1 SAMUEL 30 - Oshikwanyama Bible (OKYB)

David ta taataa Ovaamaleki ava va xwika po Siklag

1 Nefiku etitatu David novalumenhu vaye eshi ve uya kuSiklag, Ovaamaleki va li va homona oshilongo shokoumbuwanhu waSiklag, ndele va teya Siklag ndele ve shi xwika po. 2 Ndele venya va twala ovakainhu naaveshe ava va li mo nokutya, ouhanana novakulunhu ngaashi eenghwate. Inava dipaa nande umwe, ndelenee ve va kufa ndele va twikila ondjila yavo. 3 David novalumenhu vaye eshi ve uya moshilando, osho sha li po sha xwikwa po nomundilo, ndele ovana vavo ovamati noukadona va twalwa ngaashi eenghwatwe. 4 Opo nee David novakwaita vaye ava va li puye va yelula ondaka yavo ndele tava lili fiyo va loloka okulila. 5 Novalikadi vavali vaDavid, Ahinoam wokuJisreel naAbigail, omwalikadi waNabal, Omukarmel, ova twalwa yo ngaashi eenghwatwe. 6 Ndele David okwa li moudjuu muhapu, osheshi ovakwaita va popya kutya na dipawe nomamanya. Osheshi eemwenyo dovakwaita aveshe da li di udite ouyehame, keshe umwe molwovana ovamati vaye noukadona vaye. Ndelenee David okwe lipameka mOmwene Kalunga kaye. 7 Ndele David ta ti komupristeli Abjatar yaAhimelek: “Etele nge oshikutu shokomapepe.” Opo nee Abjatar a etela David oshikutu shokomapepe. 8 Ndele David okwa pula kOmwene ndele ta ti: “Ame ohandi ka shikula tuu ongudu oyo? Ohandi ke i hanga tuu?” Ndele Ye ta ti kuye: “I shikula, osheshi to ke i hanga shili ndele to ka xupifa mo venya.” 9 Opo nee David a fikama pamwe novalumenhu vaye omafele ahamano, ava va li puye. Ndele eshi ve uya kokamulonga Besor, ava va loloka, va fyaala po. 10 Osheshi David a shikula venya novalumenhu omafele ane, fimbo ovalumenhu omafele avali va kala konima, ava va li va loloka, va nyengwa okutauluka okamulonga Besor.

11 Opo nee va mona moixwa Omuegipiti umwe, ou ve mu eta kuDavid, ndele ve mu pa omingome a lye nomeva a nwe. 12 Ve mu pa vali oshikambi sheenghwiyu noikuki ivali yeeviinyu. Ndele ye eshi a lya omwenyo waye wa mona eenghono. Osheshi momafiku atatu nomaufiku atatu ina lya omungome ndele ina nwa omeva. 13 Ndele David te mu pula: “Oove lyelye? Ndele wa dja peni?” Ndele ye ta ti: “Aame omumati Omuegipiti, omupika womulumenhu Omuamalek. Nomwene wange okwa fiya nge po eshi nda kwatwa koudu; paife pa pita omafiku atatu. 14 Fye twa homona oshilongo shOvakereti kombinga yokoumbuwanhu noshilongo shokoumbuwanhu waJuda noshilongo shokoumbuwanhu waKaleb, ndele twa xwika po Siklag nomundilo.” 15 Ndele David te mu pula ta ti: “Ove to twala nge tuu kongudu oyo?” Ye ta ti: “Anene nge puKalunga nokutya, ito dipaa nge ndele ito yandje nge momake omwene wange. Opo nee ame ohandi ke ku twala kongudu oyo.” 16 Ndele ye eshi e mu twala ko, venya va li ve lihanena akushe moluhaela, va li tava li ndele tava nu, ndele tava dana oshivilo molwoixuulwa aishe inene ve i kufa moshilongo shOvafilisti nomoshilongo shaJuda.

17 Ndele David okwe va taataa okudja koshiwiwili shonguloshi fiyo onguloshi yefiku la shikula, inapa xupifwa nande umwe ponho yovamati omafele ane, ava va londa eengamelo ndele va ya onhapo. 18 Osho ngaha David a xupifa aveshe ovo Ovaamaleki va kufile. Novalikadi vaye vavali yo David e va xupifa. 19 Muvo inamu yongolwa nande umwe, okahanana ile omukulunhu, ovana ovamati ile oukadona ile shimwe shomoixuulwa, nande shimwe shomwaashishe venya va ile nasho. David okwa alula ashishe. 20 Ndele David okwa kufa oimuna aishe neengobe. Vo ove i pitifa komesho yoimuna ikwao ndele tava ti: “Oyo oixuulwa yaDavid.” 21 David eshi e uya kovalumenhu omafele avali venya va li va loloka inava shiiva okushikula David, ava va fiwa po pokamulonga kaBesor, vo ova fikama va ka shakeneke David novakwaita vaye, ava va li puye. Ndele David novakwaita vaye va ehena popepi ndele ve va kunda. 22 Opo nee ovanhu vai aveshe novakolokoshi vomovalumenhu ovo va ile pamwe naDavid, va hovela okupopya, tava ti: Shaashi nye inamu enda pamwe nafye, fye itatu ke mu pa sha shomoixuulwa oyo twe i kwata. Ndelenee vo, keshe umwe, nava pewe omwalikadi waye novana vaye, ndele nava ye nondjila yavo. 23 Ndelenee David okwa tya: “Ovakwetu, inamu ninga ngaha noinima oyo Omwene e tu pa. Ye okwe tu amena ndele okwa yandja momake etu ongudu oyo ye tu homona. 24 Ndele olyelye ngeno te mu udu moshinima eshi? Osheshi ngaashi oshitukulwa shaau ta i kolwoodi, nosho yo oshitukulwa shaau ta kala ponghuta. Nai tukulwe i fike pamwe.” 25 Osho sha kala okudja efiku linya nokomesho. Heeno, ye e shi pameka ngaashi onghedimhango nelombwelo laIsrael fiyo onena eli.

26 David eshi e uya kuSiklag, okwa kufa imwe yomoixuulwa nokwe i tuma kovakulunhu vaJuda, kovakwanepata vaye, ndele ta ti: “Oyo oshali yeni yomoixuulwa yovatondadi vOmwene.” 27 Okwe i tumina ovanhu vomuBetel, ovanhu vomuRamot moshilongo shokoumbuwanhu waJuda, nokovanhu vomuJattir, 28 Aroer, Sifmot, Estemoa, 29 Ragal, Ovajerahmeel naava vomomikunda daKehi 30 Horma, Bor-Asan, novomuAtak, 31 vomuHebron nokeenhele adishe David novalumenhu vaye va endele ko.