1 Îǂhôasib ge ǀgôa-e ūhâs xa a ǃgâi. Elob tsî khoen tsîn ge ǃgâi xūn ǁnāti ī khoen ge dīna hugaǀgui ǂâis ǃnâ nî ūhâ. 2 Îǂhôasib ge ǃgâi aiǁgaus, khoen xa nî saohes ase ī tsî ǀkhais ka, on ge ra ǁkhui si. ǁÎs ge khoe-i dan ǁkhā ǂoaǂamsa danǁgauǁgausa hoaǁae tsîs ge hoaǁae ǁnāti nî hâ. ǁÎs ge hoa ǃgâi xūn xa a ǃgôaǃgôasa xū, khoe-i ūhâ ǁkhāsa.
3 Mâtikō ǂgui ǀgôan ga mā-amhe tama ǃgaeǁaresa xu ǃnae, xawe i ge ǀgui-i tsîna tātsē xū-i xare-e harebe tide. ǁÎn ge a ǀhapiǀgôa tsî tātsē ǁaposa ǃgaoǃgaoba ǁguibasen tsî ǃgamse ǃnomaǃkhō tide. 4 ǁÎn ge ǂhere ǃnomaga ūhâ hain hîa haiǂnarena ǁaero-i ǀgui-e ra ūhân khami ī, tsî ǂoab xa sabusen kaihe tsî ǁgaoǂoab xa ra ǃhomǂuihe. 5 ǁÎn di ǁnâugu ge kaiǀoa tama gu hâ hîa ra khôaǁnâ, ǂûn ân ge tātsē ǁan tama tsî xū-i xare-e ǃgâiba tama hâ. 6 ǀGoraǃgâtsēs ain ge ǀgôan mā-amsa tama ǃgaeǁaresa xu ge ǃnaena, ǁgûn di ǁoren xa ǃkhō-am tsî ǁîn ǃoagu nî ǀhûǀguitimî.
7 Xawe ǂhanu-ai khoen ge ǂkhamn a hîan ga ǁō, xawe sâba nî hō. 8 Sada ge kaira khoena ǃgôasiba ūba hâ tsî ǁnāsa ǂomxa kurigan ûi hâ ǃkhais ǃaroma ǀgui dī tama hâ. 9 Gā-aisib tsî ǂhanu-aisib tsîra ge kairasib di ǁgauǁgau tsî kairasib ǀkha nî hāse i.
Henoxi di aiǁgaus
10 Eloba ge ǃgâiba i tsî ǁîb xa ǀnamhe i khoeb, Henox ti ǀon hâb ge ge hâ i. Ganupeb ǁore-aon ǁaegu ǁan hâ hîab ge Henoxa Elob xa ge ūbēhe, 11 ǂkhabab tsî gaxaǃnâsib tsîn ǁîb di ǂâis tsî ǀoms tsîra ǀhôagaoǃnâ tidega. 12 Sada hoada ǂan ǃkhais ge khoen ra ǂkhabab xa ǃkhōǃnamihe tsî ǂhanusen ra kō, xawe tare-i a ǃgâi ǃkhais tsîna mûǂan ǁkhā tama ra isa. ǀHapio khoen ge ǁnātikōse turab xa ǃkhōǃnamihe tsî ǀnî xū-i xare-i ose, ǁîn ǂhâba hâ xūn xa ǀgui a ǂâi ǁkhā. 13 Henoxi ge ǃnubu ǁaeb ǃnâ dīǀoaǀoasasib, nau khoen tātsē ǀoasa ûiǁaeb ǃnâ sīǃnâ tamaba ge sīǃnâ. 14 ǃKhūb ge Henoxi di ûib ǀkha ge ǂkhî i tsî ǁîba ǃnapetamase nē ǂkhaba ǃhūbaiba xu ge ūǂui. Khoen ge ǁîb di ǃgûs xan ge ǂan, xawe ge ǁnâuǃā tama hâ i. ǁÎn ge tātsēs tsîna nē ǁkhāǁkhās, 15 Elob ǁîb ǂhunuma khoen ǃoa ǃgâi tsî a ǀkhomxaǃnâ ǃkhais disa ge ǁkhāǁkhāsen ǂgao tama hâ i. ǁÎb ge ǁnān hîab ǁhûiǂui hâna ra sâu.
ǂKhaba khoen di ûiǃgomsib
16 ǂHanu-ai khoen ge ǁō tsîn ga ǀkhai xawe ǂkhaba khoen, ǁîn khaoǃgâ ra ûiǃkharuna ra taotao. ǁÎn di kairasib ǃnân ge ǂkhaba khoena ǂkham khoen hîa ge ǁîn di dīǀoaǀoasasiba sīǃnân xa nî taotaohe. 17 Gā-ain ge ǂkhamse a ǁō ǁkhā, xawen ge ǂkhaba khoena tātsē, nēb a ǃKhūb di ǀgau, ǁîna ǃnorasasib ǃoa ūbēs diba ǃkhaisa ǁnâuǃā tide. 18 Eloxoresan ge ǃgâi khoen di ǁōba supu xūse ra mû, xaweb ge ǃKhūba ǁîna nî âiǂui. ǁÎn ge ǁōn kao ǃamku ǁkhō-e dībahe tide tsîn ge ǁō hân tsîn xa ǀamose nî ǃharaxūhe. 19 Elob ge ǁîna ǀhobadi ǃnâ aoǂgā tsî nî mîo kai. ǁNāpan ge ǁaeb di ǀunis kōse, tsarab khami ǂnâsase nî ǁgoe. ǁÎn ge tsûba nî tsâ tsî khoen xa hoaragase nî ǀuruhe. 20 ǁÎn ge ǃaob ǃnâ ǀGoraǃgâs, ǁîs ǃnân ǁîn di ǁorena nî ǃgôakhâihes ǃoa nî hā tsîn ge ǁîn di ǂhunuma ǂhanuoǃnâ dīgu xa nî ǀgoraǃgâhe.
