David ta ningi ehangano naHiram
1 Hiram, ohamba yaTirus, ya tuma ovatumwa kuDavid nomiti domisederi, novapangeli novahongi vomamanya, ve mu tungile ongulu. 2 Ndele David okwe shi dimbulukwa nokutya Omwene e mu pameka ohamba yOvaisraeli nouhamba waye wa tumbala omolwoshiwana shaye Israel.
3 Ndele David okwa kufa vali muJerusalem ovalikadi, ndele David okwa ninga xe yovana vahapu ovamati noukadona. 4 Nomadina ovana vaye ve mu dalelwa muJerusalem aa: Sammua oo naSobab, Natan naSalomo 5 naJibhar naElishua naElpelet 6 naNoha naNefek naJafia 7 naElisama naBeeliada naElifelet.
Okutewa kwOvafilisti
8 Ovafilisti eshi va uda nokutya, David a vaekwa nokwa ninga ohamba yOvaisraeli aveshe, Ovafilisti aveshe va fikama va ka konge David. David eshi e shi uda, okwa ya oku va shakeneka. 9 NOvafilisti ve uya ndele ve lihanena mefilu laRefaim. 10 Opo nee David okwa pula kuKalunga ndele ta ti: “Nandi ka lwife tuu Ovafilisti? Ove oto ke va yandja tuu meke lange?” Omwene okwe mu nyamukula: “Inda ko, Ame ohandi ke va yandja meke loye.” 11 Ndele vo eshi va ya kuBaal-Perasim, David e va taataa, ndele David ta ti: “Kalunga okwa teyaula ovatondadi vange neke lange, ngaashi omeva taa teyaula.” Onghee hano va luka onhele oyo Baal-Perasim. 12 Ndele venya va fiya po oikalunga yavo. Ndele David okwe va lombwela ndele ve va xwika po nomundilo.
13 Ndelenee Ovafilisti ve lihanena vali mefilu. 14 Opo nee David a pula vali kuKalunga, ndele Kalunga okwe mu lombwela: “Ino va shakeneka. Va dilila konima yavo, u va dje kombinga yomiti domitaku. 15 Ndele eshi to udu oikukulo yeemhadi membolongodjo domiti domitaku, tota hano, u ye molwoodi, osheshi Kalunga e ku tetekela a denge omatanga Ovafilisti.” 16 Ndele David okwa ninga ngaashi Kalunga e mu lombwela, ndele va hanauna po omatanga Ovafilisti okudja kuGibeon fiyo okuGeser. 17 Nedina laDavid la tandavela moilongo aishe, nOmwene okwa pendula ehaluko loku mu tila moiwana aishe.
© Oshikwanyama Bible Revised © Bible Society of Namibia, 2008, 2012.
