Ovana vaKalunga novana vomuyelani
1 Taleni, ohole i fike opo Tate e tu pa, eshi hatu ifanwa ovana vaKalunga; ngaashi tu li yo. Onghee hano ounyuni inau tu shiiva, osheshi oo inau mu shiiva yo. 2 Ovaholike, paife otu li po ovana vaKalunga, ndele inashi holoka natango kutya, ohatu ka kaleni twa tya ngahelipi. Fye otu shi shii, Ye nge ta holoka, ohatu ka kaleni twe mu fa, osheshi fye ohatu ke mu mona ngaashi e li. 3 Ndele keshe tuu ou e nelineekelo eli oku mu lineekela ote liyelifa, ongaashi Ye a yela.
4 Keshe tuu ou ta longo oulunde, oye ta nyono yo omhango, osheshi oulunde oo okunyona omhango. 5 Ndele nye omu shi shii, Oye a holoka a kufe po omatimba; nomuye kamu na oulunde. 6 Keshe tuu ou ha kala muye, oye ita longo oulunde; keshe ou ha longo oulunde, oye ine mu mona ndele ine mu shiiva.
7 Ovamwange nye, muha pukifwe nande okulyelye! Ndele ou ha longo ouyuki, oye omuyuki, ngaashi Oye omuyuki. 8 Ndele ou ha longo oulunde, okwa dja muSatana, osheshi Satana nghee tuu a dja kehovelo, oha longo oulunde. Onghee hano Omona waKalunga a holoka, a hanaune po oilonga yaSatana. 9 Keshe tuu ou a dalwa muKalunga oye iha longo oulunde, osheshi ombuto yaKalunga otai kala muye; ndele ita dulu okulonga oulunde, osheshi oye a dalwa muKalunga. 10 Opo tuu opo tapa shiivika ovana vaKalunga novana vaSatana. Keshe tuu ou iha longo ouyuki, oye ke fi womuKalunga, naau ehe hole omumwaxe.
Haneendjovo nelaka ndelenee omoilonga nomoshili
11 Osheshi ondaka ei mwe i uda pehovelo, oyo ei, fye otu nokuholafana, 12 tuha fe Kain, ou a dja momunawii nokwa dipaa ondenge yaye. Okwe mu dipaela shike? Osheshi oilonga yaye oya li ii, ndele inya yondenge yaye oya li youyuki.
13 Ovamwatate nye, inamu kumwa ounyuni ngeenge tau mu tondo. 14 Fye otu shi shii, kutya otwa dja mo mefyo ndele twe uya momwenyo, osheshi fye otu li po tu hole ovamwatate. Ndele ou ehe nohole, oye oha fyaala mefyo. 15 Keshe ou ta tondo omumwaxe oye omudipai; ndele mu shi shii, kape nomudipai e nomwenyo waalushe tau kala muye. 16 Ohole yoovene otwa longwa oku i shiiva mwaashi, eshi e tu yandjela omwenyo waye; nafye yo otu nokuyandjela ovamwatate eemwenyo detu. 17 Ngeenge ope na ou e kwete emona lounyuni ou, ndele ta mono omumwaxe a hepa, ndele te mu kukutikile omutima waye, ohole yaKalunga otai kala mo ngahelipi muye? 18 Ovamwange, inatu kaleni nokuhola nondjovo nelaka, ndelenee omoilonga nomoshili!
19 Opo tuu opo hatu lidimbulukwa nokutya, ofye ovomoshili nohatu tulumukifa omutima wetu koshipala shaye, 20 osheshi omutima wetu ngeenge tau tu hokololifa, Kalunga Oye e dule omutima wetu, noinima aishe oku i shii. 21 Ovaholike, omutima wetu ngeenge itau tu hokololifa, opo otu neyombamo koshipala shaKalunga, 22 nakeshe tuu eshi hatu shi indile, ohatu shi pewa kuye, osheshi fye ohatu diinine oipango yaye nohatu longo eshi hashi mu wapalele. 23 Ndele oshipango shaye osho tuu eshi, tu itavele edina lOmona Jesus Kristus, fye tu kale nokuholafana, ngaashi Oye e tu pa oshipango. 24 Ndele ou ta diinine oipango yaye, oye ota kala muKalunga, naye ota kala muye. Ndele opo tuu opo tu shi shii Oye ha kala mufye, okOmhepo oyo e i tu pa.
© Oshikwanyama Bible Revised © Bible Society of Namibia, 2008, 2012.
