Matatiab di ǂgomǂgomsasib
1 ǁNā ǁaeb ǃnâb ge Joarib omaris di pristeri, Matatiab ti ge ǀon hâ ib, Johaneb ôa tsî Simeonni ǁnuriǀgôa ge iba, Jerusalemsa xu doe tsî Modeins ǃnâ sī ge ǁan. 2 Matatiab ge koro ǀgôaga ge ūhâ i: Johaneb, ǁkhāti Gaddi ti gere ǀonǂgaiheb, 3 Simonni, Tassib ti gere ǀonǂgaiheb, 4 Judab, Makabaeub ti gere ǀonǂgaiheb, 5 Eleasari, Avaran ti gere ǀonǂgaiheb tsî Jonatanni, Apfub ti gere ǀonǂgaiheb hâga.
6 Matatiab ge Judeab tsî Jerusalems tsîra ǃnâ ra dīhe ǁorebab ge mû, 7 o ge mî:
“Tare-i ǃaroma ta nēti ī ǁgaisi xūna tani mûga ge ǃnae,
ti khoen tsî ǃanu ǃās di hîkākāhes ǃaromasa?
Nēpa ta huiose nî ǂnû,
ǃāsa khākhoen ai māǁnāhe
tsîb Tempela ǃhaokhoen ǃomǁae ra ǁnā hîa?
8 ǁÎs di Tempeli ge ǃgôasi-e ūhâ tama khoe-i khami ī.
9 ǁÎs di ǂkhaira xapan ge ge tanibēhe.
ǂKham ǀgôaron ge ǃgangu ǃnâ ge ǃgamhe
tsî ǂkham khoega, khākhoen di hoaǀkhāǀā gôagu xa.
10 Nau ǃhūgu di ǃhaodi hoadi ge ǃāsa ge ūbasen
tsî ǁîs ǃnâ ge hâ i xūn hoana ge ǁkhâuǁnâbasen.
11 ǁÎs di hoaraga anixūn ge ge ūbēhe;
nēsis ge a khobo tsî ǃaruǀî ǃnorasa tama hâ.
12 Kō sada Tempeli, Jodeǁî taman xa ge ǃgôaoǃnâ kaiheb,
ǁîb di hoaraga ǂkhaisiba ge ǀhanaheba.
13 Tare-i ǃaroma da ǃaruǀî nî ûi?”
14 Matatiab tsî ǁîb ôagu tsîn ge ǁîgu sarana doa, ǃoab sarana ana tsî kaise ge ǃoa.
15 Gao-aob di ǂamkhoegu, khoena ge Eloba xun nî ǁnāǁgôase gere ǁgarigu ge Modeins ǃoa ge hā, ǁnāpa hâ khoena gu nî ǁgarise, în ǀūbeǁguibade ǁguiba. 16 ǂGui Israelǁîn, ǁîn ǃnâ gu Matatiab tsî ôasagu âb tsîna hân ge ǁîgu ǀkha nî ǀhaose ge hā. 17 O gu ge gao-aob di ǂamkhoega Matatiab ǃoa ge mî: “Sats ge nē ǃās di kai tsî ǃgôahesa ǂgaeǂgui-aotsa, tsîts ge sa ôagu tsî khoexakhoen xa ra mâxōǀkhāhe. 18 Tarexats gao-aob ge mîmāna dīs ǃnâ ǂguro tama? Jodeǁî taman hoan tsî Judeab di khoen tsî hoaraga khoen Jerusalems ǃnâ ge ǃgaun tsîn ge nēsa ǀnai ge dī. Nēsats ga dī, o gu ge sats tsî sa ôagu tsîna ‘Gao-aob di horesagu’ ti hâ ǂgaiǂams ǃnâ nî ǃgôaǂgāhe tsî go ge ǀhaiǀurib, ǃhuniǀurib tsî ǂgui ǀkhaexūn ǀkha nî mādawa-amhe.”
19 Matatiab ge ǃgari dommi ǀkha ge ǃeream: “Hoa ǁaedi gao-aob ǂgaeǂguis ǃnaka hâdi ga ǁîba ǁnâuǀnam tsî mâs hoasa ǁîb di mîmās ai ǁîn aboxagu di ǂgomsa xu ǁnāǁgôa, 20 xawe da ge tita tsî ti ôagu tsî ti khoexakhoen tsîda, Elob ge sida aboxagu ǀkha dī ǃgaeǀhaosa ǀûs ose nî ǃkhōǀgaipe. 21 Elob di huib ǀkha da ge tātsē ǁîb ǂhanuba ǂhara tamas ka io ǁîb di mîmāde ǁnâuǀnamoǃnâ tide. 22 Gao-aob di mîmāsa da ge ǁnâuǀnam tide tsî da ge sida daob ǀgoreǀîs diba ǀkharaǀkhara tide.”
23 Nē mîdeb ge mîtoas khaoǃgâ i ge Modeins di Jodeǁî-e, hoa khoen ra mûse aisǀkhāb ǁga ge ǂoaxa, gao-aob ge mîmā khami i, ǁnāpa mâ altars ai nî ǁguibase. 24 Tsî Matatiab ge ǁîba mû, ob ge kaise ge ǁaixa tsîb ge ǂgaob âb ǃnâ ge gongonǃnâhe. ǁAib xa ra ǀkhūseb ge aisǀkhāb ǃoa ǃkhoe tsî nē khoeba altars ai ge ǃgam. 25 ǁKhā ǁaeb ǁkhāb aib ge ǁîba gao-aob di ǂamkhoeb, khoena ge ǁguibas ǃoa gere ǁgarib tsîna ǃgam tsî altars tsîna ge khôaǁnâ. 26 Nē ǀgaub aib ge Matatiaba îǂhôasiba, Pinehab hîa ge Salub ôab, Simriba ǃgammi ǁkhāb khami, ǂhanub ǃaroma ge ǁgau.
Matatiab di torodīb
27 ǁNās khaoǃgâb ge Matatiaba ǃās ǃnâ ǃgûgaruse gere ǂgaiǂui: “Mâ-i hoa-i Elob ǃgaeǀhaos ǃnâ ra ǂgom-i tsî ǂhanuba ra ǁnâuǀnam-e, a-i tita sao!” 28 Tsîb ge ǁîb ôagu ǀkha ǃhomgu ǃoa ge ǃkhoeni, ǁîgu di xūn hoana ǃās ǃnâ ǁnāxū tsî.
29 ǁNā ǁaeb ǃnâ gu ge ǂguigu hîa gere ǂhanub tsî ǂhanu-aisib tsîkha ôaga, ǁnāpa gu sī nî ǁanse ǃgaroǃhūb ǃoa ge ǃgû. 30 ǁÎgu ge ǁîgu ôan, taradi tsî ûitsama xūn tsîna, ǀgaisa ǁgâiǀāb hîan gere tsâb ǃaroma ge ūsao. 31 Tsîn ge ǁnān, hîa gao-aob mîmāsa ǂhara tsî ge gaun nîga ǃgaroǃhūb ǃoa bēna, gao-aob di ǂamkhoegu tsî Davidi ǃĀs, Jerusalems di toroǃkhamaogu tsîn ai ge ǃnurihe. 32 Kai ǂnubis di toroǃkhamaogu ge ǁîna ǃgôaǃgon tsî ge saoǁae. ǁÎgu ge hâǃkhaiba ǁîn ǃoagu ǂnaumâi tsî ǁîna gu Sabbattsēs ai nî ǁnāǂamga ge ǂhomisen. 33 Tsî gu ge Jodeǁîn ǃoa “ǁAeb ge noxopa hâ, xuige ǂoaxa, î gao-aob di mîmāsa ǁnâuǀnam, o ge ge ûib âdo nî sâu,” ti gere ǃhao.
34 Xawen ge “ǂOa da tide; ǁnās ǀguis ose da ǁkhāti gao-aob mîmāde ǁnâuǀnam tsî Sabbattsēsa ǃgôaoǃnâ kai tide,” ti ge mî.
35 Toroǃkhamaogu ge ǁnātimîsi Jodeǁîna ge ǁnāǂam, 36 xawen ge ǁîna mâǃoa tama ge i. ǁÎn ge ǀui-i xawe-i ǀkha ǂnoa tamas ka io gauǃnân ge hâ i ǃkhaigu di dao-amdi tsîna ge ǁkhaeǂgan tama hâ i. 37 ǁÎn ge “A da hoatsama ǀhapiose ǁō; ǀhommi tsî ǃhūbaib tsîkha ge sadu ra ǂhanuoǃnâse ǃgam da ǃkhaisa nî ǃkhō-am” ti ge mî. 38 ǁNātin ge khākhoena Sabbattsēs ai ǁîna ǁnāǂam tsî aogu, taradi, ǀgôan tsî ǁîn di ûitsama xūn tsîna ge ǃgam; ǀhaob ai ǀguiǀoadisi khoena.
39 Matatiab tsî ǁîb ǀhōsan tsîn ge nē ǂhôasan ge ǁnâu, o kaise ge ǃoa 40 tsî ǁîǃnābe ge mî: “Sada hoada ga nau Jodeǁîǃgâsan ge dī khami dī tsî Jodeǁî taman ǃoagu, sada ûib tsî ǂgomsa ǁkhaubas ǃaroma ǃkham ǂgao tama i, o da ge ǃhae ǁaeb ǃnâ ǃhūbaiba xu nî hîkākāhe.” 41 Tsîn ge ǁnātsē khoe-i ga ǁîna Sabbattsēs ai ǁnāǂam, on nî ǃkhamǃoa ǃkhaisa ge mîǀgui, în tā ǁîn ǃgâsan ge ādi ǃnâ ǁō khami ǁō.
42 O gu ge ǂgui, ǀgaisa ǃkhamaogu, Israelǁaes diga, ǂhanuba ǁkhaubas ǃaroma māsenxase Hasideasa xu hā tsî Matatiab tsî ǁîb ǀhōsagu ǀkha ge ǀhaoǀhaosen. 43 ǁKhāti gu ge ǃgôaǃgonde xu ge ǃhū khoegu tsîna nē khoegu tawa hā ǀarosen tsî ǁîgu toroǂnubisa ge ǀgaiǀgai. 44 Tsî gu ge toroǂnubisa ǂhomi tsî ǂhanub ǃoagu ǁnâuǀnamoǃnâ Jodeǁîna, ǁîgu di ǁaib ǃnâ ge hîkākā. Ûiǂoa gen ge ǃnorasasib ǃaroma Jodeǁî taman ǃoa ge ǃkhoeni. 45 Matatiab tsî ǁîb ǀhōsagu tsîn ge hoa ǃkhain ai ǃgûma tsî ǀūben di altarde gere khôaǁnâ. 46 ǁKhāti gu ge ǃgaohesa tama axagu, Israeli ǃnâ gu gere hōgu hoaga ǀgaib ǃnâ gere ǃgao. 47 ǁÎgu ge ǁkhāti Jodeǁî taman di ǂgaeǂgui-aoga ǃgôaǃgons ǃnâ ge ǃgâiǃgâ. 48 Tsî gu ge Moseb di ǂhanuba Jodeǁî taman tsî ǁîn gao-aoga xu hō-oa tsî ǂkhaba gao-aob Antioxub di ǀgaiba ge khôa.
Matatiab di ǀuni mîdi
49 Matatiab ge ǁōǁaeb âb ge ǀgūo, ǁîb ôagu ǃoa ge mî: “ǁÎǃgôasens tsî ǃgôaǁnâgus ge nēsi go ǀgai, tsî nēb ge hîkākās tsî ǁaib di ǁaeba. 50 Xawe sago, ti ôago ge ǂhanub tsî sada aboxagu di ǃgaeǀhaos ǃaroma ǁōsa nî māsenxa.
51 “Mâtikō xūna gu ge sada aboxaga dī tsî ǁîgu tsēdi ǃnâ sīǃnâ ǃkhaisa ǂâis ǃnâ ūhâ re. ǁÎgu di aiǁgausa sao re, o go ge kai ǃgôasiba nî ǃkhōǃoa tsî ǀamos kōse nî ǂansa. 52 Abrahamma ǃâitsâheb geo, Elob ǃnâ ǂgom tsîb ǁîb di ǂgoms ǃaroma ge ǂhanu-ai kaihe tama hâ i? 53 Josefi ge ǁîb ǂōǂōsib ǁaeb ǃnâ Elob di mîmāde ǁnâuǀnam tsî Egipteb ǂama ge ǂgaeǂgui-ao kai. 54 Sada aboxab Pinehab ge kaiseb ge îǂhôa i amaga, ǀamo pristersis di mîmâisa ge ǃkhōǃoa. 55 Josuab ge mîmāsab ge dīǀoaǀoa amaga, Israelǁîn di ǀgoraǃgâ-aose ge mâihe. 56 Kaleb ge ǀhaohâb ǃnâb ge ǃkhō-am amaga, ǀumisa ǃhūb ǃnâ ge ǃkhōǃoa. 57 Davidi ge ǀkhomxaǃnâb ge i amaga, ǀamo gaosi tronsa ge ǀumi. 58 Eliab ge Elob ǂhanubab ge ǁnâuǀnam hâ i amaga, ǀhommi ǃoa ge ūǃapahe. 59 Hananjab, Asariab tsî Misaeli tsî gu ge ǂgom gu ge amaga, ǀaeǁhabuba xu ge sâuhe. 60 Danieli ge ǀhapiob ge i xui-ao, xamgu amǃnâga xu ge huiǂuihe.
61 “Mâb sada aboxagu dib hoaba aiǁgaus ase ū, o go nî mû ǃkhais ge Elob ǃnâ ra ǂgom-i hoa-i ǀgaioǃnâ tidesa. 62 Tā ǁore-aon di mîde ǃao, ǁîn di ǂkhaisasib ǂhaub tsî ǂunin ǃnâ nî dabaǃkhunihe amaga. 63 Nētsēn ge nî ǀgapiǃgôahe, xawe ǁarin ge nî kā, ǁîn nî tsara kai tsî di ǀapedi âna nî ǀam amaga. 64 Ti ôago, ǁkhoaǂgaoxa, î ǂhanub ǃnâ ǀgai, ǁîb ǃnâ-u go ǃgôasiba nî ǃkhōǃoa xuige.
65 “Sago ǃgâsab Simeonni ge a gā-ai, xuige tita go ra ǃgâs ǁkhās khami ǁîb tsîna ǃgâ re. 66 Judab Makabaeub ge ûib hâs kōse ge ǀgaisa i. ǁÎb ge nî sado ǃkhōdana-ao tsî sado khākhoen ǃoagu torogu ǃnâ nî ǂgaeǂgui. 67 Tsî go ge Elob di ǂhanuba ra ǁnâuǀnamn hoana ǀhaoǀhao tsî sadu khoen ǃoagu ge dīhe ǂhanuoǃnâsiba nî ǀkhao. 68 Jodeǁî tamana ǁîn di dīn ǃaroma mādawa, î ǂhanub di mîmāde hugaǀgui ǁnâuǀnam.”
69 ǁNās khaoǃgâb ge Matatiaba ǁîga ǀkhae tsî ge ǁō. 70 ǁÎb ge ǀguikaidisi tsî hakadisiǃnaniǀaǁî kurib ǃnâ ǁō tsî ǁîb di aboxagu ǀhobas, Modeins tawa hâs ǃnâ ge ǁkhōhe. Tsîs ge hoaraga Israelǁaesa ǁîb ǃaroma ǃgamse gere ǃoa.
