David ta vale ovanhu ndele ta handukilwa
1 Ndelenee Satana okwa twifa Ovaisraeli ondubo ndele ta tu David omayele okuvala Ovaisraeli. 2 Ndele David okwa lombwela Joab novakulunhu voshiwana: “Indeni mu ka vale Ovaisraeli okudja kuBerseba fiyo okuDan, ndele shiivifilei nge, opo ndi shiive omuvalu wavo.” 3 Ndele Joab ta ti: “Omwene na hapupalife ovanhu vaye lwefele ve dule ava ve li po paife. Omwene wange ohamba, ovanhu aveshe ovapiya voye. Omolwashike ohamba ya hala okuvalula oshiwana noku shi vela ombedi?” 4 Ndelenee ondjovo yohamba oya dula oyo yaJoab, ndele Joab okwa ya nokwa endaenda mOvaisraeli aveshe nokwe uya kuJerusalem. 5 Ndele Joab okwa yandja kohamba David omuvalu wovanhu. MuIsrael mwa li ovalumenhu va wana okulwa ve li omiliyona nomayovi efele, ndele muJuda omayovi omafele ane nomafele omilongo heyali aveke. 6 Ndelenee Levi naBenjamin ine va vala pamwe navenya, shaashi ondjovo yohamba ya li oixuna kuJoab.
7 Noshinima eshi inashi yuka momesho aKalunga, onghee hano Ye a denga Ovaisraeli. 8 Opo nee David ta ti kuKalunga: “Ame nda nyona nai shili, eshi nda ninga oshinima eshi. Ndelenee dimine nge po oilonga ei youshima.” 9 NOmwene okwa lombwela Gad, omumonikokule waDavid, ndele ta ti: 10 “Inda u ka lombwele David u tye: ‘Omwene ta ti ngaha: Ame ohandi ku pe u hoolole poinima itatu. Eshi to hoolola po, osho handi ke ku ningila.’ ” 11 Opo nee Gad e uya kuDavid ndele e mu shiivifila ondjovo yOmwene, ndele ta pula, ta ti: “Shi lipipo wa hala? 12 Omido nhatu dondjala, ile eehani nhatu okuya onhapo ovafininiki voye eshi tave ku taataa, ile omafiku atatu eongamukonda lOmwene, nokutya, oudu wolutapo moshilongo, eshi omweengeli wOmwene ta eta efyo muIsrael ashishe. Enyamukulo li lipipo hai twala kOmwene?” 13 Opo nee David ta ti kuGad: “Ndi udite oudjuu unene! Nandi wile meke lOmwene, osheshi olune laye olinene, ndelenee inandi hala okuwila momake ovanhu.” 14 NOmwene okwa tumina Ovaisraeli oudu wolutapo, ndele mOvaisraeli mwa fya ovalumenhu omayovi omilongo heyali.
Eyambo laDavid moshipale shaOrnan
15 Ndele Kalunga okwa tuma omweengeli kuJerusalem oku shi hanauna po. Ndele fimbo te shi hanauna po, Omwene e shi wete, nokwe lialuluka omolwomupya, nokwa lombwela omweengeli, ou ta hanauna: “Sha wana! Alula eke loye!” Nomweengeli wOmwene okwa kala ofika poshipale shOmujebusi Ornan. 16 David eshi a pashula omesho aye, okwa mona omweengeli wOmwene ta kala ofika pokati kedu neulu, e neongamukonda la pweywa mo, meke laye, la yelulilwa Jerusalem. Opo nee David novakulunhu va li va djala oikutu yeefya tava wile eombe. 17 Ndele David ta ti kuKalunga: “Ame ndi shii nde shi tya, ovanhu nava valwe? Heeno, ame tuu ou nda nyona ndele nda ninga eshi inashi yuka. Ndelenee eedi edi da ninga shike? Omwene Kalunga kange, eke loye nali denge nge neumbo lange, ndelenee ino denga ovanhu voye noudu wolutapo.”
18 Opo nee omweengeli wOmwene a lombwela Gad a tye kuDavid nokutya David e nokuya, a tungile Omwene oaltari moshipale shOmujebusi Ornan. 19 Ndele David okwa ya pandjovo yaGad, ye e i popya medina lOmwene. 20 Ornan eshi a punguluka, okwa mona omweengeli. Novana vaye vane ovamati va hondama. Ornan okwa li ta yele oilya. 21 David eshi e uya kuOrnan, Ornan okwa yelula omesho ndele ta mono David, nokwa dja mo moshipale ndele te linyongamene pedu koshipala shaDavid. 22 Opo nee David ta lombwele Ornan: “Pe nge onhele ei yoshipale, ndi shiive okutungila Omwene oaltari muyo. I pe nge pandjele yoimaliwa ya wana mo, opo oudu wolutapo u kandulwe po movanhu.” 23 Ndelenee Ornan ta ti kuDavid: “Shi kufa po, nomwene ohamba nai ninge osho sha wapala momesho ayo. Tala, eengobe handi di yandje exwikiloyambo, noilei oikuni, noilya eendjayambo. Aishe ohandi ku pe.” 24 Ndelenee ohamba David okwa lombwela Ornan: “Ahowe, ndelenee ame nda hala shili oku shi landa noimaliwa ya wana. Osheshi oinima oyo yoye inandi hala oku i kufa nokuyambela Omwene exwikiloyambo oyo inandi i futu.” 25 Ndele David okwa yandja kuOrnan eesekeli omafele ahamano doshingoldo mokufuta onhele oyo. 26 Ndele David okwa tungila ko Omwene oaltari ndele te mu yambele omaxwikiloyambo nomapanduloyambo. Fimbo ye ta ifana Omwene. Ye okwe mu nyamukula nomundilo wokeulu tau wile koaltari yexwikiloyambo.
27 NOmwene okwa lombwela omweengeli, a shunife eongamukonda laye moshilaleko. 28 Mefimbo olo David eshi a mona nokutya, Omwene e mu nyamukula moshipale shaOrnan, Omujebusi, ye okwa li ta yambe kwinya, 29 osheshi pefimbo linya etwali lOmwene olo la dikwa kuMoses mombuwa noaltari yexwikiloyambo, oya li koshikulundu shomuGibeon. 30 Ndele David okwa tila okuya ko koshipala shOmwene, shaashi a tila eongamukonda lomweengeli wOmwene.
© Oshikwanyama Bible Revised © Bible Society of Namibia, 2008, 2012.
