1 SAMUEL 31 - Oshikwanyama Bible (OKYB)

Efyo laSaul nolovana vaye

1 Fimbo Ovafilisti va lwifa Ovaisraeli, ovakwaita vOvaisraeli va ya onhapo Ovafilisti, oimhu yovadipawa ya nangala keemhunda daGilboa. 2 NOvafilisti va shikula Saul novana vaye ovamati. NOvafilisti va dipaa Jonatan naAbinadab naMalkisua, ovana vaSaul. 3 Ndele olwoodi eshi la ninga lidjuu okulwifa Saul, novakwaita ve nomauta ve mu mona, ye okwa kakama molwoumbada ovakwaita vomauta eshi ve mu fininika. 4 Ndele Saul okwa lombwela omuhumbati woiti yaye: “Pweya mo eongamukonda loye u twe nge nalo, opo venya inava pita etanda vehe uye okutwa nge, ndele vaha sheke nge.” Ndele omuhumbati woiti yaye ina hala, osheshi a tila unene. Onghee hano Saul okwa kufa eongamukonda nokwe litwa nalo. 5 Omuhumbati woiti yaye eshi a mona Saul fya, naye mwene yo okwe litwa neongamukonda nokwa fya pamwe naye. 6 Osho ngaha hano Saul novana vaye ovamati vatatu nomuhumbati woiti yaye novalumenhu vaye aveshe va fya mefiku limwe alike, aveshe kumwe. 7 Opo nee ovalumenhu Ovaisraeli ovo va kala kombinga inya yoluhaela nokombinga inya yaJordan va mona nokutya, ovalumenhu Ovaisraeli va ya onhapo, naSaul novana vaye ovamati va fya, ndele va fiya po oilando yavo ndele va ya onhapo. NOvafilisti ve uya ndele va tula mo muyo.

8 NOvafilisti eshi ve uya mefiku la shikula va dule oonakudipawa, va mona Saul novana vaye ovalumenhu vatatu va nangala keemhunda daGilboa. 9 Ndele va teta ko omutwe waye ndele va kufa po oiti yaye ndele ve i tuma koshilongo shOvafilisti i etele oikalunga yavo novanhu ondaka yehafo. 10 Opo nee va tula oiti yaye motembeli yaAstarot, ndelenee oshimhu shaye ve shi tula mohotekuma yaBet-San. 11 Oonakukala muJabes shomuGilead, eshi va uda Ovafilisti eshi va ningila Saul, 12 ovaladi aveshe va fikama ndele va enda oufiku aushe, ndele va kufa ko kohotekuma yaBet-San oshimhu shaSaul noimhu yovana vaye ovamati, ndele ve uya kuJabes, nove i xwika po. 13 Ndele va kufa omakipa avo ndele ve a paka momuti womutamarisk womuJabes, ndele ve lidilika omafiku aheyali.