Jeremia ta falwa kuEgipiti
1 Onda hulitha okulombwela aantu adhihe ndhoka Omuwa Kalunga kawo e dhi lombwele ndje, ndi dhi ya lombwele. 2 Nena Azaria yaHoshaia naJohanan yaKarea naanamwiityo ayehe oya lombwele ndje ya ti: “Oto fundju. Omuwa Kalunga ketu ine ku tuma, u tu lombwele, kaatu ye kuEgipiti. 3 Baruk yaNerija okwe ku tsu omaminimini, u tse ondumbo natse, opo Aababilonia ye tu gwililile po noku tu dhipaga nenge ye tu fale kuBabilon.” 4 Osho Johanan, oondjayi dhiita naantu ayehe inaa hala okuvulika kelombwelo lyOmuwa, ya kale moshilongo shaJuda. 5 Johanan noondjayi dhiita adhihe odha kutha po aantu ayehe ya hupile muJuda e taye ya fala kuEgipiti, pamwe naantu ayehe mboka ya galukile ya zi kiigwana mbyoka ya halakanithilwa ko: 6 Aalumentu, aakiintu, aanona naakadhona aana yokombanda. Oya kutha ayehe mboka Nebusaradan, elenga ekuluntu lyaalangeli, e ya thigile Gedalia sigo oBaruk nangame. 7 Oya yi kuEgipiti, oshoka inaa vulika koohapu dhOmuwa, noya yi sigololo oTakpanhes.
8 Oko hoka Omuwa a lombwele ndje a ti: 9 “Gongela omamanya omanene, u ga tule momunoko mokati koondhopi dhi li mepandaanda peelo lyuuwa muTakpanhes, nAaisraeli yamwe naa tale sho to ningi. 10 Ya lombwela kutya Omuwa, Kalunga kaIsrael, ota ti: ‘Otandi ka tuma omupiya gwandje Nebukadnezzar, omukwaniilwa gwaBabilon, notandi ka tula oshipangelapundi she kombanda yomamanya ngoka nda tula mo. Ota ka yala kombanda yago ongwaya ye yuukwaniilwa. 11 Nebukadnezzar ote ke ya e ta dhenge Egipiti. Aantu mboka yu uthilwa okusa kelega, otaa ka sa kelega, mboka yu uthilwa okukwatwa po, otaa ka kwatwa po, ya ninge aapongekwa, naamboka yu uthilwa okusila miita, otaa ka sila miita. 12 Ootempeli dhiikalunga yaEgipiti otandi dhi tomeke omulilo, nomukwaniilwa gwaBabilonia ota ka fika po iikalunga yawo nenge e yi humbate po. Ngashika omusita ta tombola oongupa moonguwo dhe, osho omukwaniilwa gwaBabilon ta tombola iilyani muEgipiti e ta zi ko ondjolowele. 13 Ota ka hanagula po oongudhimanya dhiidhila muHeliopolis nomuEgipiti nokulungunitha po ootempeli dhiikalunga yAayegipiti.’ ”
Jeremiah Is Taken to Egypt
1 I finished telling the people everything that the Lord their God had sent me to tell them. 2 Then Azariah son of Hoshaiah and Johanan son of Kareah and all the other arrogant men said to me, “You are lying. The Lord our God did not send you to tell us not to go and live in Egypt. 3 Baruch son of Neriah has stirred you up against us, so that the Babylonians will gain power over us and can either kill us or take us away to Babylonia.” 4 So neither Johanan nor any of the army officers nor any of the people would obey the Lord's command to remain in the land of Judah. 5 Then Johanan and all the army officers took everybody left in Judah away to Egypt, together with all the people who had returned from the nations where they had been scattered: 6 the men, the women, the children, and the king's daughters. They took everyone whom Nebuzaradan the commanding officer had left under the care of Gedaliah, including Baruch and me. 7 They disobeyed the Lord's command and went into Egypt as far as the city of Tahpanhes.
8 There the Lord said to me, 9 “Get some large stones and bury them in the mortar of the pavement in front of the entrance to the government building here in the city, and let some of the Israelites see you do it. 10 Then tell them that I, the Lord Almighty, the God of Israel, am going to bring my servant King Nebuchadnezzar of Babylonia to this place, and he will put his throne over these stones that you buried, and will spread the royal tent over them. 11 Nebuchadnezzar will come and defeat Egypt. Those people who are doomed to die of disease will die of disease, those doomed to be taken away as prisoners will be taken away as prisoners, and those doomed to be killed in war will be killed in war. 12 I will set fire to the temples of Egypt's gods, and the king of Babylonia will either burn their gods or carry them off. As shepherds pick their clothes clean of lice, so the king of Babylonia will pick the land of Egypt clean and then leave victorious. 13 He will destroy the sacred stone monuments at Heliopolis in Egypt and will burn down the temples of the Egyptian gods.”
