Eeshali dopamhepo nhumbi tadi longifwa meongalo
1 Lalakaneneni ohole, nye mu lihalele shili eeshali dopamhepo, ndele unene oshali youxunganeki. 2 Osheshi ou ta popi omalaka ita popi novanhu, ota popi naKalunga; osheshi kape na ou e mu udite, osheshi ota popifwa kOmhepo oiholekwa. 3 Ndele ou ta xunganeke ota lombwele ovanhu oku va longa noku va kumaida noku va hekeleka. 4 Ou ta popi omalaka ote litungu ye mwene, ndele ou ta xunganeke ota tungu eongalo. 5 Onda hala ngeno amushe mu popye omalaka, ndele unene nda hala mu xunganeke; osheshi ou ta xunganeke oye e dule winya ta popi omalaka, okuninga ta fatulula, eongalo opo li tungwe.
6 Ndelenee ovamwatate, ngeno ondi uye kunye, handi popi omalaka, ohandi mu kwafa shike, ngeenge itandi popi mehololo ile mokushiiva ile mokuxunganeka ile mokulonga? 7 Ongaashi oinima ihe nomwenyo oyo tai yandje ewi, ngaashi ofilita ile onyalilo; nande tai yandje ewi, olyelye ou ta shiiva osho tashi shikwa, ngeenge ita yandje ewi la tongoka? 8 Nosho tuu enghuma, ngeenge tali yandje ewi inali yela, olyelye te lilongekidile okuya koita? 9 Osho nanye yo; ngeenge itamu popi nomalaka eendjovo di uditike, omunhu ota udu ko ngahelipi osho tamu popi, okupopya kweni otaku i omhepo. 10 Mounyuni omu na omalaka e lili nae lili, olyelye a shiiva kutya, angapi, ndele kape na nande limwe li neendaka dihe uditike. 11 Ndele omatumbulo elaka ngeenge kandi a shii, ame omunailongo koshipala shomupopi, nomupopi omunailongo koshipala shange. 12 Osho nanye yo, eshi tamu lalakanene okupewa eeshali dopaMhepo, lihaleleni mu di pewe dihapu, mu tunge eongalo.
13 Onghee hano ou ta popi omalaka, na indile a dule yo oku a fatula. 14 Osheshi ngeenge handi ilikana nokupopya omalaka, omhepo yange oyo aike tai ilikana, ndele eendunge dange itadi imike sha. 15 Ongahelipi hano? Onda hala okwiilikana nomhepo yange, nonda hala yo okwiilikana neendunge dange; ondi nokwiimba nomhepo yange, nondi na yo okwiimba neendunge dange. 16 Osheshi ngeenge to pandula nomhepo, ou e li omutumba ina shiiva sha, ota dulu ngahelipi okwiitavela epandulo loye a tye: “Amen” ngeenge ke udite ko eshi to popi? 17 Heeno, ove oto pandula nawa, ndele omukweni ita tungwa kulo. 18 Onda pandula Kalunga eshi handi popi omalaka ndi dule amushe, 19 ndelenee meongalo onda hala komesho yaaishe ndi popye oitya itano neendunge, ndi longe yo vamwe, i dule oitya omayovi omulongo mokupopya omalaka.
20 Ovamwatate, inamu kala ounona meendunge, kaleni ounona mowii; ndelenee kaleni ovalumenhu meendunge. 21 MOmhango omwa shangwa: “Ovadumi nomilungu dovanailongo handi di popififa oshiwana eshi, ndelenee natango tuu itashi udu nge, Omwene osho ta ti.” 22 Hano, okupopya omalaka kaku fi edidiliko kovaitaveli, ndelenee okwaava vehe neitavelo; ndelenee okuxunganeka okwo edidiliko lovaitaveli ndelenee halaava vehe neitavelo. 23 Eongalo alishe ngeno tali ongala, naaveshe ngeno tava popi omalaka, ndele tamu uya ava inamu longwa, ile ava vehe neitavelo, ovo itava ti mbela: “Onye omwa pilalala meendunge?” 24 Ndele ngeenge aveshe otava xunganeke notamu uya umwe ou ehe neitavelo ile ou ina longwa, opo aveshe tave mu hololele oushima waye noku mu tomha, 25 nosho oiholekwa yomutima waye tai hololwa, ndele ote lipwipwike oshipala shaye nomokwiilikana Kalunga ota hepaulula nokutya: “Kalunga oku li shili mokati keni.”
26 Ongahelipi hano, ovamwatate? Ngeenge tamu ongala, keshe umwe oku na sha shokweeta po, umwe e neimbilo, namukwao e nelongo, naumwe e nehololelo, umwe a hala okupopya omalaka, namukwao ta fatulula; aishe nai kwafe okutunga. 27 Ngeenge taku popiwa omalaka, naku popye vavali ile vatatu, vo va shikulafane, naumwe na fatulule. 28 Ndele ngeenge kape nomufatululi, nava mwene meongalo, vo ve lipopile voovene naKalunga. 29 Ovaxunganeki nava popye vavali ile vatatu, noovakwao nave di yeleke, 30 ndele ngeenge umwe womwaava tava kala omutumba, ota hololelwa sha, opo ou wotete na mwene. 31 Osheshi onye amushe mu nomhito okuxunganeka mwa shikulafana, opo aveshe va longwe naaveshe va kumaidwe. 32 Neemhepo dovaxunganeki ohadi dulika kovaxunganeki, 33 osheshi Kalunga Ye ke fi Kalunga kedongakano, ndelenee okombili.
Ngaashi momaongalo aeshe ovayapuki, 34 ovakainhu veni nava mwene moiongalele yomaongalo, osheshi ova shilikwa okupopya, ndele nava dulike yo, ngaashi omhango tai shi ti. 35 Ngeenge va hala okushiiva sha, nava pule kovalumenhu vavo momaumbo, osheshi ohoni komukainhu okupopya meongalo. 36 Ile eendjovo daKalunga da dja munye? Ile okunye amuke de uya?
37 Ngeenge ope na ou e shii oye omuxunganeki ile omunamhepo na kale e shi shii, eshi handi mu shangele osho oshipango shOmwene. 38 Ndelenee ngeenge ope na ou ine shi koneka, na kale ine shi koneka.
39 Onghee hano ovamwatate, kondjeni shili mu shiive okuxunganeka, ndele okupopya omalaka inamu ku kelela. 40 Ndelenee aishe nai ningwe keenghedi diwa nokushikulafana.
© Oshikwanyama Bible Revised © Bible Society of Namibia, 2008, 2012.
