Ovalongi ovanaipupulu
1 Ovaholike, inamu itavela keshe omhepo, ndelenee yelekeni eemhepo, ngeenge oda dja tuu muKalunga; osheshi ovaxunganeki ovanaipupulu vahapu ova ya mounyuni. 2 Omhepo yaKalunga omwe i shiiva: keshe omhepo tai hepaulula Jesus Kristus kutya, e uya mombelela oyo yomuKalunga; 3 ndele keshe omhepo itai hepaulula Jesus Kristus, oyo inai dja muKalunga; oyo omhepo yaantikristus, oye ou mwe mu uda te uya, oye oku li paife nokuli mounyuni.
4 Ovamwange, nye omwa dja muKalunga nomwa finda venya, osheshi ou a kala munye oye omunene e dule winya a kala mounyuni. 5 Venya ovomounyuni, onghee otava tongo paunyuni, nounyuni ohau va udu. 6 Ofye ovomuKalunga. Ou a shiiva Kalunga, oye he tu udu, ndele ou ehe fi womuKalunga oye ihe tu udu. Opo tuu opo hatu shiiva omhepo yoshili nomhepo yepukifo.
Kalunga Oye ohole
Okuhola Kalunga nokuhola ovamwatate
7 Ovaholike, tu holafaneni, osheshi ohole oya dja muKalunga, ndele keshe ou e nohole, oye a dalwa muKalunga nokwa shiiva Kalunga. 8 Ndele ou ehe nohole, oye ina shiiva Kalunga, osheshi Kalunga Oye ohole. 9 Omo tuu omo ohole yaKalunga ye tu hololelwa, Kalunga eshi a tuma Omona waye Ewifa mounyuni, opo tu kale tu nomwenyo muye. 10 Opo tuu opo ope nohole, fye eshi twa kala tu hole Kalunga, ndelenee Oye a kala e tu hole nokwa tuma Omona waye a ninge ekulilo lomatimba etu.
11 Ovaholike, Kalunga eshi a kala e tu hole ngaha, hano nafye yo otu nokukala tu holafane. 12 Kape na nande umwe a mona Kalunga nande efiku limwe. Ngeenge hatu kala nokuholafana, opo nee Kalunga ota kala mufye nohole yaye ya wanenena mufye.
13 Opo tuu opo hatu dimbulukwa nokutya, fye ohatu kala muye ndele ye ta kala mufye, osheshi Oye okwe tu pa mOmhepo yaye. 14 Nafye yo otwe shi mona nohatu shi hepaulula, nokutya Xe okwa tuma Omona a ninge Omukulili wounyuni. 15 Ndele ou ta hepaulula Jesus Oye Omona waKalunga, Kalunga ota kala muye naye muKalunga. 16 Fye otwa longwa okushiiva nokwiitavela ohole ei Kalunga e i kwete noku tu hola.
Kalunga Oye ohole, naau ha kala mohole, oye ta kala muKalunga, Kalunga nota kala muye. 17 Osho ngaha ohole ya wanifilwa mufye opo tu kale tu neyombamo mefiku letokolo; osheshi ngaashi Oye e li, nafye yo osho tu li mounyuni ou. 18 Oumbada kau mo mohole, osheshi ohole ya wana ya pwa ohai te mo oumbada, osheshi moumbada omu nehandukilo, naau ha tila, oye ina wanena mohole. 19 Ofye otu mu hole, osheshi Oye a kala e tu hole tete. 20 Ngeenge ope na ou ta ti: Ame ondi hole Kalunga, ndele ta tondo omumwaxe, ye omunaipupulu. Osheshi ou ehe hole omumwaxe, nande e mu wete, oye ita dulu okuhola Kalunga ehe mu wete. 21 Noshipango eshi twe shi pewa kuye nokutya, ou e hole Kalunga, na hole yo omumwaxe.
© Oshikwanyama Bible Revised © Bible Society of Namibia, 2008, 2012.
