omupristeli waBaal, komesho yoaltari. 18 Omupristeli Jehoiada okwa tula vali ovanangeli pongulu yOmwene ve li mepangelo lOvalevi, novapristeli ovo David e va tukula eengudu okuyamba omaxwikiloyambo Omwene mongulu yOmwene nehafo nomaimbilo panghedimhango yaDavid, ngaashi pa shangwa momhango yaMoses. 19 Nokwa tula yo ovanangeli voivelo poivelo yongulu yOmwene, opo paha kale nande umwe ta dulu okuuya mo ngeenge e linyateka moshinima shonhumba ile shongadi. 20 Nokwa kufa ovanefele novalumenhu ovanamadina naavo va li ovakulunhu vovanhu, novanhu aveshe vomoshilongo, ndele a kufa ohamba mongulu yOmwene. Ndele va ya mo mongulu yohamba, va pita moshivelo shopombadelela, ndele va kaleka ohamba kolukalwapangelo. 21 Novanhu aveshe vomoshilongo va hafa, noshilando sha tulumukwa. Ndelenee va dipaa Atalia neongamukonda.
© Oshikwanyama Bible Revised © Bible Society of Namibia, 2008, 2012.
