Outeku womeongalo
1 Omukulunhu ino mu hanyena pombada, ndelenee mu kumaida ngaashi xo; ovalumenhu ovanyasha ongaashi ovamwaxo, 2 ovakainhu ongaashi onyoko, ovanyasha ongaashi ovamwanyoko, omoukoshoki aushe.
3 Fimaneka ovafiyekadi, ava ovafiyekadi shili. 4 Ndelenee omufiyekadi ngeenge e nounona ile ovatekulu, vo nave lilonge tete okufila oshisho ovaneumbo lavo mouyuki nokwaalulila ovakulunhu vavo eyakulo liwa, osheshi osho sha wapala moipafi yaKalunga. 5 Ndele omufiyekadielela omulikaleli ota tula elineekelo laye muKalunga, ota kala mokwiilikana nomokwiindila oufiku nomutenya. 6 Ndelenee omuliefeli mouhalu oye okwa fya, nande oku nomwenyo. 7 Oinima ei i va lombwela yo, vaha kale ve noshipo. 8 Ndelenee ou iha file vakwao oshisho naunene ava vambulaye, ye okwe lidimbika eitavelo noku dulike kwaau ehe fi omwiitaveli.
9 Momuvalu namu shangelwe mo omufiyekadi ou aeke a ninga eedula omilongo hamano, ndele a kala omukainhu womulumenhu umwe, 10 ndele a hepaululwa a longa oilonga iwa ndele a tekula ounona vaye nokuyakula ovaenda, ndele a kosha eemhadi dovayapuki nokwa kwafa ovahepekwa, ndele okwa diinina oshilonga keshe shiwa.
11 Ndelenee ovafiyekadi ava ovanyasha va efa, osheshi ngeenge tava hangika kokahalu ndele tava kenyanana Kristus, ova hala okuhombolwa, 12 ndele tava i metokolo, osheshi ova ekelashi eitavelo lavo lotete. 13 Ndele vo otava ningi ovananyalo mokweendaenda nomaumbo, ndele havananyalo ashike, ndelenee otava popyaana notave litula moinima yovanhu ndele tava popi eendjovo dihe shi okupopiwa. 14 Onghee ame onda hala ovafiyekadi ava ovanyasha va hombolwe vo va dale ounona nova lele omaumbo avo, ndele vaha pe omunandubo omhito yokusheka. 15 Osheshi vamwe ova kanduka mo nokuli ndele ova shikula Satana. 16 Omulumenhu omwiitaveli nomukainhu omwiitaveli, ngeenge e novafiyekadi ve li puye, ye ne va kwafe, opo eongalo liha pyakidikwe kuvo, ndele oli nokukwafa ovafiyekadi vashili.
Ovakulunhu veongalo nhumbi ve nokukala
17 Ovakulunhu ava hava lele nawa, ove lilongela okufimanekwa shili, unene ava ve li moshilonga shondjovo ndele tava longo. 18 Osheshi omishangwa otadi ti: “Ongobe tai xu moshipale ino i manga komulungu,” nadikwao: “Omulongi okwe lilongela ondjabi yaye.” 19 Omukulunhu ngeenge ta hokololifwa, ino tambula eendjovo, okuninga pe na eendobwedi mbali ile nhatu 20 Ava hava nyono, va hanyena moipafi yovanhu aveshe, opo vakwao yo va kale va tila. 21 Ohandi ku anifa koshipala shaKalunga noshaKristus Jesus noshovaengeli ovahoololwa, ove u diinine oinima ei uhe na etokolo lasha, la tetekela oshinima ndele uha tongole ovanhu. 22 Ino endelela nande okutenheka omake oye komunhu, ove ino kwatafana nomatimba ovanhu vamwe. Lidiinina u kale omukoshoki. 23 Ino nwa vali omeva aeke, ndelenee nwa yo omaviinyu manini omolwoudu woye wendjadja nowoshifeta tashi ku hange efiku nefiku.
24 Omatimba ovanhu vamwe oku li poluhaela, notaa tetekele okupangulwa, ndele oo avamwe otae va shikula konima. 25 Osho tuu yo noilonga iwa oi li poluhaela, ndele naayo ihe li poluhaela itai dulu okukala ya hondama.
© Oshikwanyama Bible Revised © Bible Society of Namibia, 2008, 2012.
