Ekwatafanifo li nelao
1 Ei ya kala po okudja kehovelo, otwe i uda ndele twe i mwene nomesho etu vene, ndele twe i tala, nomake etu e i kuma, oyo tuu oyo hatu i udifa nokutya, ondjovo yomwenyo, 2 nomwenyo owa holoka notwe u mona nohatu hepaulula noku mu udifila omwenyo ou waalushe wa li puXe ndele owe tu hololelwa, 3 osho twe shi mona ndele twe shi uda, osho hatu shi mu udifile, opo nanye yo mu kale mu nekwatafano nafye; ndele otu nekwatafano letu naXe nOmona waye Jesus Kristus. 4 Ndele osho tuu osho hatu shi mu shangele, ehafo leni opo li kale la wana la pwa. 5 Hano ondaka twe i uda kuye ndele hatu i mu udifile oyo ei: Kalunga Oye ouyelele, omulaulu kau mo muye. 6 Ngeenge hatu ti, fye otu nekwatafano naye, ndele hatu ende momulaulu, opo nee ohatu fufya ndele ihatu longo oshili.
7 Ndele ngeenge hatu ende mouyelele ngaashi ye ha kala mouyelele, opo tu nekwatafano mokati ketu, nohonde yOmona waye, Jesus Kristus, otai tu kosho omatimba aeshe.
8 Ndelenee ngeenge hatu ti, katu noulunde, ohatu lipukifa fye vene noshili kai mo mufye. 9 Ndele ngeenge hatu hepaulula omatimba etu, Ye omudiinini nomuyuki opo te tu kufile po omatimba ndele te tu kosho ouhenouyuki aushe. 10 Ndele ngeenge ohatu ti, fye inatu nyona sha, opo ohatu mu ningi omunaipupulu nondjovo yaye kai li mufye.
© Oshikwanyama Bible Revised © Bible Society of Namibia, 2008, 2012.
