Eeshalinghenda daKalunga inadi danaukifwa
1 Ovamwatate, inandi hala mu kale muhe shi shii, ootatekulu aveshe va kala koshi yoshilemo, naaveshe va pitila mefuta 2 naaveshe ova shashelwa muMoses moshilemo nomefuta, 3 naaveshe ova lya oikulya tuu imwe aike yopamhepo, 4 naaveshe ova nwa oshikunwa shimwe shopamhepo, osheshi ova nwa memanya lopamhepo ndele va shikula, emanya olo oKristus. 5 Ndelenee nande ongaha, vahapu vomuvo Kalunga ine va hokwa, osheshi vo ova nyonauninwa po mombuwa.
6 Ndele oinima ei oya ningilwa kufye edidiliko, tuha haluke owii ngaashi venya va halukile. 7 Ndele nye inamu ninga ovalongeli voikalunga ngaashi vamwe vomuvo, ongaashi pa shangwa: “Ovanhu va kala omutumba okulya nokunwa ndele va fikama va dane.” 8 Ndele inatu kaleni mohole yoipala, ngaashi vamwe vomuvo ve shi ninga, nova nyonwa pomayovi omilongo mbali nomayovi atatu mefiku limwe alike. 9 Ndele fye inatu shindeni Omwene, ngaashi vamwe vomuvo va shindile, ndele va lika po komayoka. 10 Ndele nye inamu ngongota yo ngaashi vamwe vomuvo va ngongotele, nova nyonwa po komunyonauni. 11 Ndelenee ei aishe oya ningilwa venya i kale elondwelo kufye noya shangwa oku tu kumaida, ofye ava twa hangika komaxulilo omafimbo ounyuni. 12 Onghee hano ou e lishii e li ofika, na lungame aha wile po. 13 Inamu hangika keyeleko limwe, olo tuu olo lopanhu, ndelenee Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.
14 Onghee hano, ovaholike vange, indeni onhapo efimaneko loikalunga. 15 Ohandi mu lombwele ngaashi ovanaendunge; tokoleni nye vene eshi handi shi tongo. 16 Eholo lepuniko eli hatu li nangeke noupuna, kali fi hamba ekwatafano nohonde yaKristus? Omungome ou hatu u pambula, kau fi ekwatafano nolutu laKristus? 17 Osheshi omungome umwe, nosho fye vahapu olutu limwe; osheshi ofyeni atusheni twa tambula komungome ou umwe. 18 Taleni Israel yopambelela; ava hava li omayambo vehe nekwatafano noaltari? 19 Ohandi ti ngahelipi hano? Omayambo a yambelwa oikalunga oi na tuu sha, ile oshikalunga oshi na tuu sha? 20 Ahowe, ohandi ti, oinima ei ovapaani tave i yambele, otave i yambele eendemoni, haKalunga; ndele ame inandi hala mu kale mu nekwatafano neendemoni. 21 Itamu dulu okunwa meholo lOmwene nomeholo leendemoni, itamu dulu okulya koshililo shOmwene nokoshililo sheendemoni. 22 Ile otwa hala okuhandukifa Omwene? Ofye otu mu dule?
Elipangelo inali nyona eliudo
23 Aishe ohai ningwa, ndele haaishe i nekwafo. Aishe ohai ningwa, ndele haaishe tai tungu. 24 Inapa kala ou ta kongo ouwa waye mwene, ndelenee keshe umwe na konge ouwa wamukwao. 25 Ashishe hashi shingifwa pomalandelo, shi lyeni, inamu lipulapula nasha omolweliudo; 26 osheshi: “Edu olOmwene, naashishe shi yadi mo.” 27 Ndele ngeenge ku na ou ehe fi omwiitaveli te mu ifana, ndele mwa hala okuya ko, lyeni ashishe tamu shi pewa, muhe lipulaapule sha omolweliudo. 28 Ndele ngee ope na ou te mu lombwele: “Eshi osha yambelwa oikalunga,” inamu lya omolwaau e shi holola, nomolweliudo; 29 itandi popi eliudo loye, ndele olamukweni; elipangelo lange oshike li tokolwe keliudo lamukwetu? 30 Ndele ngeenge handi shi li nokupandula, oshike handi shekwa omolwaashi handi shi pandulile?
31 Onghee hano ngeenge tamu li ile tamu nu, ile keshe tuu eshi tamu shi ningi, ashishe shi ningeni okufimanekifa Kalunga. 32 Inamu yandja nande omuhau, nande okOvajuda ile okOvagreka ile keongalo laKalunga, 33 ngaashi naame onda dulika kovanhu aveshe omoinima aishe, noihandi kongo eshi sha wapalela nge, ndelenee oshosho sha wapalela vahapu, opo va xupifwe.
© Oshikwanyama Bible Revised © Bible Society of Namibia, 2008, 2012.
