1 SAMUEL 15 - Oshikwanyama Bible (OKYB)

Saul nOvaamaleki

1 Opo nee Samuel ta ti kuSaul: “Omwene okwa tuma nge ndi ku vaeke u ninge ohamba yoshiwana shaye shOvaisraeli. Pwilikina hano paife eendjovo dOmwene. 2 Omwene womatanga ovakwaita ta ti ngaha: Ame nda dimbulukwa osho Ovaamaleki ve shi ningila Ovaisraeli, vo eshi ve ve lidengifa mondjila, Ovaisraeli eshi va dja kuEgipiti. 3 Inda hano paife u ka taatae Ovaamaleki ndele mu nokuhanauna po ashishe ve shi kwete. Ndele ino va fila onghenda, ndelenee u nokudipaa omulumenhu nomukainhu, okaana nokahanana, ongobe nodi, ongamelo nondongi.” 4 Opo nee Saul a ifana ovakwaita nokwe va talatala muTelaim. Ovalumenhu vokolupadi omayovi omafele avali novalumenhu vomuJuda omayovi omulongo. 5 Ndele Saul eshi e uya koshilando shOvaamaleki ndele a tula ehonyeno mefilu, 6 Saul ta ti kOvakeni: “Djeni po, tukaukeni nOvaamaleki, ndihe mu hanaune po pamwe navo; osheshi nye omwa fila onghenda ovana aveshe Ovaisraeli eshi va dja muEgipiti.” Opo nee Ovakeni ve litukauka nOvaamaleki. 7 Ndele Saul okwa taataa Ovaamaleki okudja kuHavila fiyo okombinga yaSur, osho shi li moushilo waEgipiti. 8 Ndele ye okwa kwata Agag, ohamba yOvaamaleki, ndele ovanhu aveshe e va dipaa po keongamukonda. 9 Ndelenee Saul novakwaita va xupifa Agag needi diwelela unene neengobe naado diwa kanini noudjona naashishe eshi shiwa, inava hala oku shi hanauna po. Ndelenee oinima aishe yongaho noihe na vali oshilonga shasha, ove i hanauna po. 10 Nondjovo yOmwene ye uya kuSamuel ndee ta ti: 11 “Ame nda nyika oluhodi, eshi nda ninga Saul ohamba, osheshi okwe liteeka nge ndele ina wanifa eendjovo dange.” Opo nee Samuel a ninga omwenyo mwii nokwa kuwa kOmwene oufiku aushe. 12 Ndelenee ongula inene Samuel okwa pyakuduka a ka shakene naSaul. Ndele Samuel a shiivifilwa nokutya Saul okwe uya kuKarmel nokwe lidikila ko edimbulukifomanya. Ndele ye okwa dja ko nokwa enda po, ta i kuGilgal. 13 Samuel eshi e uya kuSaul, Saul ta ti kuye: “Ove u nangekwe noupuna kOmwene. Ame nda wanifa ondjovo yOmwene.” 14 Opo nee Samuel ta pula: “Ndelenee ekweno eli leedi tali uya momatwi ange olashike, neulo leengobe eli ndi udite olashike?” 15 Ndele Saul ta ti: “Vo ove di kufa kOvaamaleki, osheshi ovakwaita va xupifa eedi neengobe diwelela ve di yambele Omwene Kalunga koye. Ndelenee dikwao twe di hanauna po.” 16 Opo nee Samuel ta ti kuSaul: “Mwena, opo ndi ku shiivifile odo Omwene e di lombwela nge oufiku wonena.” Ndele ye okwe mu nyamukula: “Popya!” 17 Ndele Samuel ta ti: “Oove omutwe womapata Ovaisraeli, nande ove oumuxupi momesho oye mwene. Omwene e ku vaeka u ninge ohamba yOvaisraeli. 18 Nomwene okwe ku tuma mondjila ndee ta ti: ‘Inda u ka hanaune po ovalunde Ovaamaleki u va lwife fiyo va pwa po.’ 19 Omolwashike hano ino dulika kondaka yOmwene; ndelenee wa hakana oixuulwa, ndele mwa ninga eshi inashi yuka momesho Omwene?” 20 Opo nee Saul ta ti kuSamuel: “Ame nda dulika kondaka yOmwene ndele nda ya mondjila omo Omwene a tumine nge, ndele nda eta Agag, ohamba yOvaamaleki. Ndele nda hanauna po Ovaamaleki. 21 Ndelenee ovakwaita va kufa moixuulwa eedi neengobe, odo diwa domeexuulwa, ve di yambele Omwene Kalunga koye muGilgal.” 22 Opo nee Samuel ta ti: “Omwene a hokwa ngeno omaxwikiloyambo nomatomenoyambo ngaashi a hokwa eduliko, okudulika kondaka yOmwene? Tala, okudulika ku dule etomenoyambo nokuuda ko ku dule omakaadi eedi deemhedi. 23 Osheshi okuhadulika okwo etimba ngaashi enyanekelo, nokwaanya oko owii nokufimaneka oikalunga. Ove eshi wa ekelashi ondjovo yOmwene, naye e ku ekelashi yo, uha kale vali ohamba.”

24 Opo nee Saul ta ti kuSamuel: “Ame nda nyona, eshi nda tauluka elombwelo lOmwene neendjovo daye, osheshi nda li nda tila ovakwaita, ndele nde va itavela. 25 Dimine nge po etimba lange u shune pamwe naame ndi shiive okulinyongamena Omwene.” 26 Ndelenee Samuel ta ti kuSaul: “Ame itandi ka shuna naave, shaashi wa ekelashi ondjovo yOmwene ndele paife Omwene e ku ekelashi, ito kala vali ohamba yOvaisraeli.” 27 Samuel eshi a piluka a ye, Saul okwa kwata komunghulo woshikutu shaye shokombada, ndelenee sho osha pombauka. 28 Ndele Samuel ta ti kuye: “Onena eli Omwene okwe ku pombola mo mouhamba woye wOvaisraeli nokwe u pa mukweni ou e ku dule ouwa. 29 Nefimano lOvaisraeli, ita fufya ndele ite lialuluka. Osheshi ke fi omunhu Ye e lialuluke ngeno” 30 Ndele ye ta ti: “Ame nda nyona. Fimanekife nge nena moipafi yovakulunhu vovanhu vange Ovaisraeli, ove u shune pamwe naame, ndi shiive okulinyongamena Omwene Kalunga koye.” 31 Opo nee Samuel okwa shuna nokwa shikula Saul. Ndele Saul okwe linyongamena Omwene. 32 Opo nee Samuel ta ti: “Etelei nge Agag, ohamba yOvaamaleki.” Fimbo Agag e uya nehafo koshipala shaye, Agag ta ti: “Oshili oululu wefyo wa kanduka po.” 33 Ndelenee Samuel okwa tya: “Ngaashi eongamukonda loye la nyeka ovalikadi ovana, osho yo nyoko ta ka kala ehe novana mokati kovakainhu.” Opo nee Samuel a tetaula Agag oinhimbu moipafi yOmwene muGilgal.

34 Opo nee Samuel a ya kuRama, ndele Saul okwa ya keumbo kuGibea. 35 Ndele Samuel ina mona vali Saul fiyo efiku lefyo laye, osheshi Samuel a nyika oluhodi omolwaSaul. NOmwene okwe livela ombedi molwaSaul, eshi e mu ninga ohamba yOvaisraeli.