1 EEHAMBA 2 - Oshikwanyama Bible (OKYB)

Eendjovo daxuuninwa daDavid nefyo laye

1 Nomafiku aDavid okufya eshi a ehena popepi, ye okwa lombwela omona waye Salomo ndele ta ti: 2 “Ame ohandi ka ya nondjila younyuni aushe; kala wa pama, omulumenhwelela, 3 diinina omhango yOmwene Kalunga koye mokweenda neendjila daye nomokuwanifa eenghedimhango daye noipango yaye nomalombwelo aye nomahepaululo aye, ngaashi a shangelwa momhango yaMoses, opo u kale nelao mwaashishe to longo nokeshe apa to ende po. 4 Omwene opo a wanife ondjovo yaye, Ye a lombwela nge, nokutya: Ovana voye ovamati ngeenge tava pashukile ondjila yavo mokudiinina okweenda koshipala shange nomitima davo adishe neemwenyo davo adishe, opo nee omulumenhu ita ka pumba ou ta ka kala omutumba kolukalwapangelo laIsrael. 5 Ndele ove mwene yo u shi shii Joab yaSeruja, osho e shi ningila nge. Osho e shi ningila eendjai mbali daIsrael, Abner yaNer naAmasa yaJeter. Nhumbi ye e va dipaa nokwa tilashi ohonde yomoita mefimbo lombili nokunyatekifa nohonde yomoita omwiya waye womoshiya neenghaku dokeemhadi daye. 6 Longa hano paendunge doye, neenghwakutoka daye ino di efa di kulukile nombili moshovafi. 7 Ndelenee ovana ovamati vaBarsillai, Omugilead, u noku va fila onghenda, vo ve nokukala vomongudu oyo tai li poshililo shoye, osheshi naavo yo ve uya okukwafa nge ame eshi nda ya onhapo omumwanyoko Absalom. 8 Pwoove ope na vali Simei yaGera, Omubenjamin womuBahurim, ye okwa tuka nge nai, oixuna yongaho, efiku linya nda ya kuMahanaim. Nokwe uya okushakeneka nge puJordan, onghee nde mu anena kOmwene nda tile: ‘Ame ihandi ku dipaa neongamukonda.’ 9 Ndelenee ove ino mu efa a kale ina handukilwa, osheshi ove omulumenhu omunaendunge, ndele u shi shii osho u noku mu ningila, opo eenghwakutoka daye u di kulukilifile moshovafi pamwe nohonde.” 10 Opo nee David a ka nangala pooxe nokwa pakwa moshilando shaDavid. 11 Nomafiku oo David a pangela Israel a li omido omilongo nhee. Okwa pangela muHebron omido heyali, nomuJerusalem omido omilongo nhatu nanhatu.

Adonia, Abjatar, Joab naSimei tava handukilwa

12 Opo nee Salomo okwa ka kala omutumba kolukalwapangelo laxe David, nouhamba waye wa pamekwa nawa shili. 13 Opo nee Adonia yaHaggit e uya kuBatseba, ina yaSalomo. Ye okwe mu pula: “To uya tuu nombili?” Ndele okwa nyamukula: “Ombili!” 14 Ye ta ti vali: “Ame ndi nondjovo naave.” Ndele winya ta ti: “Popya.” 15 Nena okwa tya: “Ou shi shii nokutya, ouhamba wa li wange, nOvaisraeli aveshe va tala nge ame ndi ninge ohamba. Ndelenee ouhamba wa dja po pwaame ndele wa ninga womumwatate, osheshi osho sha dja kOmwene. 16 Paife eindilo limwe alike handi li ku indile. Ino li anyena nge.” Ndele ye okwe mu nyamukula: “Popya.” 17 Opo nee ye ta ti: “Popya nohamba Salomo, osheshi yo itai ku anyene sha, ame ndi pewe kuye Abisag, Omushunemi, omwalikadi.” 18 Ndele Batseba ta ti: “Eewa, ame ohandi ka popya nohamba noku ku popila.” 19 Batseba eshi a ya mo kohamba Salomo a ka kundafane nayo omolwaAdonia, ohamba ya fikama ye mu shakeneka ndele ye linyongamena moipafi yaye. Opo nee yo ya kala omutumba kolukalwapangelo layo, noshipundi sha etelwa ina yohamba. Nokwa kala omutumba kolulyo layo. 20 Opo nee ye ta ti: “Ondi nokaindilo kanini kwoove. Ino ka anya.” Nohamba ye mu nyamukula tai ti: “Pula hano, meme, osheshi ihandi ke shi ku anyena.” 21 Ndele ye ta ti: “Adonia omumwanyoko na pewe Abisag, Omushunemi, a ninge omwalikadi waye.” 22 Opo nee ohamba Salomo tai nyamukula ndele tai ti kuina: “Ndelenee omolwashike to indilile Adonia Abisag Omushunemi? Mu indilila yo ouhamba, osheshi ye omumwatate omukulu wange, heeno, mu indilila ye mwene, nomupristeli Abjatar naJoab yaSeruja!” 23 Nohamba Salomo ya anena kOmwene ndele tai ti: “Oshili, Kalunga na handukile nge nena nokomesho, Adonia ngeenge ita futu nomwenyo waye, osho e shi popya. 24 Ndele paife, oshili ngaashi Omwene e nomwenyo, ou a pameka nge nokwa kaleka nge kolukalwapangelo latate David, ou a dika epata lange paudaneko laye, onena eli Adonia e nokufya!” 25 Nohamba Salomo ya tuma koBenaja yaJehoiada. Ye mu nhukila, ndele ta fi.

26 Nohamba ya lombwela omupristeli Abjatar ndele tai ti: “Inda kepya loye lomuAnatot, osheshi ove we lilongela okufya. Ndelenee nena itandi ku dipaa, osheshi ove wa humbata oshikefa shOmwene Kalunga moipafi yatate David nosho wa humbata oudjuu aushe tate kwa li e nokuhumbata.” 27 Osho ngaha hano Salomo okwa taataa Abjatar, ye ina kala vali omupristeli wOmwene, opo ondjovo yOmwene i wanifwe, Ye e i popila epata laEli muSilo.

28 Joab eshi a uda eenghundana odo (osheshi Joab a ama kuAdonia, hano okwa li ina ama kuAbsalom), Joab a ya onhapo metwali lOmwene nokwa kwata eembinga doaltari. 29 Ndele va lombwela ohamba Salomo: “Joab okwa ya onhapo metwali lOmwene, ndele tala, ye e li poaltari!” Opo nee Salomo a shiivifila Benaja yaJehoiada: “Inda ko, u mu dipae!” 30 Opo nee Benaja e uya ketwali lOmwene ndele ta ti kuye: “Ohamba tai ti: ‘Dja mo.’ ” Ndelenee ye ta ti: “Ahowe, osheshi nda hala okufila apa!” Ndele Benaja okwa tuma kohamba enyamukulo ndele ta ti: “Osho ngaha Joab a popya, nosho a nyamukula nge.” 31 Opo nee ohamba ye mu lombwela: “Ninga ngaashi a popya. Mu dipaa, ndele mu paka, opo u futile po ohonde ei Joab a tilashi, ihe netimba mwaame nomepata letu. 32 Opo ohonde yaye Omwene e i alulile komutwe waye mwene, eshi a nhukila ovalumenhu vavali, ovo va li ovayuki novawa, ve mu dule. Ndele e va dipaa neongamukonda fimbo tate David ine shi shiiva: Abner yaNer, ondjai yaIsrael, naAmasa yaJeter, ondjai yaJuda. 33 Ohonde yavo nai ye komutwe waJoab nokoludalo laye fiyo alushe. Ndelenee David noludalo laye nepata laye nolukalwapangelo laye, nali mone ombili yOmwene fiyo alushe.” 34 Opo nee Benaja yaJehoiada a ya ko, e mu nhukila nokwe mu dipaa. Ndele a pakwa meumbo laye mombuwa.

35 Opo nee ohamba ya lenga Benaja yaJehoiada, a ninga ondjai yovakwaita ponhele yaJoab. Ndele omupristeli Sadok okwa tulwa kohamba ponhele yaAbjatar.

36 Ohamba ya ifana vali Simei, ndele tai ti kuye: “Litungila ongulu muJerusalem u kale mo, ndele ino dja mo nande. 37 Efiku olo to di mo ndele to tauluka okamulonga Kidron, kala u shi shii, ou nokufya shili. Ohonde yoye tai ka kala kombada yomutwe woye.” 38 Ndele Simei ta ti kohamba: “Eewa. Ngaashi omwene wange ohamba ya popya, osho omupiya woye ta ka ninga.” Ndele Simei okwa kala omafiku mahapu muJerusalem. 39 Ndelenee omido nhatu, eshi da pita, ovapika vavali vaSimei ve livaka mo, va ya kuAkis yaMaaka, ohamba yaGat. Ndele Simei a shiivifilwa nokutya ovapika vaye ve li muGat. 40 Opo nee Simei okwa fikama ndele ta mange ondongi yaye ndele ta i kuGat kuAkis a ka konge ovapika vaye; ndele okwa ya nokwa eta ovapiya vaye vomuGat. 41 Ndelenee Salomo okwa lombwelwa nokutya, Simei a dja mo muJerusalem nokwa ile kuGat, 42 opo nee ohamba ya ifana Simei ndele ta ti kuye: “Inandi ku anena kOmwene noku ku londwela nokutya: ‘Efiku tuu olo to di mo ndele keshe apa to i, kala u shi shii, u nokufya shili?’ Ndele wa lombwela nge: ‘Eewa, nda uda ko.’ 43 Omolwashike hano ino diinina eano we li anena kOmwene noshipango nde shi ku lombwela?” 44 Ohamba ya lombwela vali Simei, tai ti: “Ove mwene wa shiiva owii aushe womomutima woye, wa ningila tate David, onghee hano Omwene ta alulile komutwe woye mwene owii woye. 45 Ndele ohamba Salomo na nangekwe noupuna nolukalwapangelo laDavid nali kale la pama koshipala shOmwene fiyo alushe.” 46 Opo nee ohamba ya lombwela Benaja yaJehoiada. Ye okwa ya nokwe mu nhukila ndele ye okwa fya.

Ndele ouhamba wa pamekwa meke laSalomo.