Oinakuwanifwa yovayakuli
1 Aveshe ava ve li mondjoko youpika, nava fimaneke shili oovene vavo, edina laKalunga nelongo opo liha shekifwe. 2 Ndelenee ava ve noovene vavo ovaitaveli, inave va dina, shaashi vo ovamwaxe, ndelenee nave va longele shili, osheshi vo ovaitaveli novaholike. Longa oinima ei nokukumaida.
Omakumaido nomapukululo
3 Ngeenge ope na ou ta nongeke shimwe shi lili ndele ita dame meendjovo edi diwa dOmwene wetu Jesus Kristus nomelongo lopatilokalunga, 4 oye ote linenepeke, ye ke na eendunge, ndelenee ota yenwa komapulapulo, eemhata nokomatomhafano muwo tamu di efupa nondubo nomatukafano nomalimbililo mai, 5 netamatamo lihe noshilonga movanhu ve neendunge da nyonauka, ndele va kanifa oshili ndele tava tale kutya, etilokalunga olo oshilikolifo shemona lomounyuni.
6 Heeno, etilokalunga olo eliko linene shili, shamha omunhu a wana naai yaye. 7 Osheshi fye inatu eta mo sha mounyuni, ndele itatu dulu okudja mo na sha. 8 Ndelenee ngeenge otu na oipalwifa noikutu, osho tuu nashi tu wanene. 9 Ndelenee ava va hala okupunapala, otava wile momahongaulo nomomwiyo nomouhalu uhapu woulai nowoiponga, tau ninginifa ovanhu menyonauko nomekano. 10 Osheshi olwisho loimaliwa olo efina lowii aushe, nomoku li haluka vamwe va puka mo meitavelo, ve lityuulifa nomaudjuu mahapu.Osheshi olwisho loimaliwa olo efina lowii aushe.
Olwoodi liwa leitavelo
11 Ndelenee oove, omunhu waKalunga, inda onhapo oinima ya tya ngaha, lalakanena ouyuki netilokalunga neitavelo nohole nelididimiko noutalanheni. 12 Kondja ekondjo liwa leitavelo, dama omwenyo waalushe we u ifanenwa ndele wa hepaulula ehepaululo liwa moipafi yeendobwedi dihapu. 13 Ohandi ku lombwele koshipala shaKalunga, ou omuyandji womwenyo kwaaishe noshaKristus Jesus, ou a hepaulula ehepaululo liwa koshipala shaPontius Pilatus, 14 nokutya, ove u diinine oshipango eshi uhe nonyata ile uhe noshipo fiyo okeholoko lOmwene wetu Jesus Kristus, 15 ou ta ka hololwa pefimbo laye kOmupangeli omunelao, ou Omupangeli aeke, Ohamba yeehamba adishe nOmwene woovene, 16 ou aeke ita fi noha kala mouyelelelela omu itamu shiiva okwiiwa, Oye ina monika nande okomunhu, Ye ita dulu okutalwa. Efimano olaye neenghono daalushe odaye. Amen.
Oipuna tai kumaidwa
17 Oipuna yomounyuni ou va kumaida, vehe linenepeke, navali vaha tule elineekelo lavo moupuna kau fi okulineekelwa, ndelenee nave lineekele Kalunga omunamwenyo, ou he tu pe pauyadi aishe yoku tu hafifa, 18 vo nava longe ouwa, va ninge oipuna yoilonga iwa, va ninge ovayandji nokutukulilafana, 19 vo ve lituvikilile emona tali ningi ekanghameno liwa laayo yokomesho, opo va mone omwenyo waalushe.
20 Heeno, Timoteus, tuvikila nokudiinina eshi we shi pewa, ove yepa omapopyaano a nyata noongaho neemhata doipupulu hadi tiwa eshiivo vati, 21 eshiivo eli la itavelwa kuvamwe, ava ve liteeka eitavelo.
Efilonghenda nali kale nanye.
© Oshikwanyama Bible Revised © Bible Society of Namibia, 2008, 2012.
