1 SAMUEL 8 - Oshikwanyama Bible (OKYB)

Ovaisraeli va hala ohamba

1 Ndele Samuel eshi a kulupa okwa tula ovana vaye ovamati ngaashi ovatokoli vaIsrael. 2 Edina loshiveli shaye la li Joel nedina londenge yaye Abia, vo ovatokoli muBerseba. 3 Ndelenee ovana vaye ovamati inava enda neendjila daye. Vo va lalakanena omamona oulunde ndele va tambula eembubo ndele va pengifa ouyuki. 4 Opo nee ovakulunhu aveshe vaIsrael va ongala ndele tava i kuSamuel muRama, 5 ndele tava ti kuye: “Tala, ove wa kulupa, novana voye ovamati ihava ende neendjila doye. Tu pa hano paife ohamba, yo i tu pangele ngaashi oiwana aishe.” 6 Ndelenee eendjovo odo inadi wapalela Samuel, vo eshi va tya: “Tu pa ohamba, yo i tu pangele.” Ndele Samuel okwa indila kOmwene. 7 Opo nee Omwene ta ti kuSamuel: Pwilikina ovanhu mwaashishe tave shi ku lombwele, osheshi vo inave ku ekelashi, ndelenee va ekela nge shi ndiha kale ohamba yavo. 8 Ngaashi oilonga aishe ve i longa okudja kefiku linya nde va pitifa muEgipiti fiyo onena eli, vo eshi va efa nge nokulongela oikalunga imwe, osho have ku ningile yo. 9 Va uda hano: va londwela shili noku va shiivifila eenghedimhango dohamba oyo tai ke va pangela.

10 Eendjovo adishe dOmwene Samuel e di lombwela ovanhu ava va li va indila ohamba kuye. 11 Ndele ye okwa tya: “Eenghedimhango dohamba oyo tai ke mu pangela odedi: Ovana veni ovamati, otai ke va kufa ndele tai va pe oilonga yopetemba layo nopeenghambe dayo, va tondoke komesho yetemba layo. 12 Yo otai va ningi ovakulunhu veyovi novakulunhu vomilongo nhano, nokupulula epya layo nokuteya oilya yayo noku i tuvikila, ndele vo ve noku i ningila oilwifo yayo noinima yomatemba ayo olwoodi. 13 Novana veni oukadona otai ke va kufa va ninge ovalungi voityakela yokuvava novateleki veendja novateleki vomungome. 14 Ndele tai ka kufa mo osho shiwelela momapya eni nomoikokola yeni yomiviinyu nomomalumono eni, ndele tai shi yandje kovapiya vayo. 15 Ndele tai ka kufa oitimulongo mwaayo mwe i kuna moikokola yeni yomiviinyu ndele tai i yandje komalenga ayo nokovapiya vayo. 16 Ndele tai ka kufa ovapika veni ovalumenhu novakainhu novanyasha veni ava vawelela neendongi deni noku di longifa moilonga yayo. 17 Yo otai ka kufa oitimulongo moimuna yeni, nye vene tamu ka kala ovapika vayo. 18 Ndele mefiku tuu olo tamu ka kuwa omolwohamba mwe i lihoololela, ndelenee mefiku olo Omwene ite ke mu uda.” 19 Ndelenee ovanhu va anya okuuda Samuel ndele tava ti: “Ahowe, ndelenee tu nokupewa ohamba. 20 Fye opo tu kale ngaashi oiwana aishe, opo ohamba i tu pangele, ndele tai tu kwatele komesho ndele tai tu pitile komesho mokushinga oita.” 21 Ndele Samuel okwa uda eendjovo adishe dovanhu, ndele e di lombwela Omwene. 22 Opo nee Omwene ta ti kuSamuel: “Va uda u va pe ohamba i va pangele.” Ndele Samuel okwa lombwela ovalumenhu Ovaisraeli ndele ta ti: “Indeni, keshe umwe koshilando shavo.”