Omufita novayakuliongalo
1 Ondjovo ei oyoshili, umwe ngeenge a hala oshilonga shoufitaongalo, oye okwe lihalela oshilonga shiwa. 2 Hano, omufitaongalo e nokukala omuhenashipo, omulumenhu womukainhu umwe aeke, omulidiliki, omunaendunge, omunaenghedi, e shii okuyakula ovaenda, e shii okulonga. 3 Hangholwe, hamunamhata, hamuluva, ndelenee omunambili, omunanheni, hamunalwisho woimaliwa, 4 ou e shii okupangela nawa eumbo laye mwene, ndele ta tekula nawa ounona vaye neenghedi da fimana meduliko. 5 Ndelenee ou ita dulu okutekula eumbo laye mwene, ota dulu ngahelipi okufila eongalo laKalunga oshisho? 6 Hapo e lidilulula, opo ehe linenepeke ndele ta wile metokolo laSatana. 7 Ndelenee e nokumona epopilo liwa kwaavo va li pondje, opo aha hangike komasheko nokomwiyo waSatana.
8 Osho yo ovayakuliongalo nava kale ve neenghedi da fimana vehe neendaka mbali, havapika voikolwifa, havakongi veliko loulunde, 9 ndelenee ovayakuliongalo ovadiinini voshiholekwa sheitavelo meliudo la koshoka. 10 Ndele naava yo nava talwe tete, nongeenge va monika vehe noshipo, opo nee tava shiiva okuyakula. 11 Osho yo ovakainhu vavo nava kale ve neenghedi da fimana, kave fi ovalundili, ndelenee ovalidiliki novadiinini moinima aishe. 12 Ovayakuliongalo ve nokukala ovalumenhu vomukainhu umwe auke, ve shii okutekula nawa ovana nomaumbo avo vene. 13 Osheshi ava tava yakula nawa, ovo tave limonene oulineekelwa muwa nouladi uhapu meitavelo lomuKristus Jesus.
Eongalo olo eumbo laKalunga
14 Ame ohandi ku shangele oinima ei metimaumbwile ndi uye diva kwoove. 15 Ndelenee ngee handi imbwa kusha, ove u kale u shi shii nhumbi ove mwene u nokukala meumbo laKalunga, olo eongalo laKalunga omunamwenyo, olo ongudi nekanghameno loshili. 16 Nosha shiivika nawa shili nokutya, oshiholekwa shelao lomuKalunga osho oshinene: Kalunga a holoka mombelela, okwa yukipalifwa mOmhepo, okwa monika kovaengeli, okwa udifilwa mokati koiwana, okwa itavelwa mounyuni, okwa tambulwa mefimano.
© Oshikwanyama Bible Revised © Bible Society of Namibia, 2008, 2012.
